Документ на казахском языке

«Бюджеттік бағдарламалар әкімшілері мен бюджетті атқару жөніндегі жергілікті уәкілетті органдардың шоғырландырылған қаржылық есептілікті жасау қағидаларын бекіту туралы» Қазақстан Республикасы Қаржы министрінің 2016 жылғы 6 желтоқсандағы № 640 бұйрығына өзгерістер мен толықтырулар енгізу туралы Қазақстан Республикасы ПремьерМинистрінің орынбасары - Қаржы министрінің 2023 жылғы 26 мамырдағы № 543 бұйрығы. Қазақстан Республикасының Әділет министрлігінде 2023 жылғы 29 мамырда № 32604 болып тіркелді

БҰЙЫРАМЫН:

1. «Бюджеттік бағдарламалар әкімшілері мен бюджетті атқару жөніндегі жергілікті уәкілетті органдардың шоғырландырылған қаржылық есептілікті жасау қағидаларын бекіту туралы» Қазақстан Республикасы Қаржы министрінің 2016 жылғы 6 желтоқсандағы № 640 бұйрығына (Нормативтік құқықтық актілерді мемлекеттік тіркеу тізілімінде № 14624 болып тіркелген) мынадай өзгерістер мен толықтырулар енгізілсін:

кіріспе мынадай редакцияда жазылсын:

«Қазақстан Республикасы Бюджет кодексінің 118, 120-1, 120-2 және 120-3-баптарына сәйкес және «Мемлекеттік статистика туралы» Қазақстан Республикасы Заңының 16-бабы 3-тармағының 2) тармақшасын іске асыру мақсатында БҰЙЫРАМЫН:»;

көрсетілген бұйрықпен бекітілген Бюджеттік бағдарламалар әкімшілері мен бюджетті атқару жөніндегі жергілікті уәкілетті органдардың шоғырландырылған қаржылық есептілікті жасау қағидаларында:

3-тармақ мынадай редакцияда жазылсын:

«3. Осы Қағидаларда мынадай негізгі ұғымдар қолданылады:

1) аудан (облыстық маңызы бар қала) бюджетінің және аудандық (облыстық маңызы бар қала) бюджеттің, аудандық маңызы бар қала, ауыл, кент, ауылдық округ бюджеттерінің атқарылуы туралы шоғырландырылған қаржылық есептілік – бұл Қазақстан Республикасы Бюджет кодексінің (бұдан әрі – Бюджет кодексі) 120-3-бабына сәйкес бірыңғай ұйымның қаржылық есептілігі ретінде ұсынылған ауданның (облыстық маңызы бар қаланың), аудандық (облыстық маңызы бар қаланың) бюджеттің шоғырландырылған қаржылық есептілігі;

2) бюджеттi атқару жөнiндегi уәкiлеттi орган – бюджетті атқару, бухгалтерлiк есепті, бюджеттік есепті және республикалық бюджеттiң атқарылуы бойынша бюджеттiк есептiлiктi жүргiзу саласында басшылықты және салааралық үйлестіруді жүзеге асыратын орган;

3) бюджетті атқару жөніндегі жергілікті уәкілетті орган - жергілікті бюджеттен қаржыландырылатын, бюджетті атқару, бухгалтерлiк есепті, бюджеттік есепті және жергілікті бюджеттiң атқарылуы бойынша бюджеттiк есептiлiктi жүргiзу саласындағы функцияларды жүзеге асыратын жергілікті уәкілетті органдар (бұдан әрі – бюджеттi атқару жөнiндегi жергілікті уәкiлеттi орган);

4) бюджеттік бағдарламалар әкімшісінің шоғырландырылған қаржылық есептілігі – бұл бюджеттік бағдарламалар әкімшісінің және оған ведомстволық бағынысты мемлекеттік мекемелердің бірыңғай ұйымның қаржылық есептілігі ретінде ұсынған қаржылық есептілігі;

5) ведомство – бюджетті атқару жөніндегі орталық уәкілетті органның республикалық бюджетті атқару және жергілікті бюджеттердің атқарылуына қызмет көрсету саласындағы функцияларды жүзеге асыратын ведомствосы;

6) квазимемлекеттік сектор субъектілеріне инвестициялар – бұл мемлекеттік кәсіпорындарға, жауапкершілігі шектеулі серіктестіктерге, акционерлік қоғамдарға, оның ішінде құрылтайшысы, қатысушысы немесе акционері мемлекет болып табылатын ұлттық басқарушы холдингтерге, ұлттық холдингтерге, ұлттық компанияларға, сондай-ақ Қазақстан Республикасының заңнамалық актілеріне сәйкес еншілес, тәуелді және олармен үлестес болып табылатын өзге де заңды тұлғаларға салынатын бюджет қаражатының салымдары;

