1. Жарғылық капиталына мемлекет жүз пайыз қатысатын «Қазақстандық индустрияны дамыту институты» акционерлік қоғамы (бұдан әрі - Қоғам) құрылсын.

2. Мыналар Қоғам қызметінің негізгі бағыттары болып айқындалсын:

индустриялық саясат, қазақстандық өндірістерді жаңғырту және әртараптандыру, өнеркәсіптің өңдеуші секторларында бәсекеге қабілеттілікті арттыру және инновацияларды енгізу саласында зерттеулер жүргізу;

өнеркәсіпті дамытудың теориялық, әдіснамалық және практикалық мәселелеріне зерттеулер жүргізу;

өнеркәсіп салаларын қайта құрылымдаудың және салааралық кооперацияны дамытудың экономикалық факторларына зерттеулер жүргізу, өнеркәсіптегі қайта құрылымдауды және салааралық кооперацияны ынталандыру мен қолдау жөнінде шаралар әзірлеу;

өндірістерді әртараптандырудың экономикалық факторларына зерттеулер жүргізу және кластерлерді дамыту, өндірістерді әртараптандыруды ынталандыру мен қолдау және кластерлерді дамыту жөнінде шаралар әзірлеу;

жаңа өндірістерді құрудың техникалық-экономикалық негіздемелерін және оларды аумақтық орналастыру схемаларын әзірлеу, инвестициялық жобалар бойынша сараптамалық қорытындылар әзірлеу, өңірлік өндірістік жүйелер мен өнеркәсіп инфрақұрылымын құрудың және дамытудың тұжырымдамасын әзірлеу;

Қазақстанның өнеркәсіп салаларының сегменттерін әлемдік өндірістік-шаруашылық жүйелеріне кіріктіруді қамтамасыз ету жөнінде, өнеркәсіп саласындағы халықаралық ынтымақтастықты дамыту жөнінде ұсыныстар дайындау;

мемлекеттік органдардың өнеркәсіпті дамыту мәселелері бойынша заң жобаларын, салалық бағдарламаларды, мастер жоспарлар мен іс-шаралар жоспарларын әзірлеуге қатысу;

өнеркәсіпті дамытудың экономикалық көрсеткіштерін бағалау мен олардың мониторингі үшін әдістемелер мен практикалық басшылықтар әзірлеу;

өндірістерді оңтайлы орналастыру, кластерлерді дамыту, арнайы экономикалық және индустриялық аймақтар құру жөнінде ұсыныстар дайындау;