Еуразиялық экономикалық одаққа мүше мемлекеттердің темекі өніміне акциздер саласындағы салық саясатын жүргізу қағидаттары туралы Келісім жобасы

Бұдан әрі мүше мемлекеттер деп аталатын Еуразиялық экономикалық одаққа мүше мемлекеттер өз үкіметтері атынан, 2014 жылғы 29 мамырдағы Еуразиялық экономикалық одақ туралы шарттың (бұдан әрі – Шарт) XVII бөлімнің ережелерін және жанама салықтарды өндіріп алу тәртібі және тауарлардың экспорты мен импорты, жұмыстарды орындау, қызметтер көрсету кезінде олардың төленуін бақылау тетігі туралы хаттаманы (Шартқа № 18 қосымша) басшылыққа ала отырып, Дүниежүзілік денсаулық сақтау ұйымының темекіге қарсы күрес жөніндегі 2003 жылғы 21 мамырдағы негіздемелік конвенциясын назарға ала отырып, Еуразиялық экономикалық одақ (бұдан әрі – одақ) шеңберінде темекі өнімі нарығының жұмыс істеуі үшін тиісті жағдайлар жасау және темекі өнімінің айналымы саласында бәсекелес ортаны қамтамасыз ету мақсатында, Одақ шеңберінде экономикалық интеграцияны тереңдетуге деген ұмтылысты бөлісе отырып, мүше мемлекеттердің экономикалық мүдделерін қорғауды қамтамасыз ету қажеттігін мойындай отырып, халықаралық құқықтың жалпыға танылған қағидаттары мен нормаларын назарға ала отырып, мүше мемлекеттердің әрқайсысының темекі өніміне салық салу деңгейін дербес айқындаудың және өз аумағында осы өнімге қатысты салық саясатын жүргізудің ажырамас құқығын тани отырып, төмендегілер туралы келісті:

Осы Келісім мүше мемлекеттердің аумақтарында сатылатын темекі өніміне акциздер мөлшерлемелерін үйлестіру (жақындастыру) жолымен одақ шеңберінде темекі өнімінің нарығын құру үшін жағдайларды қамтамасыз етуге бағытталған, темекі өніміне акциздер мөлшерлемелерін үйлестіру (жақындастыру) негізгі қағидаттарын, шаралары мен тәртібін айқындайды және Еуразиялық экономикалық одақтың сыртқы экономикалық қызметінің бірыңғай тауар номенклатурасының 2402 20 субпозициясында жіктелетін темекі акциздерінің мөлшерлемелерін үйлестіру (жақындастыру) мәселелерін реттейді.

Темекі өніміне акциздер мөлшерлемелерін үйлестіру (жақындастыру) мынадай қағидаттар:

мүше мемлекеттер халқының күнделікті қолда бар табысының мүше мемлекеттердің жан басына шаққандағы жалпы ішкі өнім өлшеміндегі айырмашылықтарды есепке алу, мүше мемлекеттердің халқы үшін темекі өнімінің қолжетімділігі (оның ішінде бағалық);

өсу қарқыны неғұрлым төмен мүше мемлекеттерде акциздер мөлшерлемелерінің өсу қарқынын жеделдету және өсу қарқыны неғұрлым жоғары мүше мемлекеттерде акциздер мөлшерлемелерінің өсу қарқынын бәсеңдету;

мүше мемлекеттердің (оның ішінде олардың өңірлерінің) әлеуметтік-экономикалық даму жоспарларын есепке алу;  

мүше мемлекеттердің қолданылатын акциздер мөлшерлемелерінің түрлерін (адвалорлы, ерекше, аралас) дербес айқындау құқығын қамтамасыз ету;

акциздер мөлшерлемелерін белгілеу саласындағы мүше мемлекеттердің салық саясатының транспаренттілігі мен алдын ала болжамдылығы негізінде жүзеге асырылады.

1. Темекі өніміне акциздер мөлшерлемелерін үйлестіру (жақындастыру) жөніндегі шараларды іске асыру:

акциздердің бірыңғай индикативтік мөлшерлемесі (бұдан әрі – индикативтік мөлшерлеме);

индикативтік мөлшерлеме деңгейіне қол жеткізудің 5 жылдық кезеңі;

акциздердің нақты мөлшерлемелерінің индикативтік мөлшерлемеден ауытқу диапазонын белгілеу жолымен жүзеге асырылады.

Индикативтік мөлшерлеме мен ауытқу диапазондары 2024 жылдан бастап әрбір 5 жыл сайын осы бапта көзделген тәртіппен бекітіледі.

2. Темекі өніміне акциздердің нақты мөлшерлемелері мүше мемлекеттердің заңнамасында белгіленеді және акциздің ерекше және (немесе) адвалорлық бөлігінің жиынтық сомасы болып табылады.

3. Индикативтік мөлшерлеме мүше мемлекеттің бюджет жылының 1-ші күніндегі еуро бағамына баламалы тиісті ұлттық валютасымен белгіленеді.

4. Мүше мемлекеттер индикативтік мөлшерлемені қолдану мерзімі аяқталғанға дейін 2 жылдан кешіктірмей 2024 жылдан бастап құзыретіне салық саясаты және әкімшілік жүргізу мәселелері кіретін Еуразиялық экономикалық комиссия Алқасы жанындағы консультативтік орган (бұдан әрі – Комиссия) шеңберінде индикативтік мөлшерлемені қолданудың келесі мерзіміне темекі өніміне акциздер мөлшерлемелерін үйлестіру (жақындату) жөніндегі шаралар туралы ұсыныстар әзірлейді.