7) облыстық бюджеттің, республикалық маңызы бар қалалардың, астананың бюджеттерінің атқарылуы туралы шоғырландырылған қаржылық есептілік – бұл Бюджет кодексінің 120-2-бабына сәйкес бірыңғай ұйымның қаржылық есептілігі ретінде ұсынылған облыстық бюджеттің, республикалық маңызы бар қалалардың, астананың бюджеттерінің атқарылуы туралы шоғырландырылған қаржылық есептілік;

8) республикалық бюджетті атқару жөніндегі шоғырландырылған қаржылық есептілік – бұл Бюджет кодексінің 120-1 бабына сәйкес бірыңғай ұйымның қаржылық есептілігі ретінде ұсынылған ведомствоның және республикалық бюджеттік бағдарламалар әкімшілерінің қаржылық есептілігі;

9) элиминирлеу – бюджеттік бағдарламалар әкімшісі және оның ведомстволық бағынысты мемлекеттік мекемелері арасындағы немесе бір бюджеттік бағдарламалар әкімшісіне ведомстволық бағынысты мемлекеттік мекемелер арасындағы, бюджеттік бағдарламалар әкімшілері арасындағы бюджеттік бағдарламалар әкімшісі мен бюджет кірістерінің есебін жүргізетін уәкілетті орган арасында, өзара операциялар бойынша тең соманы, сондай-ақ жоғары тұрған және төмен тұрған бюджеттерді атқару жөніндегі уәкілетті органдар арасындағы операцияларды алып тастау.

Республикалық және жергілікті бюджеттердің атқарылуы туралы шоғырландырылған қаржылық есептілікті жасау мақсаты мүдделі адамдарды қаржылық қызметтің нәтижелері мен республикалық және жергілікті бюджеттердің қаржылық жағдайының өзгерістері, қаржылық жағдайы туралы толық және дұрыс ақпаратпен қамтамасыз ету болып табылады.»;

11-тармақ мынадай редакцияда жазылсын:

«11. Шоғырландырылған қаржылық есептiлiкті республикалық бюджеттiк бағдарламалар әкiмшiлерi, облыстық бюджетті, республикалық маңызы бар қала, астана бюджеттерін, аудан (облыстық маңызы бар қала) бюджетін, аудандық (облыстық маңызы бар қала) бюджетті атқару жөніндегі жергілікті уәкілетті органдар нысандардың толық көлемінде электрондық түрде бюджетті атқару жөніндегі уәкілетті органның ақпараттық жүйесі (бұдан әрі – АЖ) арқылы ұсынады. Есепті беру күні оны АЖ арқылы беру күні болып есептеледі.

Республикалық бюджеттік бағдарламалардың әкімшілері мен жергілікті уәкілетті органдар ведомствода белгіленген мерзімде ведомствоға жартыжылдық және жылдық шоғырландырылған қаржылық есептілікті ұсынады. Республикалық және жергілікті бюджеттік бағдарламалар әкімшілерінің жылдық шоғырландырылған қаржылық есептілігінің мерзімі есепті жылдан кейінгі жылдың 8 ақпанынан кешіктірілмей, ал жергілікті уәкілетті органдары үшін есепті жылдан кейінгі жылдың 25 ақпанынан кешіктірілмей белгіленеді.

Жергiлiктi бюджеттiк бағдарламалар әкiмшiлерi шоғырландырылған қаржылық есептiлiктi нысандардың толық көлемінде электрондық түрде АЖ арқылы ұсынады.»;

12-тармақтың бесінші бөлігіне орыс тілінде өзгерістер енгізіледі, қазақ тіліндегі мәтін өзгермейді;

13-тармақ мынадай редакцияда жазылсын:

«13. Бюджеттік бағдарламалар әкімшісінің шоғырландырылған қаржылық есептілігіне бірінші қол қою құқығына осы органның басшысы не оны алмастыратын тұлға, немесе мемлекеттік орган аппаратының басшысы, екінші қол қою құқығына – бас бухгалтер немесе қаржылық есептілікті шоғырландыруды қамтамасыз ететін бөлімшені басқаратын тұлға ие.

Республикалық бюджетті атқару туралы шоғырландырылған қаржылық есептілікке бірінші қол қою құқығына ведомство басшысы, немесе оны алмастыратын тұлға, екінші қол қою құқығына – ведомствоның қаржылық есептілікті шоғырландыруды қамтамасыз ететін құрылымдық бөлімшенің басшысы немесе оны алмастыратын тұлға ие.

