Автомобиль көлiгiмен қауіптi жүктердi тасымалдау жөнiндегi кейбiр мәселелер туралы Қазақстан Республикасы Үкіметінің 2004 жылғы 12 наурыздағы N 316 қаулысы

" Автомобиль көлiгi туралы " 2003 жылғы 4 шiлдедегі және " Автомобиль жолдары туралы " 2001 жылғы 17 шiлдедегі Қазақстан Республикасының Заңдарына сәйкес Қазақстан Республикасының Үкiметi қаулы етеді:

1. Қоса берiлiп отырған Автокөлiк құралдарымен қауiптi жүктердi тасымалдау, олардың Қазақстан Республикасының аумағы бойынша жүрiп өту ережесi және қауіпті жүктердi тасымалдайтын жүргiзушiлер мен автокөлік құралдарына қойылатын бiлiктiлік талаптар бекiтiлсiн.

2. Қоса берiліп отырған Қазақстан Республикасы аумағында автокөлiк құралдарымен тасымалдауға жiберiлген қауіпті жүктердiң тiзбесi бекiтілсiн.

3. Осы қаулы қол қойылған күнiнен бастап күшiне енедi.

Қазақстан Республикасының 

Премьер-Министрі

1. Осы Автокөлiк құралдарымен қауiптi жүктердi тасымалдау, олардың Қазақстан Республикасының аумағы арқылы жүрiп өту ережесi және қауiптi жүктердi тасымалдайтын жүргiзушiлер мен автокөлiк құралдарына қойылатын бiлiктiлiк талаптары (бұдан әрi - Ереже) Қазақстан Республикасының "Автомобиль көлiгi туралы" 2003 жылғы 4 шiлдедегi, "Автомобиль жолдары туралы" 2001 жылғы 17 шiлдедегi Заңдарына және Қазақстан Республикасының өзге де нормативтік құқықтық кесiмдерiне сәйкес әзiрленген. 

2. Ереженiң әрекетi қауiптi жүктердің тасымалына байланысты заңды және жеке тұлғаларға қолданылады. 

3. Тасымалдау, тиеу-түсiру жұмыстарын жүргiзу және сақтау кезінде олардың өзiндiк ерекшелiгiне байланысты техникалық құралдардың, құрылғылардың, ғимараттар мен құрылыстардың жарылысына, өрт шығуына немесе бүлiнуiне, сондай-ақ адамдардың, жануарлардың өлiм-жiтімiне, жарақат алуына және ауруына себеп болуы, қоршаған табиғи ортаға зиян келтiруi мүмкiн кез-келген заттар, материалдар, бұйымдар, өндiрiс және өзге де қызмет қалдықтары қауiптi жүктер деп танылады. 

4. Қауiптi жүктердi тасымалдау кезiнде қолданыстағы стандарттарға сәйкес қауiптi жүктердiң жiктемесi қолданылады.

5. Қауiптi жүктердi тасымалдау көлiк саласындағы уәкiлеттi орган беретiн лицензияның негiзiнде жүзеге асырылады. 

6. Қазақстан Республикасының аумағы бойынша қауiптi жүктердiң тасымалын жүзеге асыратын көлiк құралдарының жүргiзушiлерi және қауiптi жүктердiң тасымалы үшiн пайдаланатын автокөлiк құралдары осы Ереженiң 3 және 4-бөлiмдерiнде жазылған бiлiктiлiк талаптарына сай болуы тиiс. 

7. Қауiптi жүктер мамандандырылған автокөлiк құралдарымен немесе осы мақсатқа бейiмделген басқа көлiк құралдарымен тасымалданады. 

8. Қауіпті жүктердi тасымалдау кезiнде тиiстi уәкiлеттi орган берген нақты қауіпті жүкпен қызметтi жүзеге асыруға лицензияның (рұқсаттың) болуы талап етiледi. 

9. Лицензияның (рұқсаттың) болуы туралы белгі қауiпті жүктi тасымалдау бағытының бланкісіне қойылады (3-қосымша). 

