Документ на казахском языке

«Лифтілердің қауіпсіздігіне қойылатын талаптар» техникалық регламентін бекіту туралы Қазақстан Республикасы Үкіметінің 2010 жылғы 3 наурыздағы № 172 Қаулысы

«Техникалық реттеу туралы» Қазақстан Республикасының 2004 жылғы 9 қарашадағы Заңын іске асыру мақсатында Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған «Лифтілердің қауіпсіздігіне қойылатын талаптар» техникалық регламенті бекітілсін.

2. Осы қаулы алғаш рет ресми жарияланған күнінен бастап алты ай өткен соң қолданысқа енгізіледі.

Қазақстан Республикасының

Премьер-Министрі К. Мәсімов

Қазақстан Республикасы Үкіметінің 2010 жылғы 3 наурыздағы № 172 қаулысымен бекітілген

«Лифтілердің қауіпсіздігіне қойылатын талаптар» техникалық регламенті 1. Қолданылу саласы

1. Осы «Лифтілердің қауіпсіздігіне қойылатын талаптар» техникалық регламенті (бұдан әрі - Техникалық регламент) лифтілерге және олардың тіршілік циклінің үдерісіне қойылатын талаптарды белгілейді.

2. Осы Техникалық регламенттің әрекеті: Қазақстан Республикасының аумағында айналымға шығарылатын лифтілерге, лифтілердің қауіпсіздігі құрылғысына; пайдалануға енгізілетін лифтілерге; қолданыстағы лифтілерге; қызмет көрсету мерзімі өткен лифтілерге; осы Техникалық регламент қолданысқа енгізілгенге дейін пайдалануға енгізілген лифтілерге; пайдаланудан шығарылуға жататын лифтілерге қолданылады.

3. Осы Техникалық регламенттің әрекеті тау-кен және көмір өнеркәсібі шахталарында, кемелерде және өзге де жүзетін құралдарда, теңізде барлауға және бұрғылауға арналған платформаларда, ұшақтарда және ұшатын аппараттарда орнатылған лифтілерге қолданылмайды.

4. Лифтілерді бірдейлендіру Қазақстан Республикасы Сыртқы экономикалық қызметінің тауар номенклатурасы (бұдан әрі - ҚР СЭҚ ТН) кодтарын пайдалану жолымен, осы Техникалық регламентке 1-қосымшада келтірілген, таңбалау және ілеспе құжаттар бойынша (өзіне нормативтік және техникалық құжаттаманы қамтитын), белгілері мен өлшемдері, жиынтығында айырып тану үшін жеткілікті болатын көрсеткіштері мен талаптары бойынша жүргізіледі.

5. Сақтануды қажет ететін негізгі қауіпті факторлар (қатерлер) мыналар болып табылады:

1) лифтілердің қорғалмаған жылжымалы элементтері;

2) шу мен дірілдің жоғары деңгейі;

3) электр тізбектегі кернеудің қауіпті деңгейі және оның жолаушыларға, лифтінің қызмет көрсетуші персоналына, лифт қауіпсіздігін қамтамасыз ететін құрылғыға әсер ету мүмкіндігі;

4) лифтінің өрт қауіпті және жарылыс қауіпті элементтері;

5) лифт кабинасын дайындау кезінде улы материалдарды қолдану;

6) қауіптілік өлшемдері лифтіні жобалау кезінде анықталады және жобалық құжаттамада көрсетіледі.

Қатерлерді азайту жобалау, дайындау, монтаждау, сынау, пайдалану, жөндеу сатыларында жүзеге асырылуы тиіс.

2. Терминдер мен анықтамалар

6. Осы Техникалық регламентте техникалық реттеу және өнеркәсіптік қауіпсіздік саласындағы заңнамада белгіленген терминдер мен анықтамалар, сондай-ақ тиісті анықтамаларымен мынадай терминдер қолданылады:

1) бағыттаушылар - кабина, қарсы салмақ немесе теңгерімді жүк қозғалысын бағыттайтын конструкцияның қатты элементтері;

2) бір жолғы дайындалған лифт (қауіпсіздік құрылғысы) - бір данада дайындалған жабдық;

3) буфер - жылжып келе жатқан кабинаның кабина (қарсы салмақпен) ең шеткі жұмыс жағдайына ауысқан кезде жарақат алу немесе жабдықтың сыну қаупін төмендететін деңгейге дейін баяулау көлемін шектеуге арналған құрылғы;

4) диспетчерлік бақылау құрылғысы - лифт жұмысын қашықтықтан бақылауға және диспетчермен байланыста болуды қамтамасыз етуге арналған техникалық құрал;

5) жұмыс алаңы — лифт шахтасында стационарлы орнатылған және лифт жабдықтарын жөндеу мен оларға қызмет көрсету жөніндегі жұмыстарды орындайтын персоналды орналастыруға арналған құрылғы;

6) жылдамдықты шектегіш - кабина (қарсы салмақ) ұстағыштарын кабина қозғалысы (қарсы салмақ) жылдамдығы белгіленген мөлшерден артқан кезде әрекетке келтіруге арналған құрылғы;

