Документ на казахском языке

Әкімшінің оңалту рәсімінің және банкроттық рәсімінің жүзеге асырылу барысы туралы ағымдағы және сұратылатын ақпаратты ұсыну қағидаларын бекіту туралы Қазақстан Республикасы Қаржы министрінің 2015 жылғы 10 наурыздағы № 159 бұйрығы. Қазақстан Республикасының Әділет министрлігінде 2015 жылы 14 сәуірде № 10708 тіркелді

Редакция 09.12.2015 жылы берілген өзгерістер мен толықтырулармен

«Оңалту және банкроттық туралы» 2014 жылғы 7 наурыздағы Қазақстан Республикасы Заңының 21-бабына сәйкес БҰЙЫРАМЫН:

1. Қоса беріліп отырған Әкімшінің оңалту рәсімінің және банкроттық рәсімінің жүзеге асырылу барысы туралы ағымдағы және сұратылатын ақпаратты ұсыну қағидалары бекітілсін.

2. Қазақстан Республикасы Қаржы министрлігінің Мемлекеттік кірістер комитеті (Д. Е. Ерғожин) заңнамада белгіленген тәртіппен:

1) осы бұйрықтың Қазақстан Республикасы Әділет министрлігінде тіркелуін;

2) осы бұйрықтың мемлекеттік тіркеуден өткеннен кейін күнтізбелік он күн ішінде мерзімді баспа басылымдарына және «Әділет» ақпараттық -құқықтық жүйесіне ресми жариялауға жіберілуін;

3) осы бұйрықтың Қазақстан Республикасы Қаржы министрлігінің ресми интернет-ресурсында жариялануын қамтамасыз етсін.

3. Осы бұйрық алғашқы ресми жарияланған күнінен кейін күнтізбелік он күн өткен соң қолданысқа енгізіледі.

Министр Б. Сұлтанов

Қазақстан Республикасы Қаржы министрінің 2015 жылғы 10 наурыздағы № 159 бұйрығымен бекітілген

Әкімшінің оңалту рәсімінің және банкроттық рәсімінің жүзеге асырылу барысы туралы ағымдағы және сұратылатын ақпаратты ұсыну қағидалары

1.Жалпы ережелер

1. Осы Әкімшінің оңалту рәсімінің және банкроттық рәсімінің жүзеге асырылу барысы туралы ағымдағы және сұратылатын ақпаратты ұсыну қағидалары (бұдан әрі – Қағидалар) «Оңалту және банкроттық туралы» 2014 жылғы 7 наурыздағы Қазақстан Республикасы Заңының 21-бабына сәйкес әзірленді.

2. Қағидалар әкімшінің оңалту рәсімінің немесе банкроттық рәсімінің жүзеге асырылу барысы туралы ағымдағы және сұратылатын ақпаратты оңалту және банкроттық саласындағы уәкілетті органға (бұдан әрі – уәкілетті орган) ұсынудың тәртібін, нысандарын және мерзімдерін айқындайды.

2. Әкімшінің ағымдағы ақпаратты уәкілетті органға ұсыну тәртібі

3. Әкімші осы Қағидаларға 1-қосымшаға сәйкес нысан бойынша оңалту рәсімінің немесе осы Қағидаларға 2-қосымшаға сәйкес нысан бойынша банкроттық рәсімінің жүзеге асырылу барысы туралы ағымдағы ақпаратты (бұдан әрі – ағымдағы ақпарат) ай сайын, есептіден кейінгі айдың 5-күнінен кешіктірмей уәкілетті органға ұсынады.

Әкімші ағымдағы ақпаратта көрсетілген мәліметтерді растайтын құжаттардың көшірмелерін қоса бере отырып, ағымдағы ақпаратты ұсынады.

Бұрын уәкілетті органға жіберілген растайтын құжаттарды ұсыну талап етілмейді. Ағымдағы ақпаратқа жаңадан енгізілген мәліметтер бойынша растайтын құжаттар ұсынылады.

4. Ағымдағы ақпарат нысанның өзінен және ақпаратты егжей-тегжейлі көрсетуге арналған қосымшалардан тұрады.

5. Ағымдағы ақпаратты толтыру кезінде түзетуге, тазартуға және қолмен жөндеуге жол берілмейді.

6. Ағымдағы ақпаратқа қосымшада көрініс табатын деректер болмаған кезде ұсынылмайды.

7. Ағымдағы ақпаратқа қосымшаның парағында бар жолдардағы көрсеткіштердің саны асып кеткен жағдайда, қосымша ағымдағы ақпаратқа осыған ұқсас қосымшаның парағы толтырылады.

8. Әкімші ұсынатын қағаз жеткізгіштегі ағымдағы ақпаратқа әкімшінің өзі қол қояды және ол борышкердің мөрімен (бар болса) куәландырылады.

9. Әкімші ұсынатын электрондық жеткізгіштегі ағымдағы ақпарат Қазақстан Республикасының салық заңнамасына сәйкес электрондық салық төлеуші ретінде тіркелген борышкердің электрондық цифрлық қолтаңбасымен куәландырылады.

10. Әкімшінің ағымдағы ақпаратты ұсыну тәсіліне байланысты оны ұсынатын күн:

1) уәкілетті органның ағымдағы ақпаратты өзі келу тәртібімен қабылдаған;

2) почта немесе өзге де байланыс ұйымының ағымдағы ақпаратты хабарламасы бар тапсырыс хатпен почта арқылы қабылдағаны туралы белгі қойған;

3) ағымдағы ақпаратты электрондық түрде ұсынған жағдайда уәкілетті органның есептілікті қабылдау жүйесінің ағымдағы ақпаратты қабылдағаны туралы хабарламаны алған күні болып табылады.

11. Ағымдағы ақпарат нысаны уәкілетті органның сайтында орналастырылады.

3. Әкімшінің сұратылатын ақпаратты ұсыну тәртібі, нысаны және мерзімдері

12. Уәкілетті органның сұрау салуы негізінде, осы Қағидаларға 3-қосымшаға сәйкес, орындаудың неғұрлым ұзақ мерзімі осы сұрау салудың өзінде көрсетілген жағдайларды қоспағанда, әкімші сұрау салу келіп түскен күннен бастап он жұмыс күнінен кешіктірмей, уәкілетті органға оңалту рәсімінің немесе банкроттық рәсімінің жүзеге асырылу барысы туралы сұратылатын ақпарат бойынша түсініктемені (бұдан әрі – түсініктеме) осы Қағидаларға 4-қосымшаға сәйкес нысан бойынша береді.

13. Әкімшінің түсініктемені ұсыну тәсіліне байланысты оны ұсынатын күн:

1) уәкілетті органның түсініктемені өзі келу тәртібімен қабылдаған;

2) почта немесе өзге де байланыс ұйымының түсініктемені хабарламасы бар тапсырыс хатпен почта арқылы қабылдағаны туралы белгі қойған;

3) түсініктемені электрондық түрде уәкілетті органның электрондық мекенжайына жеткізген күні болып табылады.

14. Түсініктемеге әкімшінің өзі қол қояды және борышкердің мөрімен (бар болса) куәландырылады.

Әкімшінің оңалту рәсімінің немесе банкроттық рәсімінің жүзеге асырылу барысы туралы ағымдағы және сұратылатын ақпаратты ұсыну қағидаларына 1-қосымша

Нысан

Оңалту рәсімінің жүзеге асырылу барысы туралы ағымдағы ақпарат