Жергілікті бюджеттің атқарылуы туралы шоғырландырылған қаржылық есептілікке бірінші қол қою құқығына жергілікті бюджетті атқару жөніндегі уәкілетті органның басшысы, немесе оны алмастыратын тұлға, екінші қол қою құқығына – қаржылық есептілікті шоғырландыруды қамтамасыз ететін құрылымдық бөлімшенің басшысы немесе оны алмастыратын тұлға ие.

Ақпараттық жүйе арқылы есептілікті ұсынатын республикалық бюджеттік бағдарламалардың әкімшілерін қоспағанда, қаржылық есептілікке есептілікте бірінші және екінші қол қою құқығы туралы бұйрықтың көшірмесі қоса беріледі.

Ұсынылатын шоғырландырылған қаржылық есептіліктің барлық нысандарында мемлекеттік органның басшысы мен бас бухгалтерінің не қаржылық есептілікті шоғырландыруды қамтамасыз ететін құрылымдық бөлімшені басқаратын тұлғаның қолының қасында міндетті түрде қолдың толық жазылуы (тегі мен аты-жөні) көрсетіледі.»;

19-тармақ мынадай редакцияда жазылсын:

«19. Бюджеттік бағдарламалар әкімшісінің шоғырландырылған қаржылық есептілігіне ескертулер болған және өзгерістер енгізу қажет болған кезде бюджетті атқару жөніндегі уәкілетті орган АЖ-да қабылдамау себептерін көрсете отырып, тиісті өзгерістер енгізу үшін шоғырландырылған қаржылық есептілікті қабылдамай қайтарады.

Бюджеттік бағдарламалардың әкімшісі АЖ арқылы жіберілген ескертулерге сәйкес немесе жазбаша хабарлама негізінде жазбаша хабарламаны алған сәттен немесе АЖ-да қайтарылған күннен бастап 10 (он) жұмыс күні ішінде өзінің шоғырландырылған қаржылық есептілігіне өзгерістер енгізеді. Ведомстволық бағынысты мемлекеттік мекеменің қаржылық есептілігі өзгерген кезде бюджеттік бағдарламалардың әкімшісі тиісті ведомстволық бағынысты мемлекеттік мекемені жазбаша хабардар етеді және өзгерістер мен толықтырулар бойынша ұсыныстарды оның жеке қаржылық есептілігіне 10 (он) жұмыс күні ішінде енгізу үшін қайта жібереді.»;

21-тармақ мынадай редакцияда жазылсын:

«21. Бюджеттік бағдарламалар әкімшілерінің шоғырландырылған жылдық қаржылық есептілігі «Ашық бюджеттердің интернет-порталында ақпаратты орналастыру және бюджеттік бағдарламалардың жобаларын (бюджеттік бағдармаларды іске асыру туралы есептерді) жария талқылау қағидаларын бекіту туралы» Ақпарат және қоғамдық даму министрінің 2021 жылғы 30 сәуірдегі № 149 бұйрығымен бекітілген (Нормативтiк құқықтық актілерді мемлекеттік тiркеу тiзiлiмiнде № 22682 болып тіркелген).»;

22-тармақтың үшінші бөлігінің он сегізінші абзацына орыс тілінде өзгерістер енгізіледі, қазақ тіліндегі мәтін өзгермейді;

32-тармақ мынадай редакцияда жазылсын:

«32. ШҚЕ-3 «Ақша қозғалысы туралы шоғырландырылған есеп (тікелей әдіс)» нысанының баптары бойынша есепті кезеңдегі қызмет түрлері бойынша ақша қаражатының түсімдері мен шығулары бойынша ақпарат:

Жәбірленушілерге өтемақы қоры бойынша ақша түсімдері мен жүргізілген төлемдер туралы ақпарат;

Білім беру инфрақұрылымын қолдау қоры бойынша ақша түсімдері мен жүргізілген төлемдер туралы ақпарат;

ШҚЕ-5 «Шоғырландырылған қаржылық есептілікке түсіндірме жазба» нысанының 24-кестесіне сәйкес бюджеттен тыс шоттар бойынша ақша қаражатының қозғалысы туралы ақпарат беріледі.»;

42-тармақ мынадай редакцияда жазылсын:

«42. «Қаржылық қызмет нәтижелері туралы жылдық шоғырландырылған есеп» ЖШҚЕ-8 нысанының баптарын шоғырландыру ШҚЕ-2 «Қаржылық қызмет нәтижелері туралы шоғырландырылған есеп» нысанының кірістер мен шығыстардың ұқсас баптарын жолма-жол қосу жолымен жүзеге асырылады.