10. Қауiптi жүктер тасымалы жүк жөнелтушi (жүк қабылдаушы) мен тасымалдаушы арасында Қазақстан Республикасының заңнамасына сәйкес жасалған шарттың негізiнде жүзеге асырылады. 

Қауіпті жүктердi тасымалдауға арналған шарт өзiндiк ерекшелiктерiне байланысты мынадай: 

1) автокөлiк құралдарын арнайы өңдеу жөнiндегi іс-шаралар туралы; 

2) iлесiп жүрудi ұйымдастыру (қажеттi жағдайда) туралы; 

3) жүргiзушiлердi жеке қорғану құралдарымен қамтамасыз ету тәртібi туралы; 

4) қауiп туралы ақпарат жүйесiнiң элементтерiмен қамтамасыз ету тәртiбi туралы мәлiметтердi қамтуы тиiс. 

11. Қауiпті жүктердi тасымалдау шарты көлiк жүк құжатымен расталады. 

Көлiк жүк құжаты үш данада жасалады және оған жүк жөнелтуші мен тасымалдаушы қол қояды. 

12. Көлiк жүк құжатында мыналар: 

1) жасалған орны және күнi; 

2) жөнелтушiнiң, тасымалдаушының және алушының атаулары (аттары) мен заңды мекен-жайы; 

3) жүктi тасымалдауға қабылдау орны мен күнi және оны тапсырудың көзделген орны; 

4) қауiпті жүктiң БҰҰ қабылдаған нөмiрiнiң белгiленуi, оны ораудың саны мен тәсiлi (ыдыс, контейнер); 

5) жүк орнының саны, олардың ерекше белгiсi мен нөмiрi; 

6) жүктiң брутто салмағы немесе жүктiң басқаша айтылатын өлшеу бiрлiгіндегi саны; 

7) бастапқы әрiптерi - "ҚЖЖТ" (қауiптi жүктердiң жол тасымалы); 

8) тасымалдауға байланысты шығыстар (алып жүру төлемi, қосымша шығыстар, кедендік баждар мен алымдар, сондай-ақ шарт жасасқан сәттен бастап жүктi тапсыруға дейiнгі өзге де шығындар); 

9) тасымалдау кезiнде қабылдайтын алдын ала сақтық шаралары туралы ақпарат көрсетiлуi тиiс. 

13. Жүк жөнелтуші тасымалдаушыға қауiптi жүктердi тасымалдауға жасалған шартпен бiрге мыналарды: 

1) әрбiр автокөлiк құралына ақпарат кестесiн; 

2) қауiптi жүктiң әрбiр түрiне жүргізушiге арналған нұсқаулықты; 

3) тасымалданатын қауiптi жүкпен қызметтi жүзеге асыруға арналған лицензияны (рұқсатты) ұсынады. 

Көрсетiлген құжаттар жол полициясы органдарымен тасымалдау бағытын келiсу мақсатында, тасымалдау шарты жасалғаннан кейiн, бiрақ тасымал басталғанға дейiн 5 күннен кешiктiрiлмей ұсынылуы мүмкiн. 

14. Қауiптi жүктердi тасымалдау бағытын әзiрлеудi тасымалдаушы жүзеге асырады. 

Тасымалдау бағытын әзiрлеген кезде тасымалдаушы мынадай негiзгi талаптарды басшылыққа алуы тиiс: 

1) бағыт маңында iрi өнеркәсiп объектiлерi болмауы тиiс; 

2) бағыт iрi елдi мекендер арқылы өтпеуі тиiс. Қауiптi жүктердi iрi елдi мекендер пункттерiнiң iшiмен тасымалдау қажет болған жағдайда бағыт ойын-сауық, мәдени-ағарту, оқу, мектепке дейiнгi және емдеу мекемелерінің қасынан өтпеуi тиiс; 

3) тасымалдау бағытында көлiк құралдарының тұрақ орны ескерiлуi тиiс. 

15. Бағыт бiр облыстың шегiнде өтетiн кезде тасымалдау бағыты осы облыста орналасқан жол полициясының бөлiмшелерiмен келiсiледi.