«Аэронавигациялық қызмет көрсетуді ұсынушыны сертификаттау және сертификат беру қағидаларын, сондай-ақ аэронавигациялық қызмет көрсетуді ұсынушыларға қойылатын сертификаттық талаптарды бекіту туралы» бұйрық жобасына құжаттама

«Қазақстан Республикасының әуе кеңістігін пайдалану және авиация қызметі туралы» 2010 жылғы 15 шілдедегі Қазақстан Республикасы Заңының 17-бабы 4-2 тармағына сәйкес, БҰЙЫРАМЫН:

1. Бекітілсін:

1) осы бұйрыққа 1-қосымшаға сәйкес Аэронавигациялық қызмет көрсетуді ұсынушыны сертификаттау және сертификат беру қағидалары;

2) осы бұйрыққа 2-қосымшаға сәйкес Аэронавигациялық қызмет көрсетуді ұсынушыға қойылатын сертификаттық талаптар.

2. «Аэронавигациялық ұйымның әуе қозғалысына қызмет көрсету органын және (немесе) радиотехникалық жабдықты пайдалану және байланыс қызметін сертификаттау және оған сертификат беру қағидаларын, сондай-ақ Аэронавигациялық ұйымның әуе қозғалысына қызмет көрсету органдарына және (немесе) радиотехникалық жабдықты пайдалану және байланыс қызметтеріне қойылатын сертификаттық талаптарды бекіту туралы» Қазақстан Республикасы Инвестициялар және даму министрінің міндетін атқарушының 2015 жылғы 6 ақпандағы № 117 бұйырығының күші жойылды деп танылсын.

3. Қазақстан Республикасы Инвестициялар және даму министрлігінің Азаматтық авиация комитеті:  

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық мемлекеттік тіркеуден өткен күннен бастап күнтізбелік он күн ішінде оның қазақ және орыс тілдеріндегі қағаз және электрондық түрдегі көшірмелерін ресми жариялау және Қазақстан Республикасы нормативтік құқықтық актілерінің эталондық бақылау банкіне енгізу үшін Республикалық құқықтық ақпарат орталығы» шаруашылық жүргізу құқығындағы республикалық мемлекеттік кәсіпорнына жіберуді;

3) осы бұйрық мемлекеттік тіркеуден өткен күннен бастап күнтізбелік он күн ішінде оның көшірмелерін мерзімді баспа басылымдарына ресми жариялауға жіберуді;

4) осы бұйрықтың Қазақстан Республикасы Инвестициялар және даму министрлігінің интернет-ресурсында орналастырылуын;

5) осы бұйрық Қазақстан Республикасы Әділет министрлігінде мемлекеттік тіркелгеннен кейін он жұмыс күні ішінде Қазақстан Республикасы Инвестициялар және даму министрлігінің Заң департаментіне осы тармағының 1), 2), 3) және 4) тармақшаларында көзделген іс-шаралардың орындалуы туралы мәліметтерді ұсынуды қамтамасыз етсін.

4. Осы бұйрықтың орындалуын бақылау Қазақстан Республикасының Инвестициялар және даму вице-министріне жүктелсін.  

5. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.  

Қазақстан Республикасының
Инвестициялар және
даму министрі Ж. Қасымбек

1. Осы Аэронавигациялық қызмет көрсетуді ұсынушыны сертификаттау және сертификат беру қағидалары (бұдан әрі – Қағидалар) «Қазақстан Республикасының әуе кеңістігін пайдалану және азаматтық авиация қызметі туралы» 2010 жылғы 15 шілдедегі Қазақстан Республикасы Заңының (бұдан әрі – Заң) 14-бабы 1-тармағының 41-27) тармақшасына сәйкес әзірленді және аэронавигациялық қызмет көрсетуді ұсынушыны сертификаттау және сертификат беру тәртібін айқындайды.

2. Қағидаларда мынадай терминдер мен анықтамалар қолданылады:

1) авариялық хабар беру (авариялық хабар беру қызметі) – іздестіру-құтқару қызметінің көмегін қажет ететін әуе кемелері туралы тиісті ұйымдарды хабардар ету және сондай ұйымдарға қажетті жәрдем көрсету үшін ұсынылатын қызмет көрсету;

2) аэронавигациялық қызмет көрсету – әуе қозғалысына қызмет көрсетуді, байланыс, навигация және бақылау жүйелерін ұсынуды, ұшуларды метеорологиялық және іздестіру-құтқарумен қамтамасыз етуді, аэронавигациялық ақпарат беруді қамтитын қызмет көрсету түрлері. Қызмет көрсетудің бұл түрлері әуе кеңістігін пайдаланушыларға ұшудың барлық сатыларында (қонуға жақындау, әуеайлақ ауданында) ұсынылады;  

