Документ на казахском языке

Дәлдігі жоғары спутниктік навигация жүйесі ұлттық операторының спутниктік навигациялық қызметтерді ұйымдастыру және ұсыну қағидаларын бекіту туралы Қазақстан Республикасы Инвестициялар және даму министрінің 2015 жылғы 28 сәуірдегі № 496 бұйрығы. Қазақстан Республикасының Әділет министрлігінде 2015 жылы 5 қазанда № 12136 болып тіркелді

«Ғарыш қызметi туралы» Қазақстан Республикасының 2012 жылғы 6 қаңтардағы Заңының 9-бабы 1-тармағының 21) тармақшасына сәйкес БҰЙЫРАМЫН:

1. Қоса берiлiп отырған Дәлдігі жоғары спутниктік навигация жүйесі ұлттық операторының спутниктік навигациялық қызметтерді ұйымдастыру және ұсыну қағидалары бекiтiлсiн.

2. Қазақстан Республикасы Инвестициялар және даму министрлігінің Аэроғарыш комитеті (Т.А. Мұсабаев):

1) осы бұйрықтың Қазақстан Республикасының Әділет министрлігінде мемлекеттік тіркелуін;

2) осы бұйрық Қазақстан Республикасының Әділет министрлігінде мемлекеттік тіркелгеннен кейін күнтізбелік он күн ішінде оның көшірмесін мерзімдік баспа басылымдарында және «Әділет» ақпараттық-құқықтық жүйесінде ресми жариялауға жіберуді;

3) осы бұйрықты Қазақстан Республикасы Инвестициялар және даму министрлігінің интернет-ресурсында және мемлекеттік органдардың интранет-порталында тіркелуін;

4) осы бұйрық Қазақстан Республикасының Әділет министрлігінде мемлекеттік тіркелгеннен кейін он күн жұмыс күні ішінде Қазақстан Республикасы Инвестициялар және даму министрлігінің Заң департаментіне осы бұйрықтың 2-тармағының 1), 2) және 3) тармақшаларында көзделген іс-шаралардың орындалуы туралы мәліметтердің ұсынылуын қамтамасыз етсін.

3. Осы бұйрықтың орындалуын бақылау жетекшілік ететін Қазақстан Республикасының Инвестициялар және даму вице-министріне жүктелсiн.

4. Осы бұйрық оның алғаш ресми жарияланған күнінен кейін күнтізбелік он күн өткен соң қолданысқа енгізіледі.

Қазақстан Республикасының Инвестициялар және даму министрі Ә. Исекешев

«КЕЛІСІЛДІ» Қазақстан Республикасының Ұлттық экономика министрі _______________ Е. Досаев 2015 жылғы 27 тамыз

«КЕЛІСІЛДІ» Қазақстан Республикасының Ішкі істер министрі ______________ Қ. Қасымов 2015 жылғы 13 шілде

Қазақстан Республикасы Инвестиция және даму министрінің 2015 жылғы 28 сәуірдегі № 496 бұйрығымен бекітілген

Дәлдігі жоғары спутниктік навигация жүйесі ұлттық операторыныңспутниктік навигациялық қызметтерді ұйымдастыружәне ұсыну қағидалары

1. Жалпы ережелер

1. Осы Дәлдігі жоғары спутниктік навигация жүйесі ұлттық операторының спутниктік навигациялық қызметтерді ұйымдастыру және ұсыну қағидалары (бұдан әрі – Қағидалар) «Ғарыш қызметі туралы» Қазақстан Республикасының 2012 жылғы 6 қаңтардағы Заңының 9-бабы 1-тармағының 21) тармақшасына сәйкес әзірленді және дәлдігі жоғары спутниктік навигация жүйесі ұлттық операторының спутниктік навигациялық қызметтерді ұйымдастыру және ұсыну тәртібін белгілейді.

