Қазақстан Республикасы ұлттық қауіпсіздік органдарының қызметін одан әрі жетілдіру жөніндегі шаралар туралы Қазақстан Республикасы Президентінің 2014 жылғы 14 қарашадағы № 954 Жарлығы

«Қазақстан Республикасының Президенті туралы» 1995 жылғы 26 желтоқсандағы Қазақстан Республикасы Конституциялық заңының 17-1-бабына сәйкес ҚАУЛЫ ЕТЕМІН:

1. «Қазақстан Республикасы Ұлттық қауіпсіздік комитетінің Арнаулы ақпараттық қызметі» мемлекеттік мекемесі:

1) оны мынадай мемлекеттік мекемелерге:

«Қазақстан Республикасы Ұлттық қауіпсіздік комитетінің Үкіметтік байланыс қызметі» - Қазақстан Республикасы Ұлттық қауіпсіздік комитетінің ведомствосына;

«Қазақстан Республикасы Ұлттық қауіпсіздік комитетінің Арнайы техникалық әзірлемелер орталығы» - Қазақстан Республикасы Ұлттық қауіпсіздік комитетіне ведомстволық бағынысты мемлекеттік мекемеге бөлу арқылы;

2) оның жедел іздестіру қызметі субъектілерінің тапсырмалары бойынша арнайы жедел іздестіру іс-шараларын ұйымдастыру, сондай-ақ радиоэлектрондық және радиотехникалық барлау саласындағы функциялары мен өкілеттіктерін Қазақстан Республикасы Ұлттық қауіпсіздік комитетіне беру арқылы қайта ұйымдастырылсын.

2. Қоса беріліп отырған:

1) Қазақстан Республикасы Ұлттық қауіпсіздік комитетінің Үкіметтік байланыс қызметі туралы ереже;

1-тармақша жаңа редакцияда жазылды ҚР Президентінің 05.07.2022 жылғы № 955 Жарлығына сәйкес (17.05.2022 ж. редакцияны қараңыз)

2) Қазақстан Республикасы Президентінің кейбір жарлықтарына енгізілетін өзгерістер мен толықтырулар бекітілсін.

3. Көрсетілген мемлекеттік мекемелерді қаржыландыру Қазақстан Республикасы Ұлттық қауіпсіздік комитетіне тиісті қаржы жылына республикалық бюджетте көзделген қаражат есебінен және шегінде жүзеге асырылады деп белгіленсін.

4. Қазақстан Республикасы Ұлттық қауіпсіздік комитеті Арнаулы ақпараттық қызметінің қарамағындағы аумақтық органдар осы Жарлыққа қосымшаға (құпия) сәйкес таратылсын. 

5. Қазақстан Республикасы Ұлттық қауіпсіздік комитеті заңнамада белгіленген тәртіппен осы Жарлықтан туындайтын шаралардың қабылдануын қамтамасыз етсін.

6. Осы Жарлық, Қазақстан Республикасы Президентінің кейбір жарлықтарына енгізілетін өзгерістер мен толықтырулардың 2015 жылғы 1 қаңтардан бастап қолданысқа енгізілетін 1-тармағының сегізінші, тоғызыншы, он төртінші, он бесінші, жиырма үшінші, жиырма төртінші, отыз бесінші, алпыс алтыншы, алпыс жетінші, алпыс сегізінші, алпыс тоғызыншы, жетпісінші, жетпіс бірінші, жетпіс екінші, жүз он бірінші және жүз он екінші абзацтарын қоспағанда, қол қойылған күннен бастап қолданысқа енгізіледі.

Қазақстан Республикасының Президенті Н.Назарбаев

1. Қазақстан Республикасы Ұлттық қауіпсіздік комитетінің Үкіметтік байланыс қызметі (бұдан әрі – Қызмет) Қазақстан Республикасы Ұлттық қауіпсіздік комитетінің (бұдан әрі – ҰҚК) мемлекеттік органдарында, ұйымдарында, Қазақстан Республикасының Қарулы Күштерінде, басқа да әскерлері мен әскери құралымдарында басшылықты және үкіметтік байланыспен қамтамасыз ету мен шифрлау жұмысын ұйымдастыруды жүзеге асыратын ведомствосы болып табылады, сондай-ақ Қазақстан Республикасында үкіметтік байланысты қамтамасыз ететін уәкілетті орган, Қазақстан Республикасы шифрлау қызметінің орталық органы болып табылады.

