Документ на казахском языке

Тұқым шаруашылығын дамытуды субсидиялау қағидаларын бекіту туралы Қазақстан Республикасы Ауыл шаруашылығы министрінің 2014 жылғы 12 желтоқсандағы № 4-02/664 бұйрығы. Қазақстан Республикасының Әділет министрлігінде 2015 жылы 6 ақпанда № 10190 тіркелді

Редакция 01.01.2019 жылы берілген өзгерістер мен толықтырулармен

2008 жылғы 4 желтоқсандағы Қазақстан Республикасын Бюджет кодексінің 35-бабының 5-тармағына, «Тұқым шаруашылығы туралы» 2003 жылғы 8 ақпандағы Қазақстан Республикасы Заңының 6-бабы 1-тармағының 8-3) тармақшасына және «Агроөнеркәсіптік кешенді және ауылдық аумақтарды дамытуды мемлекеттік реттеу туралы» 2005 жылғы 8 шілдедегі Қазақстан Республикасы Заңының 6-бабы 1-тармағының 41) тармақшасына сәйкес БҰЙЫРАМЫН:

1. Қоса беріліп отырған Тұқым шаруашылығын дамытуды субсидиялау қағидалары бекітілсін.

2. Қазақстан Республикасы Ауыл шаруашылығы министрлігінің Өсімдік шаруашылығы өнімдерін өндіру мен қайта өңдеу департаменті заңнамада белгіленген тәртіппен:

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық мемлекеттік тіркелгеннен кейін күнтізбелік он күн ішінде оның мерзімді баспа басылымдарында және «Әділет» ақпараттық-құқықтық жүйесінде ресми жариялануға жіберілуін;

3) осы бұйрықтың Қазақстан Республикасы Ауыл шаруашылығы министрлігінің интернет-ресурсында орналастырылуын қамтамасыз етсін.

3. Осы бұйрық алғашқы ресми жариялаған күнінен кейін күнтізбелік он күн өткен соң қолданысқа енгізіледі.

Министр А. Мамытбеков

«КЕЛІСІЛГЕН» Қазақстан Республикасы Қаржы министрі ______________ Б. Сұлтанов 2014 жылғы 24 желтоқсан

«КЕЛІСІЛГЕН» Қазақстан Республикасы Ұлттық экономика министрі ______________ Е. Досаев 2014 жылғы 30 желтоқсан

Қазақстан Республикасы Ауыл шаруашылығы министрінің 2014 жылғы 12 желтоқсандағы № 4-2/664 бұйрығымен бекітілген

Тұқым шаруашылығын дамытуды субсидиялау қағидалары

1-тарау. Жалпы ережелер

1. Осы Тұқым шаруашылығын дамытуды субсидиялау қағидалары (бұдан әрі – Қағидалар) жергілікті бюджетте тиісті қаржы жылына көзделген қаражат есебінен және шегінде тұқым шаруашылығын дамытуды субсидиялау (бұдан әрі – субсидиялар) тәртібін айқындайды.

2. Осы Қағидаларда мынадай ұғымдар пайдаланылады:

1) бірінші репродукция тұқымдарының нормасы (бұдан әрі – норма) – үшінші репродукциядан төмен емес тұқымдарды себуді аяқтау мақсатымен сорт жаңарту үшін қажетті ауыл шаруашылығы дақылдарының себу нормасын, тұқым өнімділігін және егіс алаңын ескере отырып, есептеу жолымен белгіленген, ауыл шаруашылығы дақылдарының бірінші репродукция тұқымдарының көлемі;

2) бірінші ұрпақ будандарының тұқымы – генетикалық айырмашылығы бар ата-енелік нысандар мен гетерозис нәтижесінде ең үздік ата-енелік нысаннан шығымдылығы немесе өзге де көрсеткіштері бойынша асып түсетін нысандарды будандастырудан алынған жүгері, қант қызылшасы, рапс, күнбағыс немесе мақта тұқымдары;