Мүше мемлекеттермен келісілген темекі өніміне арналған индикативтік мөлшерлеменің мөлшерін және ауытқу диапазондарын Комиссия Кеңесі бекітеді.

5. Темекі өніміне арналған индикативтік мөлшерлеменің мөлшерін және ауытқу диапазондарын өзгертудің негізделген экономикалық орындылығы болған кезде, сондай-ақ евроға қатысты мүше мемлекеттердің ұлттық валюталарының бағамдары 15 проценттен астам өзгерген жағдайда, Комиссия Кеңесі кез келген мүше мемлекеттің бастамасы бойынша тиісті көрсеткіштерді өзгерту туралы шешім қабылдауға құқылы.

1. Мүше мемлекеттер 2024 жылы ұлттық валютада 1000 дана үшін 35,0 евроға баламалы мөлшерде темекіге қатысты индикативтік мөлшерлемені қолданады.

2. Мүше мемлекеттерде сигареттерге қолданылатын акциздердің нақты мөлшерлемелері 2024 жылы осы баптың 1-тармағында көрсетілген индикативтік мөлшерлемеден – аз жағына және көп жағына 20 проценттен аспайтын мөлшерде ауытқуы мүмкін.

1. Мүше мемлекеттердің темекі өніміне акциздер мөлшерлемелерін үйлестіру (жақындастыру) жөніндегі шараларды іске асыру үшін Комиссия темекі өніміне акциздер мөлшерлемелеріне қатысты қысқа, орта және ұзақ мерзімді салық саясаты мәселелері бойынша консультациялар беруді және үйлестіруді жүзеге асырады, сондай-ақ мүше мемлекеттердің темекі өніміне акциздердің индикативтік мөлшерлемесіне қол жеткізуін мониторингілеуді жүзеге асырады.

2. Мүше мемлекеттер жыл сайын, 1 тамызға дейін Комиссияға мүше мемлекеттердің заңнамасына сәйкес бекітуге жоспарланған кезекті күнтізбелік жылға (бюджет кезеңіне) арналған темекі өніміне акциздер мөлшерлемелері туралы ақпаратты, сондай-ақ бар болған жағдайда, орта және ұзақ мерзімді кезеңдерге арналған бекітуге жоспарланған акциздер мөлшерлемелері туралы ақпаратты табыс етеді.

3. Комиссия осы баптың 2-тармағына сәйкес алынған ақпарат анализінің нәтижелері бойынша оны осы Келісімнің 3-бабының 4 және 5-тармақтарында белгіленген тетікті іске асыру үшін мүше мемлекеттерге жібереді.

Егер Комиссияға хабарлағаннан кейін мүше мемлекеттердің бірі темекі өніміне акциз мөлшерлемелерін өзгерту туралы шешім қабылдаған жағдайда, акциздердің жаңа мөлшерлемелері туралы ақпарат тиісті акт күшіне енген күнге дейін күнтізбелік 60 күннен кешіктірмей комиссияға және мүше мемлекеттерге жіберіледі.

Осы Келісімде ешнәрсе:

мүше мемлекеттің қауіпсіздігі мүдделеріне қайшы келетін талап ретінде қарастырылуы мүмкін, кез келген мүше мемлекетке темекі өніміне акциздер мөлшерлемелерін белгілеу талабы;

кез келген мүше мемлекеттің темекі өніміне акциздер мөлшерлемелерін белгілеуіне қатысты нормативтік құқықтық акт қабылдау арқылы өзінің қауіпсіздігі мүдделерін қорғау үшін қажет деп есептейтін іс-әрекеттерді қолдануына кедергі жасау ретінде түсіндірілмеуге тиіс.

Одақтың кедендік аумағында темекі өнімін акциздер мен басқа да жанама салықтарды төлемей сатуды болдырмау мақсатында мүше мемлекеттер өздерінің уәкілетті органдары арасындағы әкімшілік ынтымақтастықтың тәртібін (оның ішінде одақ шеңберінде тиісті келісімдер жасасу жолымен) айқындайды.

Осы Келісімнің ережелері мүше мемлекеттердің олар қатысушылары болып табылатын халықаралық шарттардан туындайтын құқықтары мен міндеттемелерін қозғамайды.

1. Осы Келісімді түсіндіруге және (немесе) қолдануға байланысты даулар 2014 жылғы 29 мамырдағы Еуразиялық экономикалық одақ туралы Шартта айқындалған тәртіппен шешіледі.

2. Мүше мемлекеттердің өзара келісімі бойынша осы Келісімге бөлек хаттамалармен ресімделетін өзгерістер мен толықтырулар енгізілуі мүмкін.

3. Осы Келісім одақ шеңберінде жасалған халықаралық шарт болып табылады және одақтың құқығына кіреді.

4. Осы Келісім, депозитарий дипломатиялық арналар арқылы мүше мемлекеттердің осы Келісімнің күшіне енуі үшін қажетті мемлекетішілік рәсімдерді орындағаны туралы соңғы жазбаша хабарламаны алған күнінен бастап күшіне енеді.

______ жылы «___» _________ _______ қаласында орыс тіліндегі бір төлнұсқа данада жасалды.

Осы Келісімнің төлнұсқа данасы Еуразиялық экономикалық комиссияда сақталады, ол осы Келісімнің депозитарийі бола отырып, әрбір мүше мемлекетке оның куәландырылған көшірмесін жібереді.

Армения Республикасы үшін

Беларусь Республикасы үшін

Қазақстан Республикасы үшін

Қырғыз Республикасы үшін

Ресей Федерациясы үшін