Документ на казахском языке

"Инвестициялар туралы" Қазақстан Республикасының Заңын iске асырудың кейбiр мәселелерi туралы Қазақстан Республикасы Үкіметінің 2003 жылғы 8 мамырдағы N 436 қаулысы

Редакция 09.04.2015 жылы берілген өзгерістер мен толықтырулармен

"Инвестициялар туралы" Қазақстан Республикасының 2003 жылғы 8 қаңтардағы Заңын iске асыру мақсатында Қазақстан Республикасының Үкiметi қаулы етеді:

1. Қоса беріліп отырған:

1) инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған модельдік келісімшарт;

2) инвестициялық жобаларды іске асыруға арналған қызметтің басым түрлерінің тізбесі;

3) инвестициялар жөніндегі уәкілетті органның мемлекеттік органдардың мамандарын, консультанттар мен сарапшыларды тарту қағидалары бекітілсін.

2. Осы қаулы ресми жарияланған күнiнен бастап күшiне енедi.

Қазақстан Республикасының Премьер-Министрі

Қазақстан Республикасы Yкiметiнің 2003 жылғы 8 мамырдағы N 436 қаулысымен бекiтiлген

Инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған модельдік келісімшарт

Астана қаласы _________________

(күні, айы, жылы)

Осы Инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған келісімшарт, бұдан әрі Тараптар деп аталатын

_____________________________ негізінде әрекет ететін

(ереже немесе бұйрық)

_____________________________________________________________ атынан

(басшының немесе оның міндетін атқарушы адамның аты, әкесінің аты)

________________________________________(бұдан әрі — уәкілетті орган)

(уәкілетті органның атауы)

және ________________________________________ негізінде әрекет ететін

(Жарғы немесе сенімхат)_______________________________________ атынан

(басшының немесе өзге уәкілетті адамның тегі, аты, әкесінің аты)

__________________________________________ жобаны іске асыруды жүзеге асыратын (инвестициялық) (бұдан әрі - инвестор) арасында жасалды

_____________________________________________________________________

(Қазақстан Республикасының заңды тұлғасының атауы, мемлекеттік

тіркеу нөмірі, күні)

Мыналарды:

1) Қазақстан Республикасының Конституциясына негізделген Қазақстан Республикасының инвестициялар туралы заңнамасы қызметтің басым түрлерінде жаңа өндірістерді құру, жұмыс істеп тұрғандарын кеңейту және жаңарту мақсатында қолайлы инвестициялық ахуал жасауға бағытталғанын;

2) уәкілетті органға тікелей инвестициялық келісімшартты жасасумен және орындалуын бақылаумен байланысты құқықтар берілгенін;

3) уәкілетті орган және инвестор

_____________________________________________________________________

инвестициялық жобаның атауы

іске асыру кезінде олардың өзара құқықтары мен міндеттерін реттейтіні туралы уағдаласқандарын назарға ала отырып, уәкілетті орган және инвестор төменде көрсетілгендер туралы осы инвестициялық келісімшартты жасасты.

1. Негізгі ұғымдар

1. Осы инвестициялық келісімшартта пайдаланылатын негізгі ұғымдар:

1) инвестициялық келісімшарт — инвестицияларды жүзеге асыруды және инвестициялық преференциялар беруді көздейтін инвестициялық жобаны іске асыруға арналған шарт;

2) кірістер - пайданы, дивидендті және басқа да сыйақыларды қоса алғанда, олар төленетін нысанға қарамастан инвестициялық немесе онымен байланысты қызметтен алынатын кірістер;

3) материалдық емес активтер - жиынтық жылдық кірісті алу үшін ұзақ мерзімді кезең ішінде (бір жылдан астам) пайдаланылатын материалдық емес объектілер;

4) форс-мажор - инвестициялық келісімшарттың одан әрі орындалу барысын қиындататын немесе оған мүмкіндік бермеуге әкеп соғатын еңсерілмейтін күш мән-жайлары (әскери қақтығыстар, табиғи апаттар, дүлей зілзалар және тағы басқалары);

5) үшінші тұлға - инвестициялық келісімшарт бойынша Тарап болып табылмайтын кез келген тұлға;

6) жұмыс бағдарламасы - өндіріс пайдалануға берілгенге дейін инвестициялық жобаны іске асыру жөніндегі жұмыстардың күнтізбелік кестесін, сондай-ақ өндіріс пайдалануға берілгеннен кейін жобаның негізгі өндірістік көрсеткіштерін айқындайтын инвестициялық шартқа 1-қосымша;

7) инвестициялық басым жоба - тізбесін Қазақстан Республикасының Үкіметі бекіткен белгілі бір қызметтің басым түрлері бойынша жаңадан құрылған заңды тұлға іске асыратын және республикалық бюджет туралы заңда белгіленген және инвестициялық преференциялар беруге арналған өтінім берілген күні қолданыста болатын айлық есептік көрсеткіштің екі миллион еселенген мөлшерінен кем емес мөлшердегі инвестицияларды жүзеге асыруды көздейтін инвестициялық жоба;

8) инвестициялық субсидия - инвестициялық басым жобаны іске асыруға арналған инвестициялық келісімшарт жасасқан Қазақстан Республикасының заңды тұлғасына етеусіз және қайтарылмайтын негізде инвестициялық преференция ретінде берілетін бюджеттік субсидияның түрі.

2. Осы бөлімде түсіндірмесі жоқ ұғымдардың «Инвестициялар туралы» 2003 жылғы 8 қаңтардағы Қазақстан Республикасының Заңында (бұдан әрі - Заң) және инвестициялық преференциялар мәселелерін реттейтін басқа да нормативтік құқықтық актілердегі ұғымдарға сәйкес келетін мағынасы бар.

2. Инвестициялық келісімшарттың мәні

3. Осы инвестициялық келісімшарттың мәні инвесторға инвестициялық жоба шеңберінде Қазақстан Республикасының инвестициялар туралы заңнамасында көзделген инвестициялық преференциялар беру болып табылады.

4. Инвесторға:

1) инвестициялық жоба (оның ішінде инвестициялық басым жоба)бойынша инвестициялық преференциялардың мынадай түрлері беріледі:

технологиялық жабдықты және олардың жинақтауыштарын импорттау кезінде осы инвестициялық келісімшартқа 2-қосымшаға сәйкес ____________ мерзімге кедендік баждар салудан босату;