Этил спиртін өндірудің технологиялық желілерін спирт өлшейтін аппараттармен, алкоголь өнімін (шарап материалынан және сырадан басқа) өндіруді - уәкілетті органға нақты уақыт режимінде өндіру көлемі туралы деректерді автоматты түрде беруді қамтамасыз ететін есептеуші бақылау аспаптарымен жарақтау жөніндегі талаптарды, сондай-ақ олардың жұмыс істеуін және этил спирті мен алкоголь өнімінің есепке алынуын жүзеге асыруды бақылау тәртібін бекіту туралы Қазақстан Республикасы Үкіметінің 2012 жылғы 12 қаңтардағы № 30 Қаулысы

«Этил спирті мен алкоголь өнімінің өндірілуін және айналымын мемлекеттік реттеу туралы» Қазақстан Республикасының 1999 жылғы 16 шілдедегі Заңының 3-1-бабының 1) тармақшасына сәйкес Қазақстан Республикасының Үкіметі ҚАУЛЫ ЕТЕДІ: 

1. Қоса беріліп отырған Этил спиртін өндірудің технологиялық желілерін спирт өлшейтін аппараттармен, алкоголь өнімін (шарап материалынан және сырадан басқа) өндіруді – уәкілетті органға нақты уақыт режимінде өндіру көлемі туралы деректерді автоматты түрде беруді қамтамасыз ететін есептеуші бақылау аспаптарымен жарақтау жөніндегі талаптарды, сондай-ақ олардың жұмыс істеуін және этил спирті мен алкоголь өнімінің есепке алынуын жүзеге асыруды бақылау тәртібі бекітілсін.

2. Осы қаулы алғашқы ресми жарияланғанынан кейін күнтізбелік он күн өткен соң қолданысқа енгізіледі.

Қазақстан Республикасының Премьер-Министрі                           К. Мәсімов

1. Осы Этил спиртін өндірудің технологиялық желілерін спирт өлшейтін аппараттармен, алкоголь өнімін (шарап материалынан және сырадан басқа) өндіруді – уәкілетті органға нақты уақыт режимінде өндіру көлемі туралы деректерді автоматты түрде беруді қамтамасыз ететін есептеуші бақылау аспаптарымен жарақтау жөніндегі талаптарды, сондай-ақ олардың жұмыс істеуін және этил спирті мен алкоголь өнімінің есепке алынуын жүзеге асыруды бақылау тәртібі (бұдан әрi – Қағидалар) этил спирті мен алкоголь өнімін өндіруге бақылауды жүзеге асыру мақсатында «Этил спирті мен алкоголь өнімінің өндірілуін және айналымын мемлекеттік реттеу туралы» Қазақстан Республикасының 1999 жылғы 16 шілдедегі Заңының 3-1-бабының 1) тармақшасына сәйкес әзiрлендi.

2. Этил спиртін немесе алкоголь өнімін өндіруші ұйымдарда осы Қағидаларда көрсетілген жұмыстарды жүзеге асыру үшін этил спирті мен алкоголь өнімінің өндірілуін және айналымын мемлекеттік реттеу саласындағы уәкілетті мемлекеттік органдардың (бұдан әрі – уәкілетті органдар) қызметкерлері уәкілетті мемлекеттік орган басшысының тиісті бұйрығымен (бұдан әрі – бұйрық) жіберіледі. Бұйрық этил спиртін немесе алкоголь өнімін өндіруді жүзеге асыратын ұйымның өтініші негізінде өтініш келіп түскен күннен бастап күнтізбелік 30 күннен кешіктірмейтін мерзімде қабылданады. Бұйрықта этил спиртін немесе алкоголь өнімін өндіруді жүзеге асыратын ұйымның атауы және іссапарға жіберу кезеңі көрсетіледі. Этил спиртін немесе алкоголь өнімін өндіруді жүзеге асыратын ұйымның талап етуі бойынша бұйрықтың көшірмесі ұсынылады.

