Документ на казахском языке

Республикалық бюджет қаражатының есебінен қаржыландырылатын тегін медициналық көмектің кепілдік берілген көлемінің шеңберінде көрсетілген медициналық көмектің сапасын және көлемін бақылау, стационарлық және стационарды алмастырушы медициналық қызметке және амбулаториялық-емханалық көмекке ақы төлеу үшін құжаттарды қалыптастыру қағидаларын бекіту туралы Қазақстан Республикасы Денсаулық сақтау министрінің 2012 жылғы 5 қаңтардағы № 3 бұйрығы

Редакция 04.03.2013 жылы берілген өзгерістер мен толықтырулармен

«Халық денсаулығы және денсаулық сақтау жүйесі туралы» Қазақстан Республикасының 2009 жылғы 18 қыркүйектегі Кодексінің 7-бабының 1-тармағының, 5-тармақшасына, «Тегін медициналық көмектің кепілдік берілген көлемін көрсету бойынша медициналық қызметті сатып алуды ұйымдастыру және жүргізу ережесін бекіту туралы» Қазақстан Республикасы Үкіметінің 2009 жылғы 19 қарашадағы № 1888 және «Бюджет қаражаты есебінен денсаулық сақтау ұйымдарының шығындарын өтеу ережесін бекіту туралы» 2009 жылғы 7 желтоқсандағы № 2030 қаулысына сәйкес БҰЙЫРАМЫН:

1. Қоса беріліп отырған республикалық бюджет қаражатынан қаржыландырылатын тегін медициналық көмектің кепілдік берілген көлемінің шеңберінде көрсетілген медициналық көмектің сапасын және көлемін бақылау, стационарлық және стационарды алмастырушы медициналық қызметке және амбулаториялық-емханалық көмекке ақы төлеу үшін құжаттарды қалыптастыру қағидасы (бұдан әрі - Қағида) бекітілсін.

2. «Денсаулық сақтауды дамытудың республикалық орталығы» шаруашылық жүргізу құқығындағы республикалық мемлекеттік кәсіпорны (М. К. Құлжанов) «Стационарлық науқастардың электрондық тіркелімін» тұрақты негізде техникалық сүйемелдеуді қамтамасыз етсін.

3. «Республикалық бюджет қаражаты есебінен қаржыландырылатын тегін медициналық көмектің кепілдік берілген көлемінің шеңберінде медициналық қызметті төлеу үшін көрсетілген медициналық көмектің сапасын және көлемін бақылау және құжаттарды қалыптастыру ережесін бекіту туралы» Қазақстан Республикасы Денсаулық сақтау министрінің міндетін атқарушысының 2011 жылғы 5 қаңтардағы № 5 және «Клиникалық-шығындық топтар бойынша стационарлық және стационарды алмастырушы медициналық көмекке ақы төлеу әдістемесін пилоттық енгізудің медициналық ұйымдары үшін республикалық қаражат есебінен қаржыландырылатын тегін медициналық көмектің кепілдік берілген көлемінің шеңберінде медициналық қызметтің көрсетілген көлемі үшін ақы төлеу ережесін бекіту және пилоттық енгізудің медициналық ұйымдары үшін республикалық бюджет қаражаты есебінен қаржыландырылатын тегін медициналық көмектің кепілдік брілген көлемінің шеңберінде медициналық қызметке ақы төлеу үшін көрсетілген медициналық көмектің сапасын және көлемін бақылау және құжаттарды қалыптастыру және клиникалық-шығындық топтар бойынша стационарлық және стационарды алмастырушы медициналық көмекке ақы төлеу әдістемесін енгізу ережесін бекіту туралы» 2011 жылғы 4 қазандағы № 679 бұйрықтарының күші жойылды деп есептелсін.

4. Осы бұйрықтың орындалуын бақылау Қазақстан Республикасы Денсаулық сақтау министрлігінің вице-министрі А. Д. Құрманғалиеваға жүктелсін.

5. Осы бұйрық 2012 жылғы 1 қаңтардан бастап күшіне енеді.

Қазақстан Республикасының Денсаулық сақтау министрі С. Қайырбекова

Қазақстан Республикасы Денсаулық сақтау министрінің 2012 жылғы 5 қаңтардағы № 3 бұйрығына қосымша

Республикалық бюджет қаражатының есебінен қаржыландырылатын тегін медициналық көмектің кепілдік берілген көлемінің шеңберінде көрсетілген медициналық көмектің сапасын және көлемін бақылау, стационарлық, стационарды алмастырушы медициналық қызметке және амбулаториялық-емханалық көмекке ақы төлеу үшін құжаттарды қалыптастыру қағидасы

1. Жалпы ережелер

1. Осы Қағида (бұдан әрі - Қағида) Республикалық бюджет қаражатының есебінен қаржыландырылатын тегін медициналық көмектің кепілдік берілген көлемінің (бұдан әрі - ТМККК) шеңберінде көрсетілген медициналық көмектің сапасын және көлемін бақылауды ұйымдастыру және жүргізу, стационарлық және стационарды алмастырушы медициналық қызметке және амбулаториялық-емханалық көмекке ақы төлеу үшін құжаттарды қалыптастыру тәртібін белгілейді.