3) жеке шот – субсидиялауға арналған өтінімдердің электрондық тізілімде қамтылған, субсидиялауға өтінімдерді (өтпелі өтінімдерді) тіркеу және олар бойынша операцияларды есепке алу мақсатында тіркелген адамды сәйкестендіруге мүмкіндік беретін жазбалар жиынтығы;

4) көрсетілетін қызметтерді жеткізуші – Қазақстан Республикасының заңнамасына сәйкес Астана қаласының Инвестициялар және кәсіпкерлікті дамыту басқармасы немесе облыстардың, республикалық маңызы бар қалалардың, аудандар мен облыстық маңызы бар қалалардың жергілікті атқарушы органының ауыл шаруашылығы басқармасы (бұдан әрі – Басқарма) айқындайтын, субсидиялаудың ақпараттық жүйесіне қолжетімділікті және оны сүйемелдеуді қамтамасыз ететін тұлға;

5) өтпелі өтінім – элиталық тұқым өсіру шаруашылықтарының (бұдан әрі – элиттұқымшар), тұқым өсіру шаруашылықтарының (бұдан әрі – тұқымшар) немесе тұқым өткізушінің (бұдан әрі – өткізуші) ауыл шаруашылығы тауарын өндіруші (бұдан әрі – ауылшартауарөндіруші) немесе ауыл шаруашылығы кооперативі (бұдан әрі – ауылшаркооперативі) арзандатылған құнмен сатып алған жүгері, қант қызылшасы, рапс, күнбағыс немесе мақтаның бірінші ұрпақ будандарының тұқымдары (бұдан әрі – бірінші ұрпақ будандарының тұқымдары), мақтаның бірінші және екінші репродукция тұқымы (бұдан әрі – мақта тұқымы) және (немесе) жеміс-жидек дақылдары мен жүзімнің элиталық көшеттері (бұдан әрі – элиталық көшеттер) үшін субсидиялар алуға арналған электрондық өтiнiмі;

6) өтінім – элиттұқымшардың, тұқымшардың, тұқым өткізушінің босатылған норма бойынша элиталық тұқымдар және (немесе) бірінші репродукция тұқымдары үшін, ауылшартауарөндіруші немесе ауылшаркооперативінің толық құны бойынша сатып алынған бірінші ұрпақ будандарының тұқымдары, мақта тұқымдары және (немесе) элиталық көшеттер үшін субсидиялар алуға арналған электрондық өтiнiмі;

7) субсидияланатын тұқым – элиттұқымшар, тұқымшар немесе өткізуші ауылшартауарөндірушіге (ауылшаркооперативіне) босатқан норма бойынша элиталық тұқымдар немесе бірінші репродукция тұқымдары, ауылшартауарөндіруші (ауылшаркооперативі) элиттұқымшардан, тұқымшардан немесе өткізушіден сатып алған бірінші ұрпақ будандарының тұқымдары, мақта тұқымдары немесе элиталық көшеттер;

8) субсидиялауға арналған өтінімдердің электрондық тізілімі (бұдан әрі – тізілім) – агроөнеркәсіптік кешенді субсидиялауға арналған өтінімдер, сондай-ақ қарыз алушылар, қаржы институттары туралы мәліметтердің жиынтығы және субсидиялаудың ақпараттық жүйесінде көрсетілген өзге де мәліметтер;

9) субсидиялаудың ақпараттық жүйесі – субсидия алуға арналған өтінімді (өтпелі өтінімді) тіркеуге, сондай-ақ өтінімді (өтпелі өтінімді) субсидиялау шарттарына сәйкестігіне автоматты түрде тексеру арқылы оларды өңдеуге мүмкіндік беретін, субсидиялау процестерін орындау жөніндегі қызметтерді көрсетуге арналған, ақпараттық-коммуникациялық технологиялардың, қызмет көрсетуші персоналдың және техникалық құжаттаманың ұйымдастырылып, ретке келтірілген жиынтығы;

10) субсидиялаудың ақпараттық жүйесінің веб-порталы – Интернет желісінде орналасқан, субсидиялаудың ақпараттық жүйесіне кіруге мүмкіндік беретін интернет-ресурс;

