Қазақстан Республикасы Білім және ғылым министрінің міндетін атқарушының 2015 жылғы 31 желтоқсандағы № 717 бұйрығына 2-қосымша

1. Осы Мектепке дейінгі білім беру ұйымдарында, жетім балалар мен ата-аналарының қамқорлығынсыз қалған балаларға арналған білім беру ұйымдарында тәрбие алатын және оқитын балаларды тамақтандыруды қамтамасыз етуге байланысты тауарларды сатып алу қағидалары (бұдан әрі – Қағидалар) мектепке дейінгі тәрбие мен оқытудың оқу бағдарламаларын іске асыратын мемлекеттік мекемелердің (бұдан әрі – ММ), мемлекеттік коммуналдық қазыналық кәсіпорындардың (бұдан әрі – МКҚК), шаруашылық жүргізу құқығындағы мемлекеттік кәсіпорындардың (бұдан әрі – ШЖҚМК) ұйымдық-құқықтық нысанында құрылған білім беру ұйымдарында, сондай-ақ жетім балалар, ата-аналарының қамқорлығынсыз қалған балаларға арналған ұйымдарда тәрбие алатын және оқитын балаларды тамақтандыруды қамтамасыз етуге байланысты тауарларды сатып алудың тәртібін белгілейді.

1-тармақ жаңа редакцияда жазылды ҚР Білім және ғылым министрінің м.а. 22.02.2017 жылғы № 76 Бұйрығына сәйкес (31.12.2015 ж. редакцияны қараңыз)(алғашқы ресми жарияланғаннан кейін күнтізбелік 10 (он) күн өткен соң қолданысқа енгізілуі тиіс)
21.04.2017 жылы "ҚР НҚА электрондық түрдегі эталондық бақылау банкі" ақпараттық жүйесінде жарияланды

2. Қағидаларда мынадай ұғымдар пайдаланылады:

1) әлеуетті өнім беруші – тауарлардың жеткізілімі туралы шарт жасасуға үмiткер, кәсiпкерлiк қызметтi жүзеге асыратын жеке тұлға, заңды тұлға (егер Қазақстан Республикасының заңдарында олар үшiн өзгеше белгiленбесе, мемлекеттiк мекемелердi қоспағанда), заңды тұлғалардың уақытша бiрлестiгi (консорциум);

2) бюджет – мемлекеттік мекеменің бюджеті.

3) интернет-ресурс – аппараттық-бағдарламалық кешенде орналастырылатын, бірегей желілік адресі және (немесе) домендік аты бар және Интернетте жұмыс істейтін, мәтіндік, графикалық, аудиокөрінімді немесе өзге де түрде бейнеленетін электрондық ақпараттық ресурс;

4) конкурсқа қатысуға өтінім – конкурстық құжаттамаға сәйкес жасалған, тауарларды жеткізу үшін материалдық, қаржылық және еңбек ресурстарына ие екенін растайтын, әлеуетті өнім беруші ұсынатын құжаттар;

5) конкурстық комиссия – конкурс өткізуге конкурсты ұйымдастырушы құратын алқалы орган;

6) конкурстық құжаттама – әлеуетті өнім берушіге конкурсқа қатысуға өтінім дайындау үшін және конкурс өткізу шарттары мен тәртібі қамтылған конкурсты ұйымдастырушы ұсынатын құжаттар;

7) конкурсты ұйымдастыру және өткізу рәсімі – әлеуетті өнім берушімен тауарларды жеткізу туралы шарт жасасу мақсатында конкурсты ұйымдастырушы Қағидаларға сәйкес жүзеге асыратын өзара байланысты, жүйелі іс-шаралар кешені;

8) конкурсты ұйымдастырушы (тапсырыс беруші) – ММ ұйымдық-құқықтық нысанында құрылған мектепке дейінгі білім беру ұйымы, жетім балалар мен ата-аналарының қамқорлығынсыз қалған балаларға арналған білім беру ұйымы немесе ММ ұйымдық-құқықтық нысанында құрылған мектепке дейінгі білім беру ұйымы, жетім балалар мен ата-аналарының қамқорлығынсыз қалған балаларға арналған білім беру ұйымы бухгалтерлік есепті өз бетінше жүргізбеген жағдайда, білім беру органы;