«Ағымдағы қызметті қаржыландыру» (жол коды 011), «Күрделі салымдарды қаржыландыру» (жол коды 012), «Трансферттер бойынша кірістер» (жол коды 014), «Субсидиялар» (жол коды 016) баптары бойынша ағымдағы қызметті қаржыландыру, күрделі салымдар, трансферттер, субсидиялар бойынша қаржыландырудан түскен кірістер сомалары алынып тастауға жатады.

«Қарыздар түсімдерінен түсетін кірістер» бабы (жол коды 013) бойынша сыртқы қарыздар бойынша міндеттемелер қабылдаудан алынатын шығыстар сомасы алынып тастауға жатады.

«Бюджетке трансферттер түсімі» бабы (жол коды 020-3) бойынша бюджетпен есеп айырысулар бойынша есептелген шығыстар сомасына кірістер сомасы (төмен тұрған бюджеттерден өткен жылдардың трансферттерін қайтару жөнінде) алынып тастауға жатады. Аудиторлық органдар жүргізген тексерулер нәтижесінде трансферттердің қайтарымы бюджеттің кірісі болып табылады.

«Айырбас операциялардан алынатын кірістер» бабы (жол коды 021) бойынша тауарларды, жұмыстарды, көрсетілетін қызметтерді, оның ішінде мемлекеттік материалдық резервтен тауарларды, жұмыстарды, көрсетілетін қызметтерді, оның ішінде мемлекеттік материалдық резервтен тауарларды өткізуден, республикалық бюджеттен қаржыландырылатын мемлекеттік мекемелерге бекітілген қару-жарақтар мен әскери техникаларды, мүлікті және сомалары есепті кезеңде салықтық емес түсімдердің кодтарына республикалық бюджет кірісіне аударылған басқа да активтерді сатудан бюджетпен есеп айырысулар бойынша есептелген шығыстардың сомасына бюджетке салықтық емес түсімдерден түсетін кірістер сомасы алынып тастауға жатады.

«Сыйақылар» бабы (жол коды 031) бойынша есепті кезеңде республикалық бюджет кірісіне аударылған кредиттер мен депозиттер жөнінде сыйақылар бойынша бюджетпен есеп айырысулар бойынша есептелген шығыстар сомасына бюджетке салықтық емес түсімдерден кірістер сомасы алынып тастауға жатады.

«Активтерді басқарудан алынатын өзге де кірістер» бабы (жол коды 032) бойынша мемлекеттік меншіктен алынған кірістер (қатысу үлестері, дивидендтер, мемлекеттік кәсіпорындардың таза кірісі, жалдау ақысы) бойынша бюджетпен есеп айырысулар жөнінде есептелген шығыстар сомасына бюджетке салықтық емес түсімдерден алынатын кірістер және есепті кезеңде республикалық бюджет кірісіне аударылған активтерді басқарудан алынатын өзге кірістердің сомасы алынып тастауға жатады.

«Өзге кірістер» бабы (жол коды 040) бойынша бюджеттік бағдарламалар әкімшілері арасында ұзақ мерзімді активтер мен қорларды өтеусіз алудан түскен кірістер сомасы алынып тастауға жатады. Бұдан басқа, мемлекеттік мекемелердің ұзақ мерзімді активтерімен және қорларымен орталықтандырылған жабдықтаудан түскен кірістер сомасы, республикалық бюджеттің бюджеттік бағдарламалар әкімшілері арасындағы кредиторлық және дебиторлық берешекті өтеусіз қабылдап алу-беру бойынша кірістер сомасы алынып тастауға жатады.

«Өзге операциялық шығыстар» бабы (жол коды 122) бойынша тауарларды, жұмыстарды, қызметтерді өткізуден, қару-жарақтар мен әскери техниканы, республикалық бюджеттен қаржыландырылатын мемлекеттік мекемелерге бекітілген мемлекеттік материалдық резервтен тауарларды, республикалық меншіктегі заңды тұлғалардың бағалы қағаздарының қатысу үлестерін және басқа да активтерді сатудан бюджетпен есеп айырысу бойынша есептелген шығыстардың, сондай-ақ активтерді басқарудан түсетін кірістер мен сомасы есепті кезеңде республикалық бюджет кірісіне аударуға жататын басқа да кірістер бойынша сома алынып тастауға жатады.