1. Қазақстан Республикасы Мұнай және газ министрлігінің Мұнай-газ кешеніндегі мемлекеттік инспекциялау комитеті құрылсын.

2. Қоса беріліп отырған:

1) Қазақстан Республикасы Мұнай және газ министрлігі туралы ереже;

2) Қазақстан Республикасы Мұнай және газ министрлігінің қарамағындағы ұйымдардың тізбесі;

3) Қазақстан Республикасы Үкіметінің кейбір шешімдеріне енгізілетін өзгерістер бекітілсін.

3. Қазақстан Республикасы Мұнай және газ министрлігі заңнамада белгіленген тәртіппен:

1) өнімді бөлу туралы келісімге және осы қаулыны іске асыруға бағытталған өзге де ілеспе құжаттарға тиісті өзгерістер енгізуді қамтамасыз етсін;

2) осы қаулыдан туындайтын өзге де қажетті шараларды қабылдасын.

4. Қазақстан Республикасы Қаржы министрлігі Қазақстан Республикасы Мұнай және газ министрлігімен бірлесе отырып, заңнамада белгіленген тәртіппен осы қаулыны іске асыру жөнінде шаралар қабылдасын.

5. Осы қаулыға қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.

6. Осы қаулы қол қойылған күнінен бастап қолданысқа енгізіледі.

Қазақстан Республикасының 

Премьер-Министрі                                    К. Мәсімов

1. Қазақстан Республикасы Мұнай және газ министрлігі (бұдан әрі - Министрлік) мұнай-газ, мұнай-химия өнеркәсібі, көмірсутек шикізатын тасымалдау салаларында мемлекеттік саясатты қалыптастыруды, басқару процесін үйлестіруді жүзеге асыратын Қазақстан Республикасының орталық атқарушы органы болып табылады.

Министрліктің мынадай ведомствосы бар — Мұнай-газ кешеніндегі мемлекеттік инспекциялау комитеті.

2. Министрлік өз қызметін Қазақстан Республикасының Конституциясына, Қазақстан Республикасының заңдарына, Қазақстан Республикасы Президентінің, Үкіметінің актілеріне, өзге де нормативтік құқықтық актілерге, сондай-ақ осы Ережеге сәйкес жүзеге асырады.

3. Министрлік мемлекеттік мекеменің ұйымдық-құқықтық нысанындағы заңды тұлға болып табылады, өзінің атауы мемлекеттік тілде жазылған мөрлері мен мөртаңбалары, белгіленген үлгідегі бланкілері, сондай-ақ заңнамаға сәйкес Қазақстан Республикасы Қаржы министрлігінің Қазынашылық органдарында шоттары болады.

4. Министрлік мемлекеттің атынан көмірсутек шикізатын барлауды, өндіруді және бірлескен барлау мен өндіруді жүргізуге келісімшарттар жасасады, олардың шарттарын жер қойнауын пайдаланушылардың орындауына мониторинг пен бақылауды жүзеге асырады.

5. Министрлік өз атынан азаматтық-құқықтық қатынастарға түседі.

6. Министрліктің, егер оған заңнамаға сәйкес осындай уәкілеттік берілген болса, мемлекет атынан іс-қимыл жасауға құқығы бар.

7. Министрлік өз құзыретіндегі мәселелер бойынша заңнамада белгіленген тәртіппен Министрдің бұйрығымен ресімделетін шешімдер қабылдайды.

8. Министрліктің штат санының лимитін ведомстволық бағынысты мемлекеттік мекемелердің штат санын ескере отырып, Қазақстан Республикасының Үкіметі бекітеді.

9. Министрліктің заңды мекенжайы:

010000, Астана қаласы, Есіл ауданы, Қабанбай батыр даңғылы, 19.

10. Министрліктің толық атауы - «Қазақстан Республикасы Мұнай және газ министрлігі» мемлекеттік мекемесі.

11. Осы Ереже Министрліктің құрылтай құжаты болып табылады.

12. Министрліктің қызметін қаржыландыру республикалық бюджеттен жүзеге асырылады.

13. Министрліктің функциялары болып табылатын міндеттерді орындау тұрғысында Министрлікке кәсіпкерлік субъектілерімен шарттық қатынастарға түсуге тыйым салынады.

14. Министрліктің өз қызметі саласындағы негізгі міндеттері:

1) мұнай-газ, мұнай-химия өнеркәсібі, көмірсутек шикізатын тасымалдау салаларындағы мемлекеттік саясатты әзірлеуге және іске асыруға қатысу;

2) мұнай-газ, мұнай-химия өнеркәсібі, көмірсутек шикізатын тасымалдау және магистралдық құбыржол көлігі салаларында салааралық үйлестіруді жүзеге асыру;

3) көмірсутек шикізаты бөлігінде отын-энергетика кешенін дамытуды қамтамасыз ету;

4) көмірсутек ресурстарын, оның ішінде Каспий теңізі қайраңының қазақстандық бөлігінде бірлескен игеру мәселелері бойынша халықаралық ынтымақтастықты жүзеге асыру;

5) ілеспе газды қоса алғанда, көмірсутек ресурстарын молайтуды және оларды ұтымды пайдалануды қамтамасыз ету;

6) өнімді бөлу туралы келісімдерден туындайтын өкілетті органның құзыреттерін жүзеге асыруды қамтамасыз ету болып табылады.

15. Министрлік қолданыстағы заңнамаға және өзіне жүктелген міндеттерге сәйкес мынадай функцияларды жүзеге асырады:

1) мұнай-газ, мұнай-химия өнеркәсібі, көмірсутек шикізатын тасымалдау салаларындағы мемлекеттік саясатты іске асырады;

2) өз құзыретінің шегінде техникалық регламенттерді қоспағанда, бағдарламалық құжаттарды, нормативтік құқықтық актілерді, мұнай-газ саласындағы нормативтік-техникалық құжаттарды әзірлейді және бекітеді;

3) табиғи монополиялар және реттелетін нарықтар салаларында басшылықты жүзеге асыратын мемлекеттік органмен бірлесе отырып, тарифтерді (бағаларды, алым ставкаларын) немесе олардың шекті деңгейлерін, тарифтік сметаларды бекіту кезінде ескерілетін инвестициялық бағдарламаларды және (немесе) инвестициялық жобаларды бекітеді;

4) көмірсутек шикізатын пайдалану бөлігінде шын мәнінде ұлттық отын-энергетика теңгерімдерін әзірлеуге қатысады;

5) мемлекеттік статистикалық есептіліктің нысандарын әзірлейді және мемлекеттік статистика саласындағы уәкілетті органның келісімімен көмірсутек шикізаты бөлігінде отын-энергетика ресурстарын өндіру мен тұтынудың көлемі мен номенклатурасы және меншік нысанына қарамастан, кәсіпорындар мен ұйымдар үшін оларды пайдаланудың тиімділік көрсеткіштері туралы, сондай-ақ ілеспе газды жағу көлемдері бойынша мемлекеттік статистикалық есептілікті жүргізуді қамтамасыз етеді;

6) конкурсқа, оның ішінде ұлттық компанияның үлестік қатысуымен шығарылатын блоктардың тізбесі бойынша Қазақстан Республикасының Үкіметіне ұсыныстар дайындайды;

7) келісімшарттың орындалу мүмкіндігін, мұнай экспорты үшін олардың аумақтарында құбыржолдар мен басқа да тасымалдау құралдарын салуды және пайдалануды қамтамасыз ететін басқа мемлекеттердің тиісті органдарымен Қазақстан Республикасы Үкіметінің тапсырмасы бойынша келіссөздер жүргізеді және келісімдер жасасады;