9) қаржы жылы – ағымдағы жылғы 1 қаңтарда басталып, 31 желтоқсанда аяқталатын уақыт аралығы;

10) мемлекеттік мекеме (ММ) – басқарушылық, әлеуметтік-мәдени немесе коммерциялық емес сипаттағы өзге де функцияларды жүзеге асыру үшін мемлекет құрған және қаржыландырудың қосымша көздері Қазақстан Республикасының заңдарында белгіленбесе, тек қана бюджет немесе Қазақстан Республикасы Ұлттық Банкінің бюджеті (шығыстар сметасы) есебінен қамтылатын коммерциялық емес ұйым;

11) мемлекеттік коммуналдық қазыналық кәсіпорын (МКҚК) – мемлекет жедел басқару құқығында бөліп берген мүлкі бар коммуналдық коммерциялық ұйым;

12) шаруашылық жүргізу құқығындағы мемлекеттік кәсіпорын (ШЖҚМК) – мемлекет шаруашылық жүргізу құқығында бөліп берген мүлкі бар және өз міндеттемелері бойынша өзіне тиесілі барлық мүлкімен жауап беретін коммерциялық ұйым;

13) отандық тауар өндірушілерді қолдау – 2015 жылғы 29 қазандағы Қазақстан Республикасының Кәсіпкерлік Кодексінің 17-бабының 1-тармағына сәйкес тауарлардың отандық өндірісін дамытуды ынталандыру үшін қолайлы жағдайлар жасау жөніндегі шаралар;

14) өнім беруші – кәсiпкерлiк қызметтi жүзеге асыратын жеке тұлға немесе тауарлардың жеткізілімі туралы шарт жасасқан заңды тұлға;

15) өнім берушінің біліктілік талаптары – тауарлардың жеткізілімі туралы шарт бойынша міндеттемелерді орындау үшін жеткілікті, материалдық, қаржылық және еңбек ресурстарына ие екенін растайтын құжаттар тізбесі.

16) тауар – мектепке дейінгі білім беру ұйымдарында, жетім балалар мен ата-аналарының қамқорлығынсыз қалған балаларға білім беру ұйымдарында тәрбиеленуші және білім алушы балаларды тамақтандыруды қамтамасыз етуге байланысты тауар;

17) тауарларды жеткізушілерді таңдау өлшемшарттары – әлеуетті өнім берушінің тауарларды жеткізу бойынша мүмкіндіктері мен жағдайларын бағалау негізінде жасалатын белгілер;

18) тауарларды сатып алу – тапсырыс берушінің тауарларды осы Қағидаларда белгіленген тәртіпте сатып алуы;

19) шарт – тапсырыс беруші мен өнім беруші арасында тауарлардың жеткізілімі туралы жасалған азаматтық-құқықтық шарт;

3. Конкурсты ұйымдастырушы конкурс өткізу кезінде мынадай қағидаттарды негізге алады:

1) сатып алу үшін пайдаланылатын ақшаны оңтайлы және тиімді жұмсау;

2) әлеуетті өнім берушілерге конкурсты өткізу рәсіміне қатысуы үшін тең жағдай жасау;

3) әлеуетті өнім берушілер арасындағы адал бәсекелестік;

4) конкурс процесінің жариялылығы және айқындылығы;

5) отандық тауарларды өндірушілерге қолдау көрсету.

4. Тауарларды сатып алу процесі мыналарды қамтиды:

1) тауарларды сатып алу жоспарын қалыптастыру және бекіту;

2) тауарларды жеткізушілерді таңдау және олармен шарт жасасу;

3) шартты орындау.

Тауарларды сатып алудың бекітілген жоспарында көзделмеген тауарларды сатып алуға жол берілмейді.