11) танаптың электрондық картасы – бұрылыс нүктелерінің координаталарын, соңғы екі жылдағы ауыспалы егіс туралы ақпаратты және жерді қашықтықтан зондтайтын спутниктерден алынған деректерді қоса алғанда, ауыл шаруашылығына мақсатындағы жер учаскесінде орналасқан танап туралы ақпарат;

12) электрондық цифрлық қолтаңба (бұдан әрі – ЭЦҚ) – электрондық цифрлық қолтаңба құралдарымен жасалған және электрондық құжаттың дұрыстығын, оның тиесілілігін және мазмұнының өзгермейтіндігін растайтын электрондық цифрлық символдар жиынтығы.

3. Субсидияланатын тұқымдардың нормалары мен шекті бағалары осы Қағидаларға 1-қосымшаға сәйкес нысан бойынша әзірленеді және аудандар (республикалық және облыстық маңызы бар қалалар) бойынша ауыл шаруашылығы дақылдары бөлінісіндегі есептемелерді және субсидияланатын тұқымдардың тиісті түрлеріне қалыптасып отырған нарықтық бағаларды растайтын құжаттарды қоса бере отырып, облыс (республикалық маңызы бар қала) әкімінің, ол болмаған жағдайда оның міндетін атқарушы адамның қолы қойылған ілеспе хатпен тиісті жылдың 10 қаңтарына дейін Қазақстан Республикасы Ауыл шаруашылығы министрлігіне (бұдан әрі – Министрлік) қарауға беріледі.

Бұл ретте, нормалардың осы Қағидаларға 2-қосымшада көрсетілген элиталық тұқымдар мен бірінші репродукция тұқымдарының ұсынылатын нормаларынан 2 еседен артық (көп немесе аз жағына) айырмашылығы болмауы тиіс және тиісті жылдың өніміне ауыл шаруашылығы дақылдарының егістік алаңдарының болжамды құрылымына сәйкес барлық ауыл шаруашылығы дақылдары бойынша есептелуі тиіс.

4. Қарау оң нәтиже болған жағдайда, Министрлік субсидияланатын тұқымдардың нормалары мен шекті бағаларын тиісті жылдың 15 қаңтарынан кешіктірмей тиісті ілеспе хатпен кері қайтарады.

Теріс нәтиже болған жағдайда, Министрлік мақұлдаудан уәжді бас тарта отырып, тиісті жылдың 15 қаңтарынан кешіктірмей субсидияланатын тұқымдардың нормалары мен шекті бағаларын жазбаша түрде кері қайтарады.

5. Пысықталған субсидияланатын тұқымдардың нормалары мен шекті бағалары облыс (республикалық маңызы бар қала) әкімінің, ол болмаған жағдайда оның міндетін атқарушы адамның қолы қойылған ілеспе хатпен Министрлікке тиісті жылдың 20 қаңтарынан кешіктірмей қайта қарастыруға беріледі.

Министрлік мақұлдаған субсидияланатын тұқымдардың нормалары мен шекті бағаларының бір данасын тиісті ілеспе хатпен тиісті жылдың 25 қаңтарынан кешіктірмей кері қайтарады.

6. Субсидияланатын тұқымдардың нормалары мен шекті бағалары облыстың (республикалық маңызы бар қала) жергілікті атқарушы органының қаулысымен (бұдан әрі – әкімдік қаулысы) бекітіледі.

Субсидияланатын тұқымдардың нормалары мен шекті бағаларына өзгерістер және (немесе) толықтырулар енгізу осы Қағидалардың 3, 4 және 5-тармақтарында көзделген тәртіппен жүзеге асырылады.

7. Ауылшартауарөндіруші (ауылшаркооперативі) элиттұқымшардан, тұқымшардан немесе өткізушіден норма бойынша элиталық тұқымды және (немесе) бірінші репродукция тұқымын алады.

