Асыл тұқымдық өнім (материал) мәртебесін беру (тоқтата тұру, күшін жою) қағидаларын бекіту туралы Қазақстан Республикасы Ауыл шаруашылығы министрінің 2015 жылғы 11 желтоқсандағы № 3-3/1084 бұйрығы Қазақстан Республикасының Әділет министрлігінде 2016 жылы 21 қаңтарда № 12897 болып тіркелді

«Асыл тұқымды мал шаруашылығы туралы» 1998 жылғы 9 шілдедегі Қазақстан Республикасы Заңының 13-бабының 26) тармақшасына сәйкес БҰЙЫРАМЫН:

1. Қоса беріліп отырған асыл тұқымдық өнім (материал) мәртебесін беру (тоқтата тұру, күшін жою) қағидалары бекітілсін.

2. «Асыл тұқымды мал мәртебесін беру қағидаларын бекіту туралы» Қазақстан Республикасы Ауыл шаруашылығы министрінің 2015 жылғы 14 сәуірдегі № 3-2/331 бұйрығының (Нормативтік құқықтық актілерді мемлекеттік тіркеу тізілімінде № 11092 болып тіркелген, 2015 жылғы 28 мамырда «Егемен Қазақстан» газетінде, 2015 жылғы 12 маусымда «Әділет» ақпараттық-құқықтық жүйесінде жарияланған) күші жойылды деп танылсын.

3. Қазақстан Республикасы Ауыл шаруашылығы министрлігінің Мал шаруашылығы өнімдерін өндіру және қайта өңдеу департаменті заңнамада белгіленген тәртіппен:

1) осы бұйрықтың Қазақстан Республикасы Әділет министрлігінде мемлекеттік тіркелуін;

2) осы бұйрық Қазақстан Республикасы Әділет министрлігінде мемлекеттік тіркелгеннен кейін күнтізбелік он күн ішінде оның көшірмесінің мерзімді баспа басылымдарында және «Әділет» ақпараттық-құқықтық жүйесінде ресми жариялауға жіберілуін; 

3) осы бұйрықтың Қазақстан Республикасы Ауыл шаруашылығы министрлігінің интернет-ресурсында және мемлекеттік органдардың интранет-порталында орналастырылуын қамтамасыз етсін. 

4. Осы бұйрықтың орындалуын бақылау жетекшілік ететін Қазақстан Республикасының Ауыл шаруашылығы вице-министріне жүктелсін.

5. Осы бұйрық алғашқы ресми жарияланған күнінен кейін күнтізбелік жиырма бір күн өткен соң қолданысқа енгізіледі, бірақ 2016 жылғы 2 маусымнан ерте қолданысқа енгізілмейді.

Қазақстан Республикасының Ауыл шаруашылығы министрі А. Мамытбеков

1. Осы Асыл тұқымдық өнім (материал) мәртебесін беру (тоқта тұру, күшін жою) қағидалары (бұдан әрі - Қағидалар) «Асыл тұқымды мал шаруашылығы туралы» 1998 жылғы 9 шілдедегі Қазақстан Республикасы Заңының 13-бабының 26) тармақшасына сәйкес әзірленген және асыл тұқымдық өнім (материал) мәртебесін беру (тоқтата тұру, күшін жою) тәртібін айқындайды.

2. Асыл тұқымдық өнім (материал) мәртебесін тұқым бойынша, өнімділік бағытындағы және ауыл шаруашылығы малдарының түрлері бойынша республикалық палаталар (бұдан әрі - Палата) береді.

3. Асыл тұқымдық өнім (материал) мәртебесі малдың әр басына, бал ара ұясына жеке беріледі.

4. Асыл тұқымдық өнім (материал) мәртебесі малдың тіршілігі кезінде бір рет беріледі.

5. Осы Қағидаларда фенотиптік көрсеткіштер болып малдың сыртқы, соның ішінде түсі және дене бітімі бойынша айқын білінетін белгілерінің жиынтығы түсініледі. 

6. Асыл тұқымды мал мәртебесі Қазақстан Республикасы Ауыл шаруашылығы министрінің 2015 жылғы 30 қаңтардағы № 7-1/68 бұйрығымен (Нормативтік құқықтық актілерді мемлекеттік тіркеу тізілімінде № 11127 болып тіркелген) бекітілген Ауыл шаруашылығы жануарларын бірдейлендіру қағидаларына сәйкес бірдейлендірілген (бал ара ұяларын, қояндарды, аңдарды және балықты қоспағанда), сондай-ақ Қазақстан Республикасы Ауыл шаруашылығы министрінің 2012 жылғы 20 шілдедегі № 3-3/373 бұйрығымен (Нормативтік құқықтық актілерді мемлекеттік тіркеу тізілімінде № 7864 болып тіркелген) бекітілген Селекциялық және асыл тұқымдық жұмыстың ақпарат қорын жүргізу қағидаларына сәйкес тіркелген ауыл шаруашылығы жануарларына беріледі.