5. Конкурсты ұйымдастырушы немесе МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының басшысы осы Қағидаларға 1-қосымшаға сәйкес нысан бойынша тауарларды сатып алу жоспарын әзірлейді және бекітеді.

Тауарларды сатып алу жоспарын конкурсты ұйымдастырушы тиісті бюджет бекітілген күнінен бастап он жұмыс күні ішінде бекітеді.

МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымдарда тауарларды сатып алу жоспары қаржы жылының желтоқсан айында бекітіледі.

6. Тауарларды сатып алу жоспары конкурсты ұйымдастырушының немесе МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымдарының қызметін қамтамасыз ету және міндеттері мен функцияларына қол жеткізу үшін тауарларға деген қажеттілік негізінде қаржы жылына қалыптастырылады.

7. Конкурсты ұйымдастырушы немесе МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының басшысы тауарларды сатып алу жоспары бекітілген күнінен бастап бес жұмыс күні ішінде оны конкурсты ұйымдастырушының, МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының немесе конкурсты ұйымдастырушының, МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының жеке интернет-ресурсы болмаған жағдайда білім беру органының интернет-ресурсында және (немесе) тиісті әкімшілік-аумақтық бірліктің аумағында таратылатын мерзімді баспасөз басылымдарында орналастырады.

8. Тауарларды сатып алу туралы шешімді тауарларды сатып алудың бекітілген жоспарының негізінде конкурстық комиссия немесе МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының басшысы қабылдайды.

9. Тауарларды сатып алу жоспарына өзгерістер және (немесе) толықтырулар енгізуге жол беріледі.

Тауарларды сатып алу жоспарына өзгерістер және (немесе) толықтырулар енгізу тапсырыс берушінің бюджетіне өзгерістер және (немесе) толықтырулар енгізілген жағдайларда жүзеге асырылады.

10. Конкурсты ұйымдастырушы немесе МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының басшысы тауарларды сатып алу жоспарына өзгерістер және (немесе) толықтырулар енгізу туралы шешім қабылданған күнінен бастап бес жұмыс күні ішінде, енгізілген өзгерістерді және (немесе) толықтыруларды конкурсты ұйымдастырушының, МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының немесе конкурсты ұйымдастырушының, МКҚК, ШЖҚМК ұйымдық-құқықтық нысанында құрылған мектепке дейінгі білім беру ұйымының жеке интернет-ресурсы болмаған жағдайда білім беру органының интернет-ресурсында және (немесе) тиісті әкімшілік-аумақтық бірліктің аумағында таратылатын мерзімді баспасөз басылымдарында орналастырады.

11. ММ ұйымдық-құқықтық нысанында құрылған мектепке дейінгі білім беру ұйымдарында, жетім балалар мен ата-аналарының қамқорлығынсыз қалған балаларға арналған білім беру ұйымдарында тәрбиеленуші және білім алушы балаларды тамақтандыруды қамтамасыз етуге байланысты тауарлар сатып алуды конкурстық негізде конкурсты ұйымдастырушы жүзеге асырады. Егер конкурсты ұйымдастырушы білім беру органы болған жағдайда, соңғысы конкурсты ММ ұйымдық-құқықтық нысанында құрылған мектепке дейінгі білім беру ұйымдары, жетім балалар мен ата-аналарының қамқорлығынсыз қалған балаларға арналған білім беру ұйымдары бойынша лоттар бөлінісінде өткізеді.

Отандық тауар өндірушілерді қолдау үшін конкурсты ұйымдастырушы техникалық тапсырмада тауарларды жеткізушіні таңдау кезінде әлеуетті өнім берушілерге тамақ өнімдерін кемінде 80% (сексен пайыз) мөлшерінде отандық тауар өндірушілерден сатып алу туралы талаптарды қарастырады.

12. Тауарларды сатып алу рәсімі мынадай жүйелі іс-шараларды орындауды көздейді: