Документ на казахском языке

Автомобиль жолдарын күтіп-ұстау, ағымдағы, орташа және күрделі жөндеу және жол активтерін басқару кезінде орындалатын жұмыс түрлерінің сыныптамасын бекіту туралы Қазақстан Республикасы Көлік және коммуникация министрінің 2014 жылғы 24 қаңтардағы № 56 бұйрығы. Қазақстан Республикасының Әділет министрлігінде 2014 жылы 27 ақпанда № 9176 тіркелді

Редакция 31.08.2024 жылы берілген өзгерістер мен толықтырулармен

«Автомобиль жолдары туралы» Қазақстан Республикасы Заңының 12-бабы 2-тармағының 25) тармақшасына сәйкес БҰЙЫРАМЫН:

1. Қоса беріліп отырған Автомобиль жолдарын күтіп-ұстау, ағымдағы, орташа және күрделі жөндеу және жол активтерін басқару кезінде орындалатын жұмыс түрлерінің сыныптамасы бекітілсін.

2. Қазақстан Республикасы Көлік және коммуникация министрлігінің Автомобиль жолдары комитетіне (З.С. Сағынов):

1) Осы бұйрықтың Қазақстан Республикасы Әділет министрлігінде заңнамада белгіленген тәртіппен мемлекеттік тіркелуін ;

2) осы бұйрық Қазақстан Республикасы Әділет министрлігінде мемлекеттік тіркелгеннен кейін бұқаралық ақпарат құралдарында, оның ішінде Қазақстан Республикасы Көлік және коммуникация министрлігінің интернет-ресурсында ресми жариялануын және оны мемлекеттік органдардың интернет-порталында орналастыруын;

3) осы бұйрық Қазақстан Республикасы Әділет министрлігінде мемлекеттік тіркелгеннен кейін күнтізбелік он күн ішінде «Қазақстан Республикасы Әділет министрлігінің Республикалық құқықтық ақпарат орталығы» шаруашылық жүргізу құқығындағы «Әділет» республикалық мемлекеттік кәсіпорнының ақпараттық-құқықтық жүйесіне ресми жариялауға көшірмелерін жіберуді;

4) осы бұйрық Қазақстан Респубикасы Әділет министрлігінде мемлекеттік тіркелгеннен кейін бес жұмыс күні ішінде мемлекеттік тіркеу туралы және бұқаралық ақпарат құралдарында жариялауға жіберу туралы мәліметтерді Қазақстан Республикасы Көлік және коммуникация министрлігінің Заң департаментіне ұсынуды қамтамасыз етсін.

3. Осы бұйрықтың қосымшасында келтірілген күші жойылған деп танылған Қазақстан Республикасы Көлік және коммуникация министрінің нормативтік құқықтық актілерінің тізбесіне сәйкес кейбір нормативтік құқықтық актілердің күші жойылды деп танылсын.

4. Осы бұйрықтың орындалуын бақылау Қазақстан Республикасының Көлік және коммуникация вице-министрі М. Қ. Пішембаевқа жүктелсін.

5. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Министр А. Жұмағалиев

Қазақстан Республикасы Көлік және коммуникация министрінің 2014 жылғы 24 қаңтардағы № 56 бұйрығымен бекітілген

Автомобиль жолдарын күтіп-ұстау, ағымдағы, орташа және күрделі жөндеу және жол активтерін басқару кезінде орындалатын жұмыс түрлерінің сыныптамасы

1-тарау. Жалпы ережелер

1. Автомобиль жолдарын күтіп-ұстау, ағымдағы, орташа және күрделі жөндеу және жол активтерін басқару кезінде орындалатын жұмыс түрлерінің сыныптамасы (бұдан әрі – Сыныптама) автомобиль жолдары мен олардағы құрылыстарды күтіп-ұстау, ағымдағы, орташа және күрделі жөндеу кезінде орындалатын жұмыс түрлерін айқындайды.

2. Бұл Сыныптамада мынадай негізгі ұғымдар қолданылды:

1) автожол туннелі (бұдан әрі – туннель) – биік немесе контурлық кедергілерді еңсеру мақсатында автокөлік құралдарын өткізуге (өтуіне) арналған жер асты (немесе су асты) инженерлік құрылыс;

2) автожол нысандарын ғылыми-техникалық сүйемелдеу – ғылыми және (немесе) ғылыми-техникалық қызмет субъектісі және тиісті өндірістік база ретінде аккредиттелген автожол саласында ғылыми ұйым жүзеге асыратын автомобиль жолдарын, көпірлер мен жол құрылыстарын жобалау және салу, қайта құру, күтіп-ұстау, ағымдағы, орташа және күрделі жөндеу кезінде жаңа технологиялар мен материалдарды енгізуді қамтамасыз ету үшін орындалатын ғылыми-әдістемелік, сараптамалық-бақылау, ақпараттық-талдау сипаттағы жұмыстар кешені;