7. Асыл тұқымды мал мәртебесін алуға үмітті ауыл шаруашылығы малының иесі жеке немесе заңды тұлғалардың (бұдан әрі – Өтініш беруші) Палатаға мүшелік болуы қажет емес.

8. Асыл тұқымды мал мәртебесін Палата бірінші және екінші санаттағы ірі қара малдарға береді.

9. Асыл тұқымдық мал мәртебесін беру үшін ірі қара малдың қажетті ең төменгі жасы алты айды құрайды.

10. Бірінші санаттағы асыл тұқымды ірі қара мал мәртебесі ол мынадай өлшемшарттарға сәйкес болған кезде беріледі:

10-тармақ жаңа редакцияда жазылды ҚР Ауыл шаруашылығы министрінің 19.12.2019 жылғы № 441 Бұйрығына сәйкес (11.12.2015 ж. редакцияны қараңыз)(өзгерту 10.01.2020 жылдан бастап қолданысқа енгізіледі)

1) өнімділіктің етті бағыттағы тұқымдары үшін:

жануар тегінің әкесі және енесі жағынан кемінде үш қатары бойынша тұқым-тегі туралы дұрыс мәліметтердің болуы;

әкесі жағынан дұрыстығын айқындайтын генетикалық сараптаманың болуы (Қазақстан Республикасы аумағында туылған жануарлар үшін);

асыл тұқымдық құндылығының индекстік бағалауы, оның ішінде төлдеу жеңілдігі, туған кездегі салмағы, енесінен айырған кездегі салмағы және тиісті жасқа жеткен кезде бір жастағы салмағы бойынша индекстік бағалауы болуы;

таза тұқымдылық;

қолдан ұрықтандыру немесе эмбрионды транспланттау немесе Best Linear Unbiased Prediction (BLUP) әдістемесіне сәйкес индекстік жүйе бойынша бағасы бар бірінші санаттағы асыл тұқымды бұқамен (қазақтың ақбас және әулиекөл тұқымдары үшін) шағылыстыру нәтижесінде алынуы;

тұқым стандартына сәйкестігі (Палата өзінің интернет-ресурсында жануарлардың тиісті тұқым стандартының көрсеткіштерінен төмен емес фенотиптік көрсеткіштерін орналастырады);

2) өнімділіктің сүтті-етті және сүтті бағыттағы тұқымдары үшін:

жануар тегінің кемінде үш қатары бойынша тұқым-тегі туралы дұрыс мәліметтердің болуы;

қолдан ұрықтандыру немесе эмбрионды транспланттау нәтижесінде алынуы;

әкесі жағынан генетикалық сараптаманың болуы;

асыл тұқымдық құндылығының индекстік бағалауы, оның ішінде өнімділігі, сыртқы бейнесі және соматикалық клеткалардың саны бойынша индекстік бағалауы болуы;

таза тұқымдылық;

тұқым стандартына сәйкестігі (Палата өзінің интернет-ресурсында жануарлардың тиісті тұқым стандартының көрсеткіштерінен төмен емес фенотиптік көрсеткіштерін орналастырады).

11. Жануарға екінші санаттағы асыл тұқымды ірі қара мал мәртебесі ол мынадай өлшемшарттарға сәйкес болған кезде беріледі:

11-тармақ жаңа редакцияда жазылды ҚР Ауыл шаруашылығы министрінің 19.12.2019 жылғы № 441 Бұйрығына сәйкес (11.12.2015 ж. редакцияны қараңыз)(өзгерту 10.01.2020 жылдан бастап қолданысқа енгізіледі)

1) өнімділіктің етті бағыттағы тұқымдары үшін:

жануар тегінің кемінде үш қатарын көрсете отырып, әкесі жағынан тұқым-тегі туралы дұрыс мәліметтердің болуы (барлық бірінші санаттағы әлеуетті әкелер көрсетіледі);

экспорттаушы елдердің қағидаларына сәйкес импорттық жануарлар үшін тұқым-тегі туралы дұрыс мәліметттердің болуы;

тірі салмағы, төлдеу жеңілдігі бойынша абсолюттік көрсеткіштер деректерінің болуы (экспорттаушы елдердің қағидаларына сәйкес импорттық жануарлар үшін);

таза тұқымдылық;

тұқым стандартына сәйкестігі (Палата өзінің интернет-ресурсында жануарлардың тиісті тұқым стандартының көрсеткіштерінен төмен емес фенотиптік көрсеткіштерін орналастырады);

2) өнімділіктің сүтті-етті және сүтті бағыттағы тұқымдары үшін:

жануар тегінің кемінде үш қатары бойынша тұқым-тегі туралы дұрыс мәліметтердің болуы;