2. Осы Қағидаларда мынадай негізгі ұғымдар пайдаланылады:

1) дәлдігі жоғары спутниктік навигация жүйесі (бұдан әрі – ДЖСНЖ) – жерүсті және (немесе) ғарышта орналасатын техникалық құралдарды қамтитын жаһандық навигациялық спутниктік жүйені функционалдық толықтырулар;

2) дәлдігі жоғары спутниктік навигация жүйесінің ұлттық операторы (бұдан әрі – ДЖСНЖ операторы) – спутниктік навигациялық қызмет саласында технологиялық қамтамасыз етудің тұтастығын іске асыратын, сондай-ақ оны пайдалану негізінде қызметтер көрсететін Қазақстан Республикасының жоғары дәлдікті спутниктік навигация жүйесін басқаруды және пайдалануды жүзеге асыратын ұйым;

3) жаһандық навигациялық спутниктік жүйе (бұдан әрі – ЖНСЖ) – жерүсті, су және әуе объектілерінің координаттық-уақыттық (географиялық координаттары мен биіктіктерінің, қозғалыс жылдамдығы мен бағытының, уақыттың) параметрлерін айқындауға арналған ғарыш жүйесі;

4) навигациялық қызмет объектілері – навигация құралдарымен жабдықталған және (немесе) оларды навигациялық қызмет мақсатында пайдаланатын объектілер;

5) спутниктік навигациялық ақпарат – ұсынылу нысанына қарамастан, координаталық-уақыттық және навигациялық қамтамасыз ету міндеттерін шешу үшін пайдаланылатын заттар, фактілер және құбылыстар туралы мәліметтер (хабарламалар, деректер) жиынтығы;

6) спутниктік навигациялық қызметтерді тұтынушы (бұдан әрі – тұтынушы) – ДЖСНЖ операторының қызметтерін пайдаланатын заңды немесе жеке тұлға.

3. ДЖСНЖ операторы жылына бір реттен сиретпей ғарыш қызметі саласындағы уәкілетті органға алынған қызметтер мен қолданылатын аппаратураның түрі бөлігінде навигациялық қызметтер көрсетілген тұтынушылар жөнінде ақпарат береді.

2. ДЖСНЖ операторының спутниктік навигациялық қызметтерді ұйымдастыру тәртібі

4. Спутниктік навигациялық технологияларды енгізу, сондай-ақ Қазақстан Республикасының аумағында тұтынушыларды координаталық-уақыттық және навигациялық қамтамасыз ету дәлдігін, сенімділігі мен қол жетімділігін арттыру мәселелерін шешу мақсатында ЖНСЖ функционалдық толықтыру ретінде ДЖСНЖ құрады.

5. ЖНСЖ-ның функционалдық толықтыруларын қалыптастыру және одан әрі пайдалану міндеттері ДЖСНЖ-ның операторына жүктеледі.

6. Табиғи және техногендік сипаттағы төтенше жағдайлар туындаған кезде ДЖСНЖ операторы азаматтық қорғау саласындағы уәкілетті органмен өзара іс-қимылдар кезінде «Азаматтық қорғау туралы» 2014 жылғы 11 сәуірдегі Қазақстан Республикасының Заңына сәйкес төтенше жағдайлар туралы халықты ақпараттандыру және қауіпсіздік саласындағы іс-шараларды жүргізу үшін спутниктік навигациялық қызметтерді пайдаланудың абсолютті басымдығын қамтамасыз етеді.

3. ДЖСНЖ операторының спутниктік навигациялық қызметтерді ұсыну тәртібі

7. ДЖСНЖ операторы координаталық-уақыттық және навигациялық қызметтерді (бұдан әрі – қызметтер) тұтынушылардың өтінімі бойынша жүзеге асырады.

8. ДЖСНЖ операторы қызметтерді тарату, спутниктік навигациялық қызметтерді көрсету, пайдалану саласында мамандарды даярлау, қайта даярлау және біліктілігін арттыру жүйесін құрады және дамытады.

9. ДЖСНЖ операторы пайдаланушының өтінімін сұратылған ауданда қызметтерді көрсетуге техникалық мүмкіндігі тұрғысында бір жұмыс күн ішінде қарайды. Қарау нәтижелері бойынша ДЖСНЖ операторы пайдаланушыға қызметтер көрсету жөнінде келісім немесе дәлелді бас тарту жөнінде хабарламаны бір жұмыс күн ішінде жібереді.

10. Қызметті көрсету келісілген жағдайда тұтынушы хабарлама алғаннан кейін үш жұмыс күн ішінде ДЖСНЖ операторы мен тұтынушының арасында қызмет көрсетуге шарт жасасады.

Шартқа қол қойылған сәттен бастап бір жұмыс күн ішінде тұтынушы қызметке қосылады.