«Почта туралы» Қазақстан Республикасының 2003 жылғы 8 ақпандағы Заңының 8-бабы 1-тармағының 2-1), 5) және 7) тармақшасына сәйкес Қазақстан Республикасының Үкіметі ҚАУЛЫ ЕТЕДІ:

1. Қоса беріліп отырған тағайындалған операторды тағайындау және өкілеттігін кері қайтарып алу қағидалары бекітілсін.  

2. Қазақстан Республикасы Үкіметінің кейбір шешімдеріне мынадай өзгерістер мен толықтырулар енгізілсін:

«Почта байланысы қызметтерін көрсету қағидаларын және Почта жөнелтiмдерiнде почта мөртабанын қолдану қағидалары н бекіту туралы» Қазақстан Республикасы Үкіметінің 2012 жылғы 16 қаңтардағы № 72 қаулысында (Қазақстан Республикасының ПҮАЖ-ы, 2012 ж., № 24, 339-бет, Қазақстан Республикасының ПҮАЖ-ы, 2014 ж., № 5, 50-бет):

осы қаулымен бекітілген Почта байланысы қызметтерін көрсету қағидаларында:

1-тармақ мынадай редакцияда жазылсын:

«1. Осы Почта байланысы қызметтерін көрсету қағидалары (бұдан әрі – Қағидалар) «Почта туралы» Қазақстан Республикасының 2003 жылғы 8 ақпандағы Заңына, Қазақстан Республикасы ратификациялаған халықаралық шарттарға сәйкес әзірленді және почта операторлары, Ұлттық почта операторы мен тағайындалған оператор пайдаланушыларға почта байланысы қызметтерін көрсету тәртібін айқындайды.»;

2-тармақтың 1) тармақшасы мынадай редакцияда жазылсын:

«1) почта байланысының әмбебап қызметтерін көрсету, олар почта жәшіктерінен жиналып алынған және (немесе) операциялық терезелер арқылы қабылданған жай хаттарды, почталық карточкаларды және бандерольдерді жіберуді білдіреді;»;

3-тармақта:

5) және 6) тармақшалар мынадай редакцияда жазылсын:  

«5) Дүниежүзілік почта одағы (бұдан әрі - ДПО) – аумағында халықаралық почта жөнелтімдерімен өзара алмасу үшін біртұтас почта аумағын құрайтын мүше-елдерден тұратын, мақсаты почта байланыстарын ұйымдастыру мен жетілдіруді қамтамасыз ету және осы салада халықаралық ынтымақтастықты дамыту үшін қолайлы жағдайлар жасау болып табылатын халықаралық ұйым;

6) Дүниежүзілік почта одағының актілері (бұдан әрі - ДПО актілері) –Дүниежүзілік почта одағының Конгресінде Дүниежүзілік почта одағының Жарғысына сәйкес қабылданатын құжаттар;»;

25) тармақша мынадай редакцияда жазылсын:  

«25) халықаралық почта жөнелтімі – Қазақстан Республикасы аумағының шегінен тыс жерге жіберу үшін қабылданатын, Қазақстан Республикасының аумағына келіп түсетін не Қазақстан Республикасының аумағы арқылы транзитпен өтетін және ДПО Актілерінде көзделген құжаттармен бірге жүретін почта жөнелтімі;»;  

2-бөлім мынадай мазмұндағы 8-1-тармақпен толықтырылсын:  

«8-1. Тағайындалған оператор және почта операторы халықаралық почта жөнелтімін ДПО актілерінде көзделген ілеспе құжаттарымен қамтамасыз етеді.