7) қауіпсіздік гидроаппараты - гидроцилиндрмен тығыз байланысты және кабинаның құлауының алдын алуға арналған гидравликалық құрылғы;

8) қызмет көрсету аймағы - осы жабдыққа қызмет көрсететін персонал орналасатын лифт жабдықтарымен қатар бос алаң;

9) лифт - ғимараттар мен құрылыстарда бір деңгейден екіншісіне тік бағытқа қисаю бұрышы 15^о артық болмайтын қатты бағыттаушы бойымен қозғалатын кабинада адамдарды және (немесе) жүктерді тасымалдауға арналған құрылғы;

10) лифт қауіпсіздігінің құрылғысы - лифтіні қауіпсіз пайдалануды қамтамасыз етуге арналған техникалық құрал;

11) лифтіні жаңғырту - пайдаланудағы лифтілердің техникалық деңгейі мен қауіпсіздігін Техникалық регламентте белгіленген деңгейге дейін арттыру жөніндегі іс-шаралар;

12) лифт паспорты - дайындаушы, лифтіні дайындау мерзімі мен оның зауыттық нөмірі туралы мәліметтерді, негізгі техникалық деректерді және лифт пен оның жабдықтарының сипаттамаларын, қауіпсіздік құрылғылары туралы, лифтінің тағайындалған қызмет көрсету мерзімі туралы мәліметтерді құрайтын құжат;

13) лифтіге техникалық қызмет көрсету - лифтіні пайдалану кезіндегі жұмысқа қабілеттілігін және оның қауіпсіздігін сүйемелдеу жөніндегі операциялар кешені;

14) лифтіні жартылай техникалық куәландыру - құрылымына өзгерістер енгізген немесе лифт желісін және (немесе) механизмін ауыстырған кезде пайдаланудағы лифт сәйкестігін бағалау;

15) лифтіні кезеңді техникалық куәландыру - пайдаланудағы лифтіні техникалық жағдайын бағалау;

16) лифтіні пайдалану - тағайындалуы бойынша пайдалануды, қарауды, техникалық қызмет көрсетуді, лифтіні жөндеуді қамтитын тіршілік айналымының сатысы;

17) лифтіні пайдалануға енгізу - лифтінің тағайындалуы бойынша пайдалануға дайындығын және құжаттамалық ресімделуін тіркейтін оқиға;

18) лифтілердің типті өлшемді қатарының типті өкілі - техникалық құжаттамасы сындарлы шешімдердің біркелкілігін сақтау мен қауіпсіздіктің ұқсас құрылғысын пайдалану шартында осы Техникалық регламент талаптарын орындау туралы лифтілердің типті өлшемді қатарына кіретін ақпараты бар лифт;

19) лифтіні толық техникалық куәландыру - жөнделген лифтінің сәйкестігін бағалау;

20) атаулы жылдамдық - лифт қауіпсіздігінің барлық параметрлерінің сақталуы қамтамасыз етілетін жылдамдық;

21) өрт кезінде өрт сөндірушілерді тасымалдауды қамтамасыз ететін лифт (өрт сөндірушілерге арналған лифт) - адамдарды құтқару, тұтану ошақтарын табу мен сөндіру жөніндегі жұмыстарды орындау үшін өрт сөндірушілерді ғимараттардың (құрылыстардың) қабаттарына көшіруді қамтамасыз ететін жолаушы лифті;

22) пайдаланылатын қауіпсіздік талаптары - лифтінің (қауіпсіздік құрылғысы) тағайындалуы мен оны пайдалану шарттарын ескере отырып анықталатын сақталуы міндетті қауіпсіздік талаптары;

23) ұстағыштар — жылдамдық белгіленген шамадан жоғарылаған кезде кабинаны (қарсы салмақты) бағыттаушыларда жетектің тартқыш элементтері үзілген немесе жылдамдықты тоқтатуға және ұстап тұруға арналған құрылғы;

24) шахта есігінің құлпы - шахта есігін жабуға арналған құрылғы.

3. Қазақстан Республикасының нарығындағы айналым шарттары

7. Лифтілер, егер осы Техникалық регламент талаптарына сәйкес болмаса және адам денсаулығына, өмірі мен қоршаған ортаға залал тигізуі мүмкін болса, нарықта сатылмайды.

8. Нарыққа түсетін және Қазақстан Республикасында пайдалануға берілетін лифтілер тұтынушы құжаттамада белгіленген талаптарды орындаған кезде, дайындаушы белгілеген барлық пайдалану мерзімі ішінде қауіпсіздік талаптарына жауап беруі тиіс.

9. Лифтілердің тұтынушыларына ілеспе құжаттамада көрсетілген толық және анық ақпарат ұсынылады.