8. Ауылшартауарөндіруші (ауылшаркооперативі) Қазақстан Республикасы Үкіметінің 2006 жылғы 7 шілдедегі № 645 қаулысымен айқындалған мамандандырылған ұйыммен (бұдан әрі – мамандандырылған ұйым) осы Қағидаларға 3-қосымшаға сәйкес нысан бойынша алынған элиталық тұқым және (немесе) бірінші репродукция тұқым туралы шарт жасасады.

9. Басқарма субсидияланатын тұқымдардың нормалары мен шекті бағаларын әкімдік қаулысы мемлекеттік тіркелгеннен кейін үш жұмыс күн ішінде субсидиялаудың ақпараттық жүйесінде орналастырады.

10. Басқарма тұқым шаруашылығын субсидиялау бойынша жеке ай сайынғы қаржыландыру жоспары (бұдан әрі – Қаржыландыру жоспары) бекітілгеннен кейін үш жұмыс күні ішінде оны тиісті интернет-ресурста және субсидиялаудың ақпараттық жүйесінде орналастырады.

2-тарау. Субсидия алушылар

11. Субсидиялар:

1) элиттұқымшарлардың (тұқымшарлардың, өткізушілердің) ауылшартауарөндірушіге (ауылшаркооперативіне) нақты босатқан норма бойынша элиталық тұқымдардың және (немесе) бірінші репродукция тұқымдарының шығындарын толық өтеуге арналады;

2) ауылшартауарөндiрушiлердің (ауылшаркооперативтерінің) нақты сатып алынған бірінші ұрпақ будандарының тұқымдарына және (немесе) мақта тұқымдарына, сондай-ақ өткен жылдың 4 (төртінші) тоқсанында немесе ағымдағы жылы сатып алынған элиталық көшеттерге жұмсалған шығындарын ішінара (50 %) өтеуге арналады.

3-тарау. Субсидиялар алу шарттары

12. Осы Қағидалардың 11-тармағының 1) тармақшасында көрсетілген субсидиялар осы Қағидаларға 4-қосымшаға сәйкес нысан бойынша элиттұқымшар (тұқымшар, өткізуші) нақты босатылған норма бойынша элиталық тұқымдарға және (немесе) бірінші репродукция тұқымдарына субсидия алуға өтінімді «электрондық үкіметтің» веб-порталы арқылы берген жағдайда төленеді.

13. Осы Қағидалардың 11-тармағының 2) тармақшасында көрсетілген субсидиялар осы Қағидаларға 5-қосымшаға сәйкес нысан бойынша ауылшартауарөндiрушi (ауылшаркооперативі) элиталық тұқым өсіру шаруашылығынан (тұқым өсіру шаруашылығынан, тұқым өткізушілерден) толық құны бойынша нақты сатып алынған бірінші ұрпақ будандарының тұқымдары (мақтаның бірінші немесе екінші репродукция тұқымдары, жеміс-жидек дақылдары мен жүзімнің элиталық көшеттері) үшін субсидиялар алуға өтінімді «электрондық үкіметтің» веб-порталы арқылы берген жағдайда төленеді.

Ауылшартауарөндіруші (ауылшаркооперативі) бірінші ұрпақ будандарының тұқымдарын, мақта тұқымдарын және (немесе) элиталық көшеттерді шарт негізінде элиттұқымшардан (тұқымшардан, өткізушіден) арзандатылған құнмен сатып алған жағдайда, осы Қағидаларға 6-қосымшаға сәйкес нысан бойынша өзіне тиесілі субсидияларды төлеу туралы өтпелі өтiнiмді «электрондық үкіметтің» веб-порталы арқылы береді.

Мұндай жағдайда субсидия элиттұқымшарға (тұқымшарға, өткізушіге) элиттұқымшар (тұқымшар, өткізуші) өтпелі өтінімге күнтізбелік он бес күннен кешіктірмей осы Қағидалардың 24-тармағына сәйкес нақты өткізілген бірінші ұрпақ будандарының тұқымдары, мақта тұқымдары және (немесе) элиталық көшеттер жөніндегі мәліметтерді енгізген жағдайда төленеді.