Документ на казахском языке

"Қазақстан Республикасындағы сәулет, қала құрылысы және құрылыс қызметі туралы" Қазақстан Республикасының Заңын іске асырудың кейбір мәселелері Қазақстан Республикасы Үкіметінің 2001 жылғы 15 қазандағы N 1328 Қаулысы

Редакция 29.06.2012 жылы берілген өзгерістер мен толықтырулармен

"Қазақстан Республикасындағы сәулет, қала құрылысы және құрылыс қызметі туралы" Қазақстан Республикасының 2001 жылғы 16 шілдедегі Заңына сәйкес Қазақстан Республикасының Үкіметі қаулы етеді:

1. Қоса беріліп отырған:

1) қабылдау және жұмыс комиссияларының өкілеттіктері, міндеттері, міндетті құрамы;

2) Қабылдау және жұмыс комиссияларының объектiлердi қабылдау қағидалары (бұдан әрі – Қағидалар);

3) жұмыс комиссиясы қорытындысының және қабылдау комиссиясы актісінің нысандары;

4) мемлекеттік қабылдау комиссиясының салынған объектіні пайдалануға қабылдау туралы актісінің бірыңғай нысаны бекітілсін.

2. Осы қаулы қол қойылған күнінен бастап күшіне енеді.

Қазақстан Республикасының

Премьер-Министрі

Қазақстан Республикасы Yкiметiнiң 2001 жылғы 15 қазандағы N 1328 қаулысымен бекітілген

Қабылдау және жұмыс комиссиясының өкілеттіктері, міндеттері және міндетті құрамы

1. Қабылдау комиссиясының өкілеттіктері, міндеттері және міндетті құрамы

1. Қабылдау комиссиясының өкілеттігіне мыналар кiредi:

1) «Қазақстан Республикасындағы сәулет, қала құрылысы және құрылыс қызметi туралы» Қазақстан Республикасының 2001 жылғы 16 шілдедегі Заңының (бұдан әрі – Заң) 76-бабында көзделген объектiлердi олар бекiтiлген жобаға сәйкес және пайдалануға қабылдау туралы актiнi ресiмдей отырып, пайдалануға толық дайын болған кезде қабылдау;

2) жобалау, іздестiру және (немесе) құрылыс-монтаж жұмыстарының орындалмауына немесе сапасыз орындалуына жол берген адамдарды заңнамада белгiленген тәртiппен жауапқа тарту жөнiндегі ұсыныстарымен, анықталған бұзушылықтарды жою үшін тапсырыс берушіге (инвесторға, құрылыс салушыға) және бас мердiгерге пайдалануға берiлетiн объектiнiң жарамсыздығы туралы қорытынды беру.

2. Қабылдау комиссиясының өкiлеттiктерi қабылдау үшiн комиссия тағайындалған объектiге ғана қолданылады.

Қабылдау комиссиясының нақты объект бойынша өкiлеттiктерi тапсырыс беруші (инвестор, құрылыс салушы) оны тағайындаған күнiнен басталады және объектiнi қабылдау туралы актіге қол қойған күнінен бастап тоқтайды.

3. Қабылдау комиссиясының мiндетiне мыналар кiредi:

1) құрылысы аяқталған объектiнiң пайдалануға беруге дайындығын белгілеу және құжаттамалық түрде растау;

2) жұмыстарды орындаушының нормативтiк талаптарды, бекiтiлген жобаны сақтауы жөнiндегi болған ауытқушылықтар бойынша әрекеттерiн белгілеу және оларды мемлекеттік нормативтерде белгiленген тәртiппен келiсу;

3) iске қосылатын объектi қуатының (сыйымдылығының, өткiзу қабiлетiнiң) бекiтiлген жобадағы көрсеткiштерiмен сәйкестiгiн белгілеу;

4) тапсырыс берушіден (инвестордан, құрылыс салушыдан) немесе бас мердiгерден алынған құжаттамаларды өкiлеттiктерi аяқталғаннан кейiн қайтарып беру.

4. Қабылдау комиссиясының міндетті құрамына мыналар кiредi:

1) қабылдау комиссиясының төрағасы болып табылатын тапсырысшы (инвестор, құрылыс салушы) не тапсырыс берушінің (инвестордың, құрылыс салушының) жауапты өкiлi;

2) комиссия төрағасының орынбасары болып табылатын мемлекеттік сәулет-құрылыс бақылау және қадағалау органының өкілі;

3) бас мердігердің, қосалқы мердігерлік ұйымның не бас жобалаушының не жобалау (жобалау-сметалық) құжаттамасын әзiрлеушiнiң, қосалқы жобалаушылардың (жобаның бөлімдерін әзірлеушілердің), жергiлiктi атқарушы сәулет және қала құрылысы органдары, мемлекеттік өртке қарсы қызмет, мемлекеттiк санитариялық-эпидемиологиялық қадағалау органдарының, пайдаланушы ұйымдардың (кәсіпорындардың, мекемелердің), пайдалануға берiлетiн объектiнiң бейiнiне (мақсатына) қарай басқа да мүдделi мемлекеттiк органдардың өкiлдерi.