10. Іліспе құжаттама мыналарды қамтуы тиіс:

1) лифт паспорты;

монтаждау сызбасы;

схема элементтерінің тізбесі және жалғанулардың монтажды электр схемасы бар принципті электр схемасы;

лифт сертификатының көшірмесі, өртке қарсы есіктер және лифтінің басқа элементтері;

лифтіні қолдануға рұқсаттың көшірмесі;

2) пайдалану жөніндегі нұсқаулық, құрамында:

лифтінің қысқаша сипаттамасы;

лифтіні қауіпсіз пайдалану талаптары мен шарттары;

кезек сайын қарау жүргізу, техникалық қызмет көрсету, жөндеу, лифтіні техникалық диагностикалау тәртібі;

адамдарды кабинадан қауіпсіз шығарудың әдістемесі;

жылдам тозатын бөлшектердің тізбесі бар;

3) лифтінің қызмет мерзімі туралы нұсқау:

монтаждау жөніндегі нұсқаулық;

қосалқы бөлшектер мен керек-жарақтар ведомосі - лифтіге тапсырыс беруші оны жеткізуге келісім-шарт жасау кезінде анықтайтын, жеткізілім жиынтығына енгізілуі мүмкін, қосалқы бөлшектер, құрал-саймандар, керек-жарақтар және материалдар туралы мәліметтерді құрайтын ведомость;

лифтіні жеткізу жиынтығына енгізілген, іске қосуды реттеу жұмыстарына арналған қосалқы бұйымдар жиынтығының ведомосі;

лифтімен қоса берілетін құжаттамалар тізбесі.

Лифтілер, оның ішінде басқа елдерден жеткізілетін лифтілер мемлекеттік және орыс тілдеріндегі құжаттамамен жасақталуы тиіс.

11. Әр лифтінің «Буып-түюге, таңбалауға, затбелгі жапсыруға және оларды дұрыс түсіруге қойылатын талаптар» техникалық регламентін бекіту туралы» Қазақстан Республикасы Үкіметінің 2008 жылғы 21 наурыздағы № 277 қаулысының талаптарына сәйкес жүргізілетін айырымдық таңбасы болуы тиіс.

12. Лифтілердің, жекелеген жинақтау бірліктерінің мемлекеттік және орыс тілдерінде анық және өшірілмейтін таңбасы болуы тиіс.

4. Лифтілерге қойылатын қауіпсіздік талаптары

13. Лифт қауіпсіздігін қамтамасыз ету үшін лифтіні жобалау, дайындау, монтаждау, пайдалану және кәдеге жарату кезінде қорғаныс құрылғылары, лифтінің тағайындалуын есепке алумен қауіпсіздікті қамтамасыз ететін бұғаттау көзделуі тиіс.

14. Қауіпсіздікті қамтамасыз ету үшін мынадай жалпы талаптар орындалуы тиіс:

1) лифтінің сипаттамалары осы Техникалық регламентке 2-қосымшада белгіленген талаптарға сәйкес келуі тиіс;

2) лифтінің шахтасында машиналық, блоктық үй-жайында және орнатылған лифт жабдығы пайдаланушылар мен бөтен адамдарға тікелей қолжетімді болмауы тиіс;

3) пайдаланушылар мен бөтен адамдарды лифт жабдығының жылжитын бөліктерімен соқтығысу нәтижесінде жарақат алудан (кесілу, жаншылу, жарақаттану және дене зақымдары) қорғау бойынша шаралар көзделуі тиіс;

4) егер шахта есігі ашық немесе жабылмаған болса, жабдыққа техникалық қызмет көрсетуге арналған есік, авариялық есік, қарау және авария люктерінің қақпағы, кабина есігі жабылмаған болса, кабина қозғалысын тоқтататын немесе болдырмайтын қорғаныс құрылғылары, бұғаттау көзделуі тиіс. Бұл талап кабинаның қабат алаңына жақындаған кезінде автоматты есіктерді алдын ала ашуға және лифт конструкциясында көзделген тиеу/босату кезінде кабинаның қабат алаңы деңгейіне дейін жету режиміне қолданылмайды;

5) кабинаны персоналдың бақылауымен ауыстырумен немесе кабинаны ауыстырмай эвакуациялау тәсілдерімен тоқтап қалған кабинадан адамдарды эвакуациялау мүмкіндігі көзделуі тиіс;

6) пайдаланушылар мен өзге адамдар үшін қол жетімді лифт жабдығының адамдарға қауіп төндіруі мүмкін бұдырлы беттері болмауы тиіс;

7) адамдарды тасымалдауға арналған кабинада оның ішінде электр желісінде бөгеліс кезінде жарықтандыруды қамтамасыз ететін құралдар көзделуі тиіс;

8) лифт жабдығы лифтіні пайдалану болжанатын климаттық, сейсмикалық жағдайларға сәйкес болуы тиіс;

9) ғимараттың (құрылыстың) қабаттық және шахтаға жанасатын алаңдарынан және кабинадан адамдардың шахтаға құлауын болдырмау жөніндегі шаралар көзделуі тиіс;

10) лифтінің есік саңылауының мөлшері кабинаға және одан қабат алаңына қауіпсіз кіру мен шығуды, кабинаға қауіпсіз тиеуді және босатуды қамтамасыз етуі тиіс;