3) аэронавигациялық қызмет көрсетуді ұсынушы – аэронавигациялық қызмет көрсетуді ұсыну мақсатымен құрылған ұйым;  

4) аэронавигациялық қызмет көрсетуді ұсынушының сертификаты – аэронавигациялық ұйымның қызмет көрсетуді ұсынушының сертификаттық талаптарға сәйкестігін куәландыратын белгіленген үлгідегі құжат (бұдан әрі – сертификат);

5) әуе қозғалысына диспетчерлік қызмет көрсету – мынадай:

әуе кемелері арасында және әуе кемелерінің маневр жасау алаңындағы кедергілермен соқтығысуын болғызбау;

әуе қозғалысын жылдамдату және реттеу мақсаттарында ұсынылатын қызмет көрсету;

6) әуе қозғалысына қызмет көрсету – әуе қозғалысына ұшу-ақпараттық қызмет көрсету, авариялық хабар беру, диспетчерлік қызмет көрсету (аудандық диспетчерлік қызмет көрсету, қонуға жақындағанда диспетчерлік қызмет көрсету немесе әуеайлақтық диспетчерлік қызмет көрсету);

7) әуе қозғалысына қызмет көрсету органы – әуе қозғалысына диспетчерлік қызмет көрсету органы, ұшу ақпараты орталығы немесе аэронавигациялық ұйымның әуе қозғалысына қызмет көрсетуіне қатысты хабарламаларды жинау пункті;

8) өтініш беруші – сертификат алу үшін азаматтық авиация саласындағы уәкілетті органға өтініш берген заңды тұлға;

9) ұшу-ақпараттық қызмет көрсету – мақсаты ұшудың қауіпсіз және тиімді орындалуын қамтамасыз ету үшін консультациялар мен ақпарат беру болып табылатын қызмет көрсету;

10) уәкiлеттi орган – Қазақстан Республикасының әуе кеңiстiгiн пайдалану және азаматтық және эксперименттік авиация қызметі саласында басшылықты жүзеге асыратын орталық атқарушы орган;

11) аэронавигациялық ақпаратты басқару қызметі – нақты белгіленген әрекет ету аймағында құрылған, әуе навигациясының қауіпсіздігін, мерзімділігін және тиімділігін қамтамасыз етуге қажетті аэронавигациялық ақпаратты (деректерді) беруге жауап беретін қызмет;  

12) «МЕТ қызмет көрсетуді ұсынушы» метеорологиялық органы – халықаралық аэронавигацияны метеорологиялық қамтамасыз етуге арналған орган;

13) әуеайлақтық метеорологиялық орган – әуеайлақта орналасқан, әуе кемелерінің ұшуын метеорологиялық қамтамасыз етуге арналған қызмет;

14) құрылымдық бөлімше – аэронавигациялық қызмет көрсетудің кез келген түрін (тармағын) тікелей ұсынатын аэронавигациялық қызмет көрсетуді ұсынушының кез келген бөлімшесі;  

15) аспаптар бойынша ұшып шығудың стандартты маршруты – әуеайлақтан немесе әуеайлақтың белгілі бір ұшу-қону жолағынан әуеайлақ ауданынан шығу нүктесіне дейінгі аспаптар бойынша ұшу ережелері бойынша белгіленген ұшып шығу маршруты;  

16) аспаптар бойынша келудің стандартты маршруты – әуеайлақ ауданына кіру нүктесінен аспаптар бойынша қонуға бет алудың жарияланған схемасы бойынша ұшу басталатын нүктеге дейінгі АҰЕ бойынша келудің белгіленген маршруты;  

3. Осы Қағидаларда төмендегідей қысқартылған сөздер қолданылады:

PBN – сипаттамаларға негізделген навигация;

STAR - аспаптар бойынша келудің стандартты маршруты;

SID - аспаптар бойынша ұшып шығудың стандартты маршруты;  

АҰЕ - аспаптар бойынша ұшу ережелері;

АНҚ - аэронавигациялық қызмет көрсету.

4. Аэронавигациялық қызмет көрсетуді ұсынушыны сертификаттау үшін «Салық және бюджетке төленетін басқа да міндетті төлемдер туралы» Қазақстан Республикасының 2008 жылғы 10 желтоқсандағы Кодексі  

476-3 бабының 9-тармағына сәйкес белгіленген тәртіппен және мөлшерде алым алынады. Сертификаттау көрсетілген алым мемлекеттік бюджетке төленгеннен кейін жүзеге асырылады.

5. Аэронавигациялық қызмет көрсетуді ұсынушыны сертификаттауды (бұдан әрі – сертификаттау) уәкілетті орган жүзеге асырады.