3. Спирт және этил спиртінiң (бұдан әрі – спирт) бас фракциясының өндiрісі үздіксіз өлшеуді және аппараттардың есептеуіштеріне мынадай деректерді беруді жүргізетін аппараттармен жарақтандырылады:

1) өндiрiлетiн спирттiң көлемi және спиртометрикалық механизм арқылы көлемдiк көрсеткiшті сусызға түрлендіру немесе олардың мәндерiн алған ақпаратты индикаттауға шығару жолымен алынған сусыз спирттiң мөлшері туралы;

2) спиртометрикалық механизмді қолданбай спирттiң бас фракциясының көлемi туралы.

Спирттiң өлшем бiрлiгi + 20Со температура кезiндегi сусыз спирт декалитрі (бұдан әрі – дал) болып табылады.

4. Спирт пен спирттiң бас фракциясын есепке алуға арналған аппараттар спирттің ұрлануын болдырмау мақсатында олардың қызмет көрсету және бақылау жүргiзу мүмкiндігі ескеріле отырып, орналастырылады.

5. Аппарат боза айыратын (боза айдайтын) қондырғы тұрған үй-жайда немесе онымен аралас үй-жайда, аппаратқа барлық жақтан еркiн бару қамтамасыз етiле отырып және көлемдiк және сусыз есептеуiштердiң көрсеткiштерi анық көрiнетiндей қарау шамынан кейін спирт желiсiнде орнатылады.

Аппарат спирттi бiр сағат, ауысым, тәулiк және одан жоғары мерзімде боза айыру және боза айдау барысына бақылау жасау үшiн қызмет көрсетедi. Спирт өлшейтін аппараттардың дұрыс жұмыс iстеуiн қамтамасыз ету үшiн спирт өндiрiстерiнде спирттiң температурасын тұрақтандыратын жүйе орнатылады. Сусыз спирт мөлшерiн есепке алуда өлшегiш және өлшеу аппараты бойынша салыстырмалы +/– 0,5% жоғары қателікке жол берілмейді.

6. Аппарат мынадай талаптарға сай келедi:

1) спирттiк, сулы спирттiк ерiтiндi және құрамында қанты бар қоймалжың ортада жұмыстың тұрақтылығы;

2) жұмыстың температуралық режимi 0-ден +40 С дейiн;

3) тексеру аралығы аппаратты жұмысқа қосу кезінен бастап кемінде 6 ай;

4) аппараттың құрамында спиртi бар сұйыққа тiкелей тиіп тұратын бөлігi тамақ өнеркәсiбiнде қолдануға рұқсат етiлген материалдардан орындалады;

5) есеп жүргiзуге арналған жады сыйымдылығы үдемелi қорытындымен;

6) жұмыста кідірiстер болған жағдайда тоқтаған сәттен бастап уақытты тiркеп және көрсеткіштерді жаңартып, есептеуiштi оқшаулай отырып, көрсеткiштердi сақтау;

7) рұқсатсыз араласуға жол берілмеуі (код, кiлт, пломба, голографиялық жапсырма және басқа да тәсілдер);

8) iркілiстерден және сыртқы әсерлерден қорғану;

9) электрмен жабдықтауда авариялық іркілістер болған жағдайда автономды жұмыс істеу ұзақтығы авариялық іркілістер басталған сәттен бастап 3 (үш) күннен кем емес;

10) жарылыс және өрт қауіпсiздігі;

11) уәкілетті органға спиртті өндіру көлемі туралы деректерді нақты уақыт режимінде автоматты түрде беруді қамтамасыз ету.

7. Аппаратқа техникалық паспорт, мемлекеттiк және орыс тiлдерiндегі нұсқаулық, аппараттың шығарылуы туралы құжат және жұмыс істеу схемасы қоса беріледі.

8. Этил спиртi мен спирттің бас фракциясын бақылау есебiне арналған аппарат уәкілетті органның қызметкерінің қатысуымен пайдалануға енгізiледi, ол туралы пайдалануға енгiзу актiсі жасалады.

