Қазақстан Республикасының Салық кодексінің 49-бабының 4-тармағының төртінші бөлігіне, 81-бабының 1) және 3) тармақтарына, 82-бабының 1-тармағының 5) тармақшасына, 88-бабының 3-тармағына, сондай-ақ 142-бабының 1), 5) және 10-тармақтарына сәйкес БҰЙЫРАМЫН:

1. Қоса беріліп отырған:

1) осы бұйрыққа 1-қосымшаға сәйкес тауарларды өткізу, жұмыстарды орындау және қызметтер көрсету бойынша айналымның іс жүзінде жасалғанын растау туралы хабарлама нысаны;

2) осы бұйрыққа 2-қосымшаға сәйкес тауарларды өткізу, жұмыстарды орындау және қызметтер көрсету бойынша айналымның іс жүзінде жасалғанын растау туралы хабарламаны орындалмаған деп тану туралы шешім нысаны;

3) осы бұйрыққа 3-қосымшаға сәйкес электрондық шот-фактураларды жазып беруді тоқтата тұру туралы шешім нысаны;

4) осы бұйрыққа 4-қосымшаға сәйкес электрондық шот-фактураларды жазып беруді тоқтата тұрудың күшін жою туралы шешім нысаны;

5) осы бұйрыққа 5-қосымшаға сәйкес тауарларды өткізу, жұмыстарды орындау және қызметтер көрсету бойынша айналымның іс жүзінде жасалғанын растау туралы хабарламаны орындамаған салық төлеушімен өзара есеп айырысу фактісі туралы хабарлама нысаны;

6) осы бұйрыққа 6-қосымшаға сәйкес тауарларды өткізу, жұмыстарды орындау және қызметтер көрсету бойынша айналымның іс жүзінде жасалғанын растау туралы хабарламасы орындалмаған деп танылған салық төлеушімен өзара есеп айырысу фактісі туралы хабарлама нысаны бекітілсін.

2. Осы бұйрыққа 7-қосымшаға сәйкес Қазақстан Республикасы Қаржы министрлігінің кейбір бұйрықтарының күші жойылды деп танылсын.

3. Қазақстан Республикасы Қаржы министрлігінің Мемлекеттік кірістер комитеті Қазақстан Республикасының заңнамасында белгіленген тәртіппен:

1) осы бұйрықтың Қазақстан Республикасының Әділет министрлігінде мемлекеттік тіркелуін;

2) осы бұйрық ресми жарияланғаннан кейін оны Қазақстан Республикасы Қаржы министрлігінің интернет-ресурсында орналастыруды;

3) осы бұйрық Қазақстан Республикасының Әділет министрлігінде мемлекеттік тіркелгеннен кейін он жұмыс күні ішінде осы тармақтың 1) және 2) тармақшасында көзделген іс-шаралардың орындалуы туралы мәліметтерді Қазақстан Республикасы Қаржы министрлігінің Заң қызметі департаментіне ұсынуды қамтамасыз етсін.

4. Осы бұйрық 2026 жылғы 1 қаңтардан бастап қолданысқа енгізіледі және ресми жариялануға тиіс.

Қазақстан Республикасының Қаржы министрі М. Такиев