11) қабат алаңының табалдырықтары мен кабиналары арасындағы көлденең және тік арақашықтық кабинаға қауіпсіз кіру мен одан шығуды қамтамасыз етуі тиіс;

12) кабина мен шахта конструкциясының элементтері арасындағы арақашықтық кабина қабат алаңы аймағында болғанда, шахта мен кабина есіктері ашық кезде шахтаға адамның кіріп кету мүмкіндігін болдырмауы тиіс;

13) кабина және (немесе) шахта есіктерінің автоматты жабылатын қозғалысы кезінде адамның немесе заттың жаншылу күшін жарақат алу қаупін төмендететін шекке дейін болдырмау немесе азайту жөніндегі шаралар көзделуі тиіс;

14) кабина, аспа және (немесе) кабина тірегі, оларды бекіту элементтері лифтіні пайдалану және сынау кезінде туындайтын жүктемеге төзімді болуы тиіс;

15) адамдарды тасымалдауға арналған лифт кабинасы кезекші персонал үшін үй-жаймен екі жақты сөйлесетін байланыспен жабдықталуы тиіс;

16) қалыпты жұмыс режимінде артық тиелген кабинаның іске қосылуын болдырмайтын шаралар көзделуі тиіс;

17) кабинаның шеткі жұмыс жағдайы шегінен (қабат алаңынан) тыс кетуін шектейтін құрылғылар көзделуі тиіс;

18) төмен қозғалған кезде кабинаның бастапқы жылдамдықтан артық кету шамасын болдырмайтын құрылғылар көзделуі тиіс;

19) тежеуіш құрылғылар, ұстауыштар мен буферлер олар іске қосылған кезде жарақат алу немесе жабдықтың сыну қаупін төмендететін шекке дейін кабинаның баяулауын шектеуі тиіс;

20) адамдар тасымалдауға арналған лифт кабинасының желдеткіші болуы тиіс;

21) жабдықтарға қызмет көрсетуге арналған жұмыс аймақтарының техникалық қызмет көрсету, жөндеу жөніндегі жұмыстарды және лифтінің қауіпсіздігін қамтамасыз ету жөніндегі өзге де техникалық іс-шараларды қауіпсіз орындауды қамтамасыз етуі тиіс;

22) персоналдың лифт жабдықтарына қауіпсіз кіруі қамтамасыз етілуі тиіс;

23) персоналдың шахтадағы жұмыс алаңына және (немесе) кабина төбесіне қауіпсіз кіруі мен одан шығуы қамтамасыз етілуі тиіс;

24) шахтадағы жұмыс алаңы және (немесе) кабина төбесі онда жүрген персоналдың салмағын көтеруі тиіс;

25) шахтадағы және (немесе) кабина төбесіндегі персоналдың жұмыс алаңынан құлау қаупін төмендететін шаралар көзделуі тиіс;

26) техникалық қызмет көрсетуді жүргізу кезінде тоқтату және персоналдың кабина қозғалысын басқаруы үшін басқару пульті көзделуі тиіс. Персоналдың шахта арқылы өтуі қажет болған кезде кабинада жөндеу және қызмет көрсету персоналының қозғалысын басқару және кабинаны тоқтату үшін басқару пульті көзделуі тиіс. Көрсетілген басқару пульті пайдаланушылар мен бөтен адамдар үшін қолжетімді болмауы тиіс;

27) лифт бөліктерінің бақыланбайтын қозғалысы кезінде лифт шахтасындағы персоналдың жарақаттануын болдырмауға арналған шаралар көзделуі тиіс;

28) лифт жабдықтарының элементтерімен белдікпен, шкивтермен, блоктармен, қозғалтқыштың шығыңқы білігімен, тегершіктермен, жұлдызшалармен, олардың қозғалысы кезінде жетекті шынжырлармен персоналдың жарақаттануын болдырмау жөніндегі шаралар көзделуі тиіс;

29) қызмет көрсету аймағын жарықтандыру көзделуі тиіс;

30) пайдаланушылардың, өзге де адамдар мен персоналдың лифтіні басқару аппараттарына ықпал еткен және (немесе) лифтінің металл құрылымдарына жанасқан кезде электр қауіпсіздігін қамтамасыз ету жөніндегі шаралар көзделуі тиіс;

31) кабина жоқ қабат шахтасының есігі ашылғаннан кейін тұрғын үй қоры ғимаратында орнатылған лифтіде, кабинаның іске қосылуын болдырмау үшін шаралар көзделуі тиіс;

32) шахта есіктерінің отқа төзімділік шегі ғимараттар мен құрылыстардың өрт қауіпсіздігі талаптарына сәйкес белгіленеді;

33) ғимаратта (құрылыста) өрт қаупі туындаған кезде жолаушылардың кабинадан қауіпсіз шығып кету мүмкіндігін қамтамасыз ететін шаралар көзделуі тиіс;

34) кабина купесінің конструкциясында пайдаланылатын жанғыштық, тұтанушылық, түтіндеуге қабілеттілік, жалын таратушылық, жану кезінде улылық көрсеткіштері бойынша өрт қауіптіліктің туындау қатерін төмендететін материалдар қолданылуы тиіс.

15. Кабинадағы дыбыс деңгейі белгіленген қозғалыс кезінде мыналардан аспауы тиіс:

1) барлық типті және түрдегі жолаушы және жүк қозғалыс-жолаушы лифтілері үшін 55 дБА-дан артық емес;

2) өндірістік ғимараттарда жолаушылар лифтілері үшін 70 дБА-дан артық емес.

16. Кабинадағы дыбыс деңгейі барлық типті және түрдегі жолаушы және жүк жолаушы лифтілері үшін есіктердің ашылуы және жабылуы кезінде 60 дБА-дан артық болмауы тиіс.

17. Кабина еденінің дірілді жылдамдығы белгіленген қозғалыс кезінде 0,06*10^-2 м/с артық болмауы тиіс.

18. Мүгедектер мен халықтың әл-ауқаты төмен тобы үшін қолжетімділікті қамтамасыз ететін лифтіде қауіпсіздікті қамтамасыз ету үшін мынадай талаптар орындалуы тиіс:

1) кабина мөлшері, кабина мен шахта есіктерінің ойығы кабинадан қауіпсіз кіріп-шығуды, сондай-ақ кабинада кресло-арба пайдаланушыны жайғастыруды қамтамасыз етуі тиіс;

2) кресло-арба пайдаланушыны алып жүрушісіз тасымалдауға арналған лифт кабинасы мен шахтаның есіктері автоматты түрде ашылуы және жабылуы тиіс;

3) лифт кабинасы орналасуы кабина мен басқару құрылғыларына пайдаланушының қол жеткізуін жеңілдететін, тым болғанда бір тұтқамен жабдықталуы тиіс;

4) кабина табалдырығы мен қабат алаңы арасындағы көлденең және тік арақашықтық кресло-арба пайдаланушының кабинаға қауіпсіз кіріп-шығуын қамтамасыз етуі тиіс;

5) лифт кабинасы мен қабат алаңындағы сигнал беру және басқару құрылғысының конструкциясы және оны орналастыру мүгедектер мен халықтың әл-ауқаты төмен басқа да тобына қауіпсіздікті және қолжетімділікті қамтамасыз етуі тиіс;

6) көрсетілген лифт сипаттамалары осы Техникалық регламентке 2-қосымшада белгіленген талаптарға сәйкес болуы тиіс.

19. Өрт кезінде өрт сөндірушілерді тасымалдауды қамтамасыз ететін лифтіде қауіпсіздікті қамтамасыз ету үшін мынадай талаптар орындалуы тиіс:

1) лифт кабинасының мөлшері мен жүк көтергіштігі өрт сөндірушілерді өртпен күресуге арналған және (немесе) өрт кезінде адамдарды құтқаратын құралдармен тасымалдауды қамтамасыз етуі тиіс;

2) басқару және дабыл беру жүйелері өрт сөндірушілердің лифт жұмысын тікелей басқаруымен қамтамасыз етуі тиіс. Лифтіні басқарудың басқа режимдері сөндірілген болуы тиіс;

3) лифтіні басқару режимі, онымен топтық басқару жүйесімен біріктірілген басқа лифтілердің жұмысына тәуелсіз қамтамасыз етілуі тиіс;

4) лифт кабинасы мен негізгі тиеу-босату (тағайындалған) қабатында кабинаның орналасқан орны мен оның қозғалысының бағыты туралы көзбен шолу ақпараты қамтамасыз етілуі тиіс;

5) отқа төзімділік деңгейі ғимараттардың (үй-жайлардың) өрт қауіпсіздігі талаптарына сәйкес белгіленетін, лифтілер шахталарының есіктері өртке қарсы болуы тиіс;

6) өрт сөндірушілерді қабат арасында тоқтап қалған кабиналардан шығару шаралары көзделуі тиіс;

7) көрсетілген лифт сипаттамалары осы Техникалық регламентке 2-қосымшада көрсетілген арнайы талаптарға сәйкес болуы тиіс.

20. Ғимаратта, құрылыста орнатылуға арналған лифт қауіпсіздігін қамтамасыз ету үшін, оның қауіпсіздігіне әсер ететін лифтілік жабдықтың қасақана бұзылуы мүмкін жағдайында мынадай талаптар орындалуы тиіс:

1) кабина купесін қоршайтын конструкция, сондай-ақ қабырға, төбе және еден қаптамасы оларды қасақана зақымдау немесе жағу қатерін төмендететін материалдардан жасалуы тиіс;

2) басқару, дабыл беру құралдары, кабина мен қабат алаңын жарықтандырудың конструкциясы болуы және қасақана бұзу немесе жағу қатерін төмендететін материалдардан орындалуы тиіс;

3) шахтаны тұтас қоршау көзделуі тиіс;

4) машиналық, блоктық үй-жайдың есіктері, приямка есіктері, машиналы үй-жайсыз лифтіні басқару құрылғысының есіктері (қақпақтары) ашылғаны туралы дабыл бергіш көзделуі тиіс;

5) көрсетілген лифтінің сипаттамалары осы Техникалық регламентке 2-қосымшада көрсетілген арнайы талаптарға сәйкес болуы тиіс.