2. Қағида «Халық денсаулығы және денсаулық сақтау жүйесі туралы» Қазақстан Республикасының 2009 жылғы 18 қыркүйектегі кодексінің 7-бабының 1-тармағының 5-тармақшасына, «Тегін медициналық көмектің кепілдік берілген көлемін көрсету жөніндегі қызметтер берушіні таңдау және оның шығындарын өтеу қағидаларын бекіту туралы» 2012 жылғы 25 қазандағы № 1358 қаулысына және «Денсаулық сақтау ұйымдарының шығындарын бюджет қаражатының есебінен өтеу ережесін бекіту туралы» Қазақстан Республикасы Үкіметінің 2009 жылғы 7 желтоқсандағы № 2030 қаулысына сәйкес әзірленген.

3. Осы Қағида құжаттарды және «Стационарлық науқастардың электрондық тіркелімін» қалыптастыру процессіне қатысушыларға қолданылады:

республикалық бюджет қаражатының есебінен ТМККК шеңберінде медициналық қызметтер көрсетуге шарт жасасқан медициналық ұйымдар;

Қазақстан Республикасы Денсаулық сақтау министрлігінің Медициналық қызметке ақы төлеу комитеті (бұдан әрі - МҚАК АД) мен Қазақстан Республикасы Денсаулық сақтау министрлігінің Медициналық және фармацевтикалық қызметті бақылау комитетінің (бұдан әрі - МФҚБК АД) аумақтық департаменттерінің тұрғысында ТМККК шеңберінде көрсетілген медициналық көмектің сапасы мен көлемін бақылауды (бұдан әрі - сапа мен көлемді бақылау) жүзеге асыратын мемлекеттік органдар;

Емделіп шығу жағдайларын бағалау мен «Стационарлық науқастардың электрондық тіркелімін» (бұдан әрі - Тіркелім) техникалық сүйемелдеуді жүзеге асыратын денсаулық сақтау саласындағы ақпараттандыру субъектісі Қазақстан Республикасы Денсаулық сақтау министрлігінің «Денсаулық сақтауды дамыту республикалық орталығы» шаруашылық жүргізу құқығындағы республикалық мемлекеттік кәсіпорны (бұдан әрі - ДДРО);

Қаржылық лизинг жағдайында денсаулық сақтау ұйымдарына медициналық техниканы беруді жүзеге асыратын «ҚазМедТех» акционерлік қоғамы.

4. Ақы төлеу үшін сапа мен көлемді бақылау, құжаттарды қалыптастыру медициналық көмектің мынадай түрлерін көрсету кезінде жүзеге асырылады:

білікті, мамандандырылған, жоғары мамандандырылған, мынадай нысанда жасалатын:

1) стационарлық және стационарды алмастырушы көмек, науқастарға медициналық қызмет көрсететін республикалық маңызы бар медициналық ұйымдармен қоса алғанда:

психикалық, инфекциялық аурулармен және туберкулезбен, алкоголизммен, нашақорлықпен және уытқұмарлықпен;

оңалту орталықтарында, санаторийлерде;

2) әуе көлігіндегі санитариялық авиация, қалпына келтіре емдеу және медициналық оңалту;

3) республикалық маңызы бар медициналық ұйымдарда амбулаториялық-емханалық, мамандандырылған және жоғары мамандандырылған көмек көрсету.

2. Сапа мен көлемді бақылауды жүргізу тәртібі

5. Сапа мен көлемді бақылау мыналарға бөлінеді:

1) ТМККК шеңберінде көрсетілген медициналық көмектің сапасын бақылау (бұдан әрі - сапаны бақылау);

2) ТМККК шеңберінде көрсетілген медициналық көмектің көлемін бақылау (бұдан әрі - көлемді бақылау).

6. Сапаны бақылау көрсетілетін медициналық қызметтердің стандарттарға денсаулық сақтау саласындағы Қазақстан Республикасының нормативтік құқықтық актілеріне сәйкестігін бағалау мақсатында жүргізіледі және медициналық қызметтер көрсету саласындағы мемлекеттік бақылау шеңберінде МФҚБК АД жүзеге асырады.

7. Көлемді бақылау МҚАК АД мен медициналық ұйымның арасында жасалған ТМККК шеңберінде медициналық қызметтер көрсетуге шарттардың (бұдан әрі - шарт) шеңберінде ТМККК шеңберінде медициналық көмекті көрсетудің белгіленген стандарттарға, денсаулық сақтау саласындағы Қазақстан Республикасының нормативтік құқықтық актілеріне сәйкестігін бағалау мақсатында МҚАК АД жүзеге асырады және шот-тіркелімдердегі төлеуге ұсынылған медициналық көмектің көлемінің растығын тексеруге арналған.

