1. «Ақпараттық жүйелерді, бағдарламалық өнімдерді, бағдарламалық кодтар мен нормативтік-техникалық құжаттаманы депозитке салу» мемлекеттік қызметі (бұдан әрі – мемлекеттік қызмет) «Мемлекеттік техникалық қызмет» шаруашылық жүргізу құқығындағы республикалық мемлекеттік кәсіпорны (бұдан әрі – қызмет беруші) «Қазақстан Республикасы Көлік және коммуникация министрлігінің ақпараттандыру саласында мемлекеттік қызметтер көрсету мәселелері туралы» Қазақстан Республикасының 2014 жылғы 24 ақпандағы № 136 қаулысымен бекітілген «Ақпараттық жүйелерді, бағдарламалық өнімдерді, бағдарламалық кодтар мен нормативтік-техникалық құжаттаманы депозитке салу» мемлекеттік қызмет көрсету стандарты (бұдан әрі- Стандарт) негізінде көрсетеді.

2. Мемлекеттік қызметті көрсету нысаны: қағаз түрінде.

3. Көрсетілетін мемлекеттік қызметтің нәтижесі депозитке салу объектісінің депозитарийде тіркелгені туралы қағаз тасығыштағы анықтама беру (бұдан әрі – анықтама), немесе қызмет көрсетуден бас тарту туралы дәлелді жауап болып табылады.

4. Қызмет берушінің Стандарттың 8-тармағында қарастырылған құжаттардың тізбесін алуы мемлекеттік қызмет көрсету рәсімін (әрекеттерін) бастау үшін негіз болып табылады. 

5. Мемлекеттік қызмет көрсету процессінің құрамына кіретін әрбір рәсімнің (әрекеттің) мазмұны, оның орындалу уақытының ұзақтығы:

1) қызмет берушінің кеңсесінің қызметкері қызмет алушыдан құжаттарды алған сәттен бастап бір сағат ішінде депозитке салу өтінімі мен депозитке салу объектілері қоса берілген кіріс корреспонденциясын (бұдан әрі - корреспонденция) қабылдауды, ашуды, реттеуді және тіркеу журналында тіркеуді жүзеге асырады және қызмет берушінің басшысына (бұдан әрі - Басшы) қарауға береді;

2) Басшы құжаттар кеңседен түскен сәттен бастап бір сағаттың ішінде қызмет алушының корреспонденциясын қарайды және Ақпараттық қауіпсіздік департаментінің (бұдан әрі - Департамент) директорына қарау үшін ұсынады;

3) Департаменттің директоры қызмет алушының корреспонденциясы түскен сәттен бастап бір сағаттың ішінде депозитке салу өтінімі мен депозитке салу объектілерін қарайды және оларды Департаменттің директоры орынбасарына қарау үшін тапсырады;

4) Департамент директорының орынбасары қызмет алушының корреспонденциясы түскен сәттен бастап екі сағаттың ішінде депозитке салу өтінімі мен депозитке салу объектілерін қарайды және оны қарауды Мемлекеттік тіркелім және депозитарий бөлімінің (бұдан әрі - Бөлім) басшысына тапсырады;

5) Бөлім басшысы қызмет алушының корреспонденциясы түскен сәттен бастап үш сағаттың ішінде депозитке салу өтінімі мен депозитке салу объектілерін қарайды және оны қарауды Бөлімнің жетекші маманына тапсырады;

6) Бөлімнің жетекші маманы қызмет алушының корреспонденциясы түскен сәттен бастап жеті жұмыс күні аралығында депозитке салу өтінімін қарап, онда көрсетілген депозитке салу объектісінің толымдылығы мен депозитке салу объектісінің материалдарының сәйкестігін тексереді;

7) Бөлімнің жетекші маманы бес жұмыс күні ішінде Бағдарламалық өнімдер, бағдарламалық кодтар және нормативтік-техникалық құжаттамалар туралы тиісті мәліметтерді Депозитке салынған бағдарламалық өнімдердің тізіліміне (бұдан әрі - Тізілім) енгізеді;

8) Бөлімнің жетекші маманы бес жұмыс күні ішінде депозитке салу объектілеріне Тізілімге сәйкес депозиттік нөмірлер меншіктейді;

9) Бөлімнің жетекші маманы бір күннің ішінде анықтаманы және ілеспе хаттың жобасын дайындайды, Бөлімнің және Департаменттің басшыларымен келіседі және оларды Басшыға қол қоюға ұсынады;

10) Басшы төрт сағаттың ішінде ілеспе хаттың жобасы мен анықтамаға қол қояды және оларды кеңсеге жібереді;

11) қызмет берушінің кеңсесінің қызметкері қол қойылған анықтама мен ілеспе хатты төрт сағаттың ішінде пошта немесе курьерлік қызмет арқылы қызмет алушыға жолдайды.