9. Айыру колоннасынан спирт өлшейтін аппаратына дейiн ернемектік жалғамаларды, тораптарға және күйге келтіру, оқшаулау, ақпаратты тіркеу және тастау элементтеріне және бақылау аспаптарының көрсеткіштеріне ықпал ететін басқа да құрылғыларға қол жеткізу мүмкін болатын барлық орындарды, сондай-ақ аппаратты уәкілетті орган қызметкері пломбалау жолымен пломбалайды, ол туралы пломба салынған орны және нөмірлері немесе пломбалар бедерлері көрсетіле отырып пломбалау актiсі жасалады.

10. Спиртті бақылау есебiнiң мақсаты боза айыру және спирттi айдау барысына бақылау жасау, сулы спирт ерiтiндiсiнің өндірілетін көлемін және сусыз спиртке қайта есептеумен ондағы спиртті үздiксiз өлшеу және бақылау есебi болып табылады.

11. Спирттi өндiру кезiнде оның бақылау есебi спиртті өндiрудi жүзеге асыратын ұйымдарда (бұдан әрi – спирттi өндiрушi ұйымдар) деректердi беру аппараттарымен және телекоммуникациялық құралдармен (бұдан әрi – беру құралдары) жарақтандыру және оларды пайдалану жолымен iске асырылады.

12. Өндiрiлетiн спирттiң мөлшерiн өлшеу және есепке алу спирттi құю бөлiмшесiнен спирт сақтау қоймасына беру кезінде өлшегiштермен спиртті өлшеу нәтижелерi бойынша жүргiзiледi.

13. Сусыз спирттi мөлшерін өлшегiшпен өлшеу нәтижелерi бухгалтерлiк есеп үшiн бастапқы деректер болып табылады.

14. Сусыз спирттiң мөлшерiн өлшегiш (Vm) және аппарат (Va) бойынша өлшеудiң нәтижелерiн салыстырумен осы шамалардың арасындағы далдарда және пайызда (кiнәраттық) сандық айырмашылық айқындалады.

15. Кiнәраттық есебi мына формулалар бойынша жүргізiледi:

                              Vм-Va

Сабс. = Vм - Va және Жүздік = --------- х 100%,

                                Vм

мұндағы Сабс. - абсолюттiк кiнәраттық, дал;

Жүздiк - салыстырмалы кінәраттық, %.

16. Сусыз спирттi есептеу кезiндегі абсолюттi және салыстырмалы кiнәраттық спиртті өндiрiстен спирт сақтау қоймасына әрбір беру кезiнде айқындалады және осы Қағидаларға 1-қосымшаға сәйкес нысан бойынша спирт пен спирт өнiмдерiн өндiру және оларды спирт сақтау қоймасына беру туралы актiнiң (бұдан әрi – спирт өндiру туралы акті) 3-бөлiмiнде тіркеледі және спирт өндiрушi ұйымның тиiстi бөлiмшесi бақылайды.

17. Боза айыратын қондырғылардың қуатына қарай осы Қағидаларға

2-қосымшаға сәйкес спиртті, спирттің бас фракциясын қабылдауды, есепке алуды және беруді қамтамасыз ететін жабдық, бiр немесе бiрнеше аппараттар пайдаланылады.

18. Бас фракцияның мөлшерiн есепке алу спирттiң көлемдік есептеуіші бойынша жүргізiледi.

19. Сивушты майды және стандартты емес спирттi (қойыртпақтарды) аппараттан өткiзуге жол берiлмейдi.

20. Спирт және спирттiң бас фракциясы спирттi және спирт өнiмдерiн қабылдау бөлiмiнде (бұдан әрі – құю бөлiмi) тоңазытқыш, ротаметр, қарау шамы және аппарат арқылы бөлінеді. Бұл ретте қарау шамы жарық жақсы түсетiн орында, аппараттан бiр метрден аспайтын қашықта орналастырылады.