8. Емделіп шығу жағдайларының сапасы мен көлемін бақылау мыналардың негізінде жүргізіледі:

1) денсаулық сақтау саласындағы уәкілетті орган бекіткен ақы төлеуге жатпайтын жағдайлардың тізбесіне (бұдан әрі - Тізбе) сәйкес Тіркелімнен автоматтандырылған таңдау нәтижелері бойынша жағдайларды, оның ішінде ішінара сараптау;

2) кездейсоқ таңдау немесе нысаналы топтар әдісімен таңдай отырып, ақы төлеуге жататын емделіп шығу жағдайларын 10% сараптау;

3) көрсетілген медициналық көмектен сипаты, көлемі мен сапасы көрінетін жекелеген тұлғалардың денсаулық жағдайы, және осы Қағидаларына оларды талдау қажет болғанда 1, 2-қосымшаларға сәйкес нысан бойынша медициналық ұйымнан медициналық карталарды сұрату арқылы және/немесе медициналық ұйымға шығу кезінде автоматтандырылған таңдау негізінде медициналық қызметтер алған пациенттер туралы деректерді жазуға арналған бастапқы медициналық құжатты (бұдан әрі - медициналық карта) сараптау.

9. Сапа мен көлемді бақылауды жүзеге асыратын мемлекеттік органдардың сұратуы бойынша ТМККК көрсететін медициналық ұйымдар осы Қағидаларға 3-қосымшаға сәйкес 3 (үш) жұмыс күніне дейін медициналық карталарды, өзге де құжаттар мен олардың көшірмелерін ұсынады.

10. Медициналық карталарды сараптау оларды МҚАК АД -не ұсынған күнінен бастап 3 (үш) жұмыс күнінің ішінде жүргізіледі.

11. Медициналық ұйымдар онкүндік сайын осы Қағидаларға 3-қосымшаға сәйкес тізімдеме бойынша МФҚБК АД -не патологоанатомиялық диагнозды ұсына отырып, өлім нәтижесі бар жағдайлар бойынша медициналық карталарды жібереді.

12. Сапаны бақылау жүргізуден кейін МФҚБК АД онкүндік сайын медициналық ұйымдарға тізімдеме бойынша медициналық карталарды жібереді.

13. МФҚБК АД сапаның нәтижелерін, оның ішінде жоспарлы және жоспардан тыс тексерулердің нәтижелерін Тіркелімге енгізеді және сараптама аяқталған сәттен бастап 3 (үш) жұмыс күнінен кешіктірмей.

3. Құжаттарды қалыптастыру тәртібі

14. Әуе көлігіндегі санитариялық авиация қызметтерін және консультациялық-диагностикалық көмек нысанында жүзеге асырылатын мамандандырылған және жоғары мамандандырылған медициналық көмек қызметтерін көрсететін медициналық ұйымдарды қоспағанда медициналық ұйым күн сайын, науқасты стационардан шығарған келесі күннен кешіктірмей стационарлық науқастың (003/е нысан), күндізгі стационар науқасының (003-3/е нысан), үйдегі стационар науқасының (003-2/е нысан) медициналық карталарының, босандыру тарихының (096/е нысан), жаңа туған нәрестелер тарихының (097/е нысан) негізінде Тіркелімге деректерді енгізуді жүзеге асырады.

Енгізу нәтижелері бойынша стационардан шыққан науқастың статистикалық картасы (006/е, 066-1/е, 066-2/е,066-3/е. 066-4/е нысандар) автоматты түрде қалыптасады.

Емдеуші дәрігер стационардан шығарылған күнінен кейін бір жұмыс күнінен кешіктірмей емделіп шыққан науқастың шығару эпикризін (027/е нысан) қалыптастырады және растайды.

Енгізудің дұрыстығы расталғаннан кейін, гистологиялық және патоморфологиялық зерттеулер нәтижелерін енгізу жағдайларын қоспағанда, Тіркелімдегі деректер түзетуге жатпайды.

Егер медициналық ұйым медициналық техниканың лизинг алушысы болып табылған жағдайда Тіркелімнің тиісті жолдарында медициналық техниканы пайдалану туралы деректерді енгізу жүзеге асырылады.

Тіркелім деректері базасының негізінде бірінші басшының қолымен расталған және мөрмен бекітілген шот-тіркелімдер қалыптастырылады және олар ай сайын келесі есепті кезеңнен кейінгі бір жұмыс күнінен кешіктірілмей МҚАК АД-не ұсынылады.

15. Тіркелімде автоматты режимде мыналар қалыптастырылады:

осы Қағидаларға 4-қосымшаға сәйкес ақы төлеуге жататын есепті кезеңдегі емдеуге жатқызу жағдайларының тізбесі;