21. Диспетчерлік бақылау құрылғысына қосылуға арналған лифтіде қауіпсіздікті қамтамасыз ету үшін келесі талаптар орындалуы тиіс:

лифтіден диспетчерлік бақылау құрылғысына оның жұмысы туралы келесі ақпараттарды беру мақсатында дабылды алып тастау үшін мүмкіндік қарастырылуы тиіс:

қауіпсіздіктің электр тізбегінің іске қосылуы туралы;

есіктердің рұқсат етілмей ашылуы туралы;

машиналы үй-жайсыз лифтіні басқару құрылғысы есіктерінің (қақпақтарының) ашылуы туралы.

5. Пайдалану және пайдаланудан шығару кезінде лифтіге қойылатын талаптар

22. Лифтіні пайдалану кезінде мынадай талаптар орындалуы тиіс:

1) лифт лифтімен қоса берілген пайдалану жөніндегі құжаттамаға сәйкес қаралуға, техникалық қызмет көрсетуге, жөнделуге және жетілдірілуге тартылуы тиіс;

2) лифтінің жетілдірілуі жоба бойынша жүргізілуі тиіс;

3) техникалық қызмет көрсету, жөндеу және лифтіні жетілдіру лифт иесінің лифт қызметімен және (немесе) мамандандырылған лифт ұйымымен жүзеге асырылуы тиіс.

Лифтіні қарау немесе диспетчерлік бақылау құрылғысы арқылы лифтіні бақылау лифт иесінің лифтілік қызметімен және (немесе) пайдаланатын және (немесе) мамандандырылған лифт ұйымымен жүргізіледі;

4) лифтіні лифт паспортында дайындаушы көрсеткен пайдалану мерзімі өткеннен кейін пайдалануға рұқсат берілмейді.

23. Лифтінің атаулы жүк көтергіштігі ең үлкен пайдалы алаңға байланысты белгіленуі және осы Техникалық регламентке 3-қосымшаның 1-кестесі деректеріне сәйкес болуы тиіс.

24. Кабинаның сыйымдылығы осы Техникалық регламентке 3-қосымшаның 2-кестесі деректеріне сәйкес, жолаушылардың саны бойынша немесе лифтінің атаулы жүк көтергіштік шамасын алынған нәтижені 75 санына келесі бүтін санға дейін жуықтай дөңгелектеп бөлумен анықталуы тиіс, мұндағы 75 кг - бір жолаушының алынған салмағы.

25. Лифт лифт иесінің лифтілік қызметінің персоналымен және (немесе) пайдаланатын және (немесе) мамандандырылған лифт ұйымымен:

1) толық техникалық куәландыруға - монтаждан кейін;

2) кезеңді техникалық куәландыруға - кемінде 12 айда бір рет;

3) ішінара техникалық куәландыруға:

қауіпсіздік құрылғыларын ауыстырғаннан немесе орнатқаннан;

редукторды, арқан жетекті шкивті, тежегіш құрылғыны, тарту арқандарын ауыстырғаннан немесе жөндегеннен;

принципті электр схемасын ауыстырғаннан;

басқару шкафын (құрылғысын) ауыстырғаннан кейін тартылады.

26. Пайдаланудан шығару кезінде мынадай талаптар орындалуы тиіс:

1) пайдаланудан шығару үшін лифтіні бөлшектеу мамандандырылған лифт ұйымымен жүргізілуі тиіс. Лифтіні бөлшектеу кезінде және бөлшектеуден кейін пайдаланушылар мен бөтен адамдардың машиналық, блоктық үй-жайға, шахта мен лифт кабинасына қол жетімділігін болдырмайтын шаралар қабылдануы тиіс;

2) лифтіні пайдаланудан шығару және оны бөлшектеу туралы ақпарат персоналға хабардар етілуі және лифт шахтасы есігінің маңындағы қабат алаңында орналастырылуы тиіс;

3) қайтадан пайдалануға арналмаған бөлшектелген жабдықтар пайдаланудан шығарылуы тиіс.

6. Сәйкестікті растау

27. Сәйкестікті растау «Сәйкестікті растау рәсімдері» техникалық регламентін бекіту туралы» Қазақстан Республикасы Үкіметінің 2008 жылғы 4 ақпандағы № 90 қаулысының талаптарына, сондай-ақ осы Техникалық регламент және пайдалану саласына лифтілер қатысты басқа да техникалық регламенттер талаптарына сәйкес және міндетті сертификаттау нысанында жүзеге асырылады.

7. Техникалық регламенттің қолданысқа енгізілу мерзімдері мен шарттары

28. Осы Техникалық регламенттің талаптарын орындау үшін қолданылатын стандарттау жөніндегі нормативтік құжаттар мен мемлекеттік органдардың өз құзыреті шегінде қалыптастырылатын өзге де құжаттары техникалық реттеу саласындағы Қазақстан Республикасы заңнамасымен белгіленген тәртіпте үйлестірілуге тиіс.

29. Орталық және жергілікті атқарушы органдар өз нормативтік құқықтық актілерін осы қаулымен бекітілген Техникалық регламентке сәйкес келтіруді, сондай-ақ олардың бейімделген енгізілуін қамтамасыз етсін.

30. Осы Техникалық регламент алғаш рет ресми жарияланған күнінен бастап алты ай өткен соң қолданысқа енгізіледі.

Техникалық регламентке 1-қосымша

Осы Техникалық регламенттің талаптары қолданылатын өнімдер тізбесі

Техникалық регламентке 2-қосымша

Лифт сипаттамаларына және қауіпсіздік құрылғыларына қойылатын талаптар

1. Сипаттамаларға қойылатын жалпы талаптар

1) жұмыстың пайдалану режимі кезінде адамдарды тасымалдауға рұқсат берілген лифт кабинасының автоматты түрде тоқтауының дәлдігі ± 0,035 м шегінде болуы тиіс;

2) шахта есіктері, кабина есіктері, кабина купесінің қабырғалары 15 мм артық емес серпімді өзгерумен, кез келген нүктеде тік бұрыш астына төселген оларды 5 см² шеңбер немесе шаршы алаң бойынша біркелкі бөлінген 300 Н-қа тең жүктемеге төзімді болуы тиіс. Бұл жағдайда қалдық өзгерісіне жол берілмейді;

3) адамдарды тасымалдауға рұқсат етілген шахта және лифт кабинасы есіктерінің жарыққа шығатын саңылау биіктігі 2,0 м кем болмауы тиіс;

4) механикалық жетекті шахтаның автоматты есігінің жабылуын болдырмау үшін қажетті күш 150 Н-тан артық болмауы тиіс.

Шахта есігінің кинетикалық энергиясы және онымен қатты байланысты элементтер, есіктердің жабылатын жақтауларының автоматты реверсирленуі қарастырылғанда немесе есік ойығында болғанында кедергіге әсер етуіне дейін жабылудың орташа жылдамдығы кезінде 10 Дж артық болмауы тиіс.

Реверс болмаған кезде шахта есігінің кинетикалық энергиясы және онымен қатты байланысты элементтер жабылудың орташа жылдамдығы кезінде 4 Дж артық болмауы тиіс. Жоғарыда аталған талаптар шахта және кабина есіктері өзара кинематикалық байланысқан конструкцияларға қолданылады;

5) адамдарды тасымалдауға рұқсат етілген лифт кабинасы купесінің еденінен конструкциясының төбесіне дейінгі биіктігі 2,0 м кем болмауы тиіс.

Бұл ретте конструкциялық төбеден төмен қарай 0,05 м-ге дейін шығыңқы элементтер (қабырға шам плафоны, сәндік элементтер) есептелмейді;

6) кабинадан шахта есігінің ашылу аумағында болған пайдаланушыларды еркін шығару мүмкіндігі көзделген лифтіде шахта есіктерін ашу күші 50 Н-тан кем және 300 Н-тан артық болмауы тиіс;

7) баяу тежелу ұстағыштарына немесе буферге атаулы жүгі бар кабинаны орнату кезіндегі орташа баяулау шамасы - 9,81 м/с² артық, жедел тоқтату ұстағыштарына - 25,0 м/с² артық болмауы тиіс. Баяушамасы оның 0,04 с-тан аспайтын уақыт жағдайында әсерінде 25,0 м/с² артық болмауы тиіс;

8) лифтілер электр жабдықтарының ток өткізгіш бөліктері ауыспалы токтың 42 В артық және тұрақты токтың 60 В артық кернеуінде болғанда жанасудан қорғалған, сақтандырғыш жазбаларымен белгіленген және арнайы таңбасы болуы тиіс;

9) лифтіні басқару, тізбегін қоректендіру, жарықтандыру, тасымалданатын аспапты қосуға арналған розетка, желдеткіш, екі жақты сөйлесу байланысының кернеуі 250 В артық болмауы тиіс.

Тасымалданатын лампа розеткалары тізбегінің қоректену кернеуі 42 В артық болмауы тиіс;

10) кабина қозғалысын жұмыстың пайдалану режимі кезінде барынша көп жылдамдату (азайту) үлкендігі мыналардан артық болмауы тиіс:

адамдарға арналған жолаушылар лифтілері және жүк тасымалы лифтілері үшін - 2 м/с²;

емдеу-сауықтыру мекемелеріне арналған жолаушылар лифтілері үшін - 1 м/с².

Кабинаның шұғыл тоқтаған кезінде орташа баяулау шамасы 9,81 м/с² артық болмауы тиіс;

11) лифт шахталарының өртке қарсы есіктерінің отқа төзімді шегі болуы тиіс.

2. Мүгедектер мен халықтың әл-ауқаты төмен тобы үшін қол жетімділікті қамтамасыз ететін лифтілердің сипаттамаларына қойылатын талаптар

1) шахта және кабина есіктері саңылауының жарыққа шығатын ені 800 мм кем болмауы тиіс;

2) қол жетекті кресло-арбаны пайдаланушы мүгедектердің қолжетімділігін қамтамасыз етуге арналған үшін кабина өлшемдері 1000 мм х 1250 мм (кабина ені х тереңдігі) кем болмауы тиіс;

3) шахта мен кабина есіктерінің толық ашылу сәтінен жабыла бастауына дейінгі уақыт ұзақтығы 2-20 с шамасында реттелуі тиіс;

4) лифт кабинасының қабат алаңы деңгейінде тоқтауының дәлдігі ± 20 мм шегінде болуы тиіс;

5) кабинаның жарықтандырылуы кабина едені деңгейінде және басқару аппараттарында 100 люкс-тен кем болмауы тиіс.

3. Өрт кезінде өрт сөндірушілерді тасымалдауды қамтамасыз ететін лифтілердің (өрт сөндірушілерге арналған лифт) сипаттамасына қойылатын талаптар

1) өрт сөндірушілерге арналған лифт шахталары есіктерінің отқа төзімділік шегі ЕІ 60 төмен болмауы тиіс.

Жалпы шахтада өрт сөндірушілерге арналған лифтілердің басқа жолаушылар лифтілерімен орналасуы кезінде шахтаның осы жолаушылар лифтілері есіктерінің отқа төзімділік шегі ЕІ 60 төмен болмауы тиіс;

2) кабина мен шахтаның есік саңылауының ені өрт сөндірушілер үшін 800 мм кем болмауы тиіс;

3) құтқарылатын адамдарды зембілде немесе кереуетте тасымалдауды қамтамасыз ететін өрт сөндірушілерге арналған лифтілер кабинасының едендері 1100 мм х 2100 мм кем емес өлшемді болуы тиіс;

4) лифт кабинасын ауыстыру м/с жылдамдығы Н/60, мұндағы Н - кабинаны көтеру биіктігі метрде, формуласы бойынша анықталатын үлкендіктен кем болмауы тиіс;

5) өрт сөндірушілерге арналған лифтінің жүк көтергіштігі 630 кг-дан кем болмауы тиіс;

6) өрт сөндірушілерге арналған лифтінің кабина шатырында жүккөтергіштігі 630 кг лифтілер үшін 0,4 м х 0,5 м кем емес және жүккөтергіштігі 1000 кг және одан артық лифтілер үшін 0,5 м х 0,7 м кем емес өлшемде люк жабдықталуы тиіс.

4. Ғимаратта, құрылыста орнатылуға арналған, оның қауіпсіздігіне әсер ететін лифтілік жабдықтың қасақана бұзылуы мүмкін лифт сипаттамасына қойылатын талаптар

1) шахта мен кабина есіктері автоматты түрде көлденең ысырылатын болуы тиіс;

2) шахта мен кабина есіктері бекіту элементтерін қоса, сондай-ақ кабина қабырғасы конструкция элементтерінің мен бұзылмауымен жеңіл соққы үшін маятникпен сыналуға және есіктердің қалыпты әрекетіне кедергі келтіретін қалдық деформацияға төзімді болуы тиіс. 45 ± 0,5 кг салмақты жеңіл маятниктің құлау биіктігі мынадай болуы тиіс:

біркелкі төмен әрекеттерге ұшырататын лифтілер үшін - 700 мм;

біркелкі күшті әрекеттерге ұшырататын лифтілер үшін - 1000 мм;

3) біркелкі күшті әрекеттермен зақымдалған лифтілер үшін қабат алаңы жағынан шахтаға кіруді болдырмайтын диаметрі 10 мм цилиндр құралы көзделуі тиіс;

4) басқару түймесі, басқару постылары және дабыл беру құрылғылары 0,2 м биіктіктен құлайтын, біркелкі күшті әрекеттерге ұшырататын лифтілер үшін және 1,0 м биіктіктен құлайтын, баяу бүлдіру әсеріне ұшырататын лифтілер үшін салмағы 1,0 кг соғу құрылғысының қатты бүлдіру әсерінен сыналуы тиіс;

5) басқару түймесі, басқару постылары және дабыл беру құрылғылары 40 мм биіктікте, баяу бүлдіру әсеріне ұшырататын лифтілер үшін 60 с ұзақтықта және қатты бүлдіру әсеріне ұшырататын лифтілер үшін 120 с ұзақтықта жалын тұтануға әсер ететін тұрақтылыққа сыналуы тиіс;

6) лифт кабиналары басқару және кабина едені деңгейінде аппараттарында жарықтандыруды кемінде 100 люкс қамтамасыз ететін стационарлы электр жарықтандыру жабдықтарының бүлдіру әсерінен қорғалған болуы тиіс.

Техникалық регламентке 3-қосымша

1-кесте

Лифтінің атаулы жүккөтергіштігі

Ескертпе:

1. Бір адамға арналған лифт минимумы.

2. Екі адамға арналған лифт минимумы.

3. 2500 кг-дан кейін әрбір келесі 100 кг 0,16 м² қосу керек. Жүктеменің аралық мәндері үшін алаң сызықтық интерполяция көмегімен анықталады.

2-кесте