3) автомобиль жолдары мен олардағы құрылыстарды пайдалануды басқару – автомобиль жолдары мен олардағы құрылыстардың қажетті техникалық деңгейін және көліктік-пайдалану жағдайын қамтамасыз ету бойынша ұйымдастырушылық және регламенттеу жұмыстарының кешені;

4) автомобиль жолдарын және олардағы құрылыстарды паспорттау – техникалық паспорт пен жол деректерінің базасын қалыптастыра отырып, автомобиль жолдары мен жасанды жол құрылыстарын техникалық есепке алу;

5) автомобиль жолдары мен олардағы құрылыстардың жай-күйін мониторингілеу – қоршаған ортаны пайдалану және әсер ету нәтижесінде олардың жай-күйінің ықтимал антропогендік өзгерістерін бақылау және қадағалау, бағалау және болжау жүйесі;

6) автомобиль жолдарының қауіпсіздігін бағалау бағдарламасы – арнайы көлік құралындағы тәуелсіз автоматтандырылған сараптамасы, оның жабдығы әрбір қатысушылар үшін қауіпсіздік тәуекелдерін бағалауға мүмкіндік береді, оның нәтижелерi бойынша жол желiсiнiң картасында жол жүрiсi қауiпсiздiгi рейтингi (бiрден беске дейiн) құрастырылады, жол-көлiк оқиғалары шоғырланған аумақтарды (бұдан әрi – ЖКО) жоюға инвестициялық жоспарлар әзiрленедi және оларды жойғаннан кейін жол қауіпсіздігі көрсеткештерін бақылайды, сондай-ақ оқыту, технологиялар мен мемлекеттік, өңірлік және жергілікті деңгейде қолдау көрсетіледі;

7) автомобиль жолы – жылдамдығы, жүктемесі, габариті белгіленген автомобильдер мен басқа да көлік құралдарының үздіксіз, қауіпсіз қозғалысын қамтамасыз ететін автомобиль қозғалысына арналған инженерлік ғимараттар кешені, сондай-ақ аталмыш кешенді (көлік орнын) орналастыруға берілген жер телімі мен олардың үстіндегі белгіленген габариттің шегіндегі ауа кеңестігі;

8) автомобиль жолын ағымдағы жөндеу – маршруттық тәсілмен орындалатын бұзылған телімдерді жөндеу жөніндегі іс-шараларды қоса алғанда, жыл бойы жүргізілетін апаттық жағдайлардың, автомобиль жолдарындағы ақаулардың туындауының алдын алу, сондай-ақ автомобиль жолын шұғыл қалпына келтіру және жөндеу тәртібімен орындалатын жұмыстар кешені;

9) автомобиль жолын диагностикалау (техникалық жай-күйін бағалау) – автомобиль жолының және жол құрылыстарының құрылымдық элементтерінің параметрлері мен жай-күйі, көлік ағындарының сипаттамалары туралы ақпаратты, қажет болған жағдайда жөндеу іс-шараларына қажеттілікті айқындау, сондай-ақ оны одан әрі пайдалану үдерісінде автомобиль жолының жай-күйін бағалау және болжау үшін өзге де ақпаратты тексеру, жинау және талдау;

10) автомобиль жолын жөндеудің маршруттық тәсілі – көлік қозғалысы үшін қауіпті ақауларды жою және жергілікті телімдердегі жол жамылғысының тегістігін қалпына келтіру жөніндегі жұмыстарды қоса алғанда, маршрут бойынша орындалатын жөндеу жұмыстарының кешені;

11) автомобиль жолын күрделі жөндеу – автомобиль жолының қолданыстағы техникалық санатын өзгертпей, көліктік-пайдалану сипаттамаларын қалпына келтіру және (немесе) жақсарту жөніндегі жұмыстар кешені;

12) автомобиль жолын күтіп-ұстау – автомобиль жолының тиісті техникалық жай-күйін қолдау, оның техникалық жай-күйін бағалау, сондай-ақ жол қозғалысы қауіпсіздігін ұйымдастыру және қамтамасыз ету жөніндегі жұмыстар кешені;

13) автомобиль жолын орташа жөндеу – автомобиль жолы мен жол құрылыстарының бастапқы пайдалану қасиеттерін қалпына келтірумен байланысты жұмыстар кешені;

14) ақы алу пункті – автокөлік құралын сәйкестендіруге мүмкіндік беретін техникалық құрылғылармен жабдықталған өткізу пункті, сондай-ақ әр түрлі төлем әдістерін қолдана отырып, пайдаланушылардан ақы алу процесін бақылау және ұйымдастыру;