2. Жұмыс комиссиясының өкілеттіктері, міндеттері мен міндетті құрамы

5. Жұмыс комиссиясының өкілеттігіне мыналар кiредi:

1) Заңның 75-бабында көзделген мемлекеттiк қабылдау комиссиясының объектiлердің оларды қабылдауға толық дайындығына кешендi бағалау жүргiзуі;

2) технологиялық жабдық пен инженерлiк жүйелерге бақылау сынақтарын жүргiзу;

3) жобалау, іздестiру және (немесе) құрылыс-монтаж жұмыстарының орындалмауына немесе сапасыз орындалуына жол берген адамдарды заңнамада белгiленген тәртiппен жауапқа тарту жөнiнде ұсыныстарымен анықталған бұзушылықтарды жою үшін тапсырыс берушіге объектiнiң пайдалануға беруге толық дайын еместiгi туралы лер беру;

4) кешендi бағалау нәтижелерi бойынша оның нәтижелерiн мемлекеттiк қабылдау комиссиясына ұсыну үшiн объектiнiң дайын екендiгi туралы қорытындыны ресiмдеу.

6. Жұмыс комиссиясының өкiлеттiктерi дайындыққа кешенді бағалау жүргізу үшiн жұмыс комиссиясы тағайындалған объектiге ғана қолданылады.

Жұмыс комиссиясының нақты объект бойынша өкiлеттiктерi оны тағайындаған сәттен басталады және тапсырыс берушіге пайдалануға берiлетiн объектiнi кешендi бағалау бойынша объектiнiң пайдалануға беру дайындығы туралы көрсете отырып, заңнамада белгiленген тәртiппен ресiмделген қорытындыны бергеннен кейiн тоқтайды.

7. Жұмыс комиссиясының мiндетiне мыналар кiредi:

1) орындалған құрылыс-монтаж жұмыстарының және құрастырылған технологиялық, инженерлiк немесе өзге де жабдықтың белгiленген тәртiппен бекiтiлген жобалау (жобалау-сметалық) құжаттамаларына, нормативтiк талаптарға (шарттарға, шектеулерге) сәйкестiгiн бағалау;

2) пайдалана бастауға объектiнiң дайындығын не дайын еместiгiн белгілеу;

3) бас мердiгерден алынған құжаттамаларды өкiлеттiктерi аяқталғаннан кейiн қайтарып беру.

8. Жұмыс комиссиясының міндетті құрамына мыналар:

1) қабылдау комиссиясының төрағасы болып табылатын тапсырыс беруші (инвестор, құрылыс салушы) не тапсырыс беруші (инвестордың, құрылыс салушының) жауапты өкiлi;

2) бас жобалаушының не жобалау (жобалау-сметалық) құжаттамасын әзiрлеушiнiң, қосалқы жобалаушылардың (жобаның бөлімдерін әзірлеушілердің), бас мердігердің, қосалқы мердігерлік ұйымдардың, жергiлiктi атқарушы мемлекеттік сәулет-құрылыс бақылау және қадағалау органдарының, мемлекеттік өртке қарсы қызмет, мемлекеттiк санитариялық-эпидемиологиялық қадағалау органдарының, мемлекеттік халықты әлеуметтік қорғау органының, пайдаланушы ұйымдардың (кәсіпорындардың, мекемелердің), объектiнiң бейiнiне (мақсатына) қарай басқа да мүдделi мемлекеттiк органдардың өкiлдерi кiредi.

Қазақстан Республикасы Yкiметiнiң 2001 жылғы 15 қазандағы N 1328 қаулысымен бекітілген

Қабылдау және жұмыс комиссияларының объектiлердi қабылдау қағидалары

1. Жалпы ережелер

1. Осы Қабылдау және жұмыс комиссияларының объектiлердi қабылдау қағидалары (бұдан әрі – Қағидалар) «Қазақстан Республикасындағы сәулет, қала құрылысы және құрылыс қызметі туралы» Қазақстан Республикасының 2001 жылғы 16 шілдедегі Заңының (бұдан әрі – Заң) 77-бабының 2-тармағына сәйкес әзірленді және салынған объектiлердi пайдалануға қабылдау тәртібін белгілейді.

2. Осы Қағидаларда мынадай ұғымдар пайдаланылады:

1) қабылдау комиссиясы – құрылысы аяқталған объектінің дайындығын белгілейтін және құжаттамалық растайтын және салынған объектiнi пайдалануға қабылдайтын уақытша алқалы орган;

2) жұмыс комиссиясы – нәтижелерiн мемлекеттiк қабылдау комиссиясына ұсыну үшiн объектiнiң дайындығына кешендi бағалау жүргiзетiн уақытша алқалы орган;