15) алдын алу – жобалау құжаттамасын әзірлеуді талап етпейтін, бұзылулар мен ақаулардың өршуін баяулату жұмыстарын жүргізу арқылы олардың өршуін болдырмау жөніндегі шаралар кешені;

16) апаттық құлама – көлік құралының тежегіш жүйесі тоқтап қалған жағдайда оны қауіпсіз тоқтатуға арналған құрылыс;

17) арық – жер бетінен су жинау және бұру үшін қызмет ететін геотехникалық құрылыс;

18) аялдама алаңы – маршруттық көлік құралдарының аялдау немесе жеңіл және басқа да автомобильдердің жоспарлы тұрақты қысқа мерзімді аялдау орындарындағы арнайы жабдықталған алаң;

19) аялдама павильоны – маршруттық көлік құралдарын күтіп тұрған адамдарды жауын-шашын мен желден қорғау үшін аялдауға арналған отырғызу алаңының элементі;

20) берма – көлбеуде жөндеу жұмыстарын жүргізу кезінде көлбеу мен машиналардың өтуінің жалпы тұрақтылығын арттыру мақсатында үйінді немесе ойық беткейінде орналастырылатын алаң;

21) бөлiнген алап – автомобиль жолдарының тиісті құрылымдық элементтері мен инженерлік құрылыстарын, сондай-ақ ғимараттарды, құрылыстарды, қорғаныш және сәндік орман екпелерін және оларды пайдалану үшін қажетті жол байланысы құрылғыларын орналастыру үшін автомобиль жолдары алып жатқан көлік жерлері.

Жобаланатын жалпы пайдаланымдағы автомобиль жолдарына бөлінген алаптың мөлшері жалпы пайдаланымдағы автомобиль жолдары үшін жер бөлу нормаларына сәйкес оның санатына байланысты белгіленеді, атап айтқанда: I техникалық санаттағы жолдар үшін - жолдардың осінен 35 метрден, II техникалық санаттағы жолдар үшін - 20 метрден, III техникалық санаттағы жолдар үшін - 15 метрден, IV техникалық санаттағы жолдар үшін - 13 метрден, V техникалық санаттағы жолдар үшін - 12 метрден болып белгіленеді;

22) демалыс алаңы – жүргізушілер мен жолаушылардың қысқа мерзімді демалуына, көлік құралдары мен жүктердің жай-күйін тексеруге, ұсақ ақауларды жоюға арналған автомобиль жолын жайластыру элементі;

23) жамылғының тотығуы – табиғи факторлардың немесе көктайғақпен күресу үшін қолданылған тұздардың әсерінен жол жамылғысы бетінің зақымдануы;

24) жаяу жүргіншілер өткелі – жол белгілерімен және/немесе жол таңбамен белгіленген инженерлік құрылыс немесе жаяу жүргіншілердің жол арқылы өтуіне арналған жүру бөлігінің телімі;

25) жаяужол – елді мекендерде жаяу жүргіншілердің жүруіне арналған, бөлінген белдеуде және автомобиль жолының жер төсемесінде немесе жол бойындағы белдеуінде орналастырылатын жетілдірілген жамылғысы бар инженерлік құрылыс, сондай-ақ көпір және басқа да жасанды құрылыстардағы жолдың бір бөлігі;

26) жер төсемесінің шайылуы – жер төсемесінің, көбінесе жол жиектерінің жер үсті суларымен бұзылуы. Тазалау және топырақ қосу арқылы жойылады;

27) енеулердің кетігі (сынуы) – цемент-бетон жамылғысы жіктерінің ернеудерінің және тақталар бұрыштарының бұзылуы, жиектермен түйісетін жерлерде қатты емес типтегі жол жамылғысы ернеулерінің бұзылуы;

28) жол активтері – нақты көліктік-пайдалану жай-күйін және құндық бағасы ескерілген автомобиль жолдары мен олардағы құрылыстар;

29) жол активтерін басқару – автомобиль жолдарын жөндеуге және күтіп-ұстауға арналған бюджеттік шығындарды тиімді жоспарлауға бағытталған жол активтерін диагностикалау және аспаптық тексеру, сондай-ақ жол инфрақұрылымының қауіпсіздігін мониторингілеу жөніндегі қызмет;

30) жол ақысын алуға арналған бағдарламалық-аппараттық кешен – жол ақысын алуға арналған жабдықтардың, бағдарламалық жасақтаманың және автомобиль жолы элементтерінің жиынтығы;

31) жол бойындағы белдеулер – шекараларында көлік қозғалысы мен халықтың қауіпсіздігін қамтамасыз ету үшін жерді пайдаланудың ерекше шарттары белгіленетін автомобиль жолдарының бөлінген белдеуіне іргелес жер телімдері.