2. Қызмет өз қызметін Қазақстан Республикасының Конституциясына және заңдарына, Қазақстан Республикасы Президентінің актілеріне және өзге де нормативтік құқықтық актілерге, сондай-ақ осы Ережеге сәйкес жүзеге асырады.

3. Қызмет республикалық мемлекеттік мекеме ұйымдық-құқықтық нысанындағы заңды тұлға болып табылады, оның қазақ тіліндегі өз атауы бар мөрлері мен мөртаңбалары, белгіленген үлгідегі бланкілері, сондай-ақ Қазақстан Республикасының заңнамасына сәйкес қазынашылық органдарында шоттары болады.

4. Қызмет азаматтық-құқықтық қатынастарға өз атынан түседі.

5. Қызметтің, егер оған Қазақстан Республикасының заңнамасына сәйкес уәкілеттік берілген болса, мемлекеттің атынан азаматтық-құқықтық қатынастардың тарапы болуға құқығы бар.

6. Қызмет өз құзыретінің мәселелері бойынша Қазақстан Республикасының заңнамасында белгіленген тәртіппен Қызмет басшысының бұйрықтарымен және Қазақстан Республикасының заңнамасында көзделген басқа да актілермен рәсімделетін шешімдер қабылдайды.

7. Қызметтің құрылымы мен штат санының лимиті Қазақстан Республикасының заңнамасына сәйкес бекітіледі.

8. Заңды тұлғаның орналасқан жері: Қазақстан Республикасы, 010000, Астана қаласы, Есіл ауданы, Сығанақ көшесі, 49.

8-тармақ жаңа редакцияда жазылды ҚР Президентінің 09.11.2022 жылғы № 1068 Жарлығына сәйкес (05.07.2022 ж. редакцияны қараңыз)

9. Қызметтің толық атауы – «Қазақстан Республикасы Ұлттық қауіпсіздік комитетінің Үкіметтік байланыс қызметі» республикалық мемлекеттік мекемесі.

10. Осы Ереже Қызметтің құрылтай құжаты болып табылады.

11. Қызметтің қызметін қаржыландыру республикалық бюджеттен жүзеге асырылады.

12. Қызметке кәсіпкерлік субъектілерімен Қызмет өкілеттіктерінің функциялары болып табылатын міндеттемелерді орындау тұрғысынан шарттық қатынастар жасауға тыйым салынады.

Егер Қызметке Қазақстан Республикасының заңнамалық актілерімен кіріс әкелетін қызметті жүзеге асыру құқығы берілсе, онда мұндай қызметтен алынған кірістер мемлекеттік бюджетке жіберіледі.

13. Міндеттері:

1) Қазақстан Республикасының Президентін, Қазақстан Республикасының мемлекеттік органдарын, Қарулы Күштерін, басқа да әскерлері мен әскери құралымдарын бейбіт және соғыс уақытында үкіметтік байланыспен, сондай-ақ Қазақстан Республикасының ұлттық қауіпсіздік органдарын қорғалған байланыспен қамтамасыз ету;

2) Қазақстан Республикасының уәкілетті мемлекеттік органдарында, әскери басқару, ұлттық қауіпсіздік және ішкі істер органдарында шифрлау жұмыстарын ұйымдастыру;

3) үкіметтік байланыс желілерінің, республикалық қорғалған байланыс желілерінің және Қазақстан Республикасы ұлттық қауіпсіздік органдары қорғалған байланыс желілерінің ақпараттық қауіпсіздігін қамтамасыз ету;

4) Қазақстан Республикасының заңдарында және Қазақстан Республикасы Президентінің актілерінде айқындалатын өзге де міндеттер болып табылады.

14. Құқықтары мен міндеттері:

1) өз құзыреті шегінде құқықтық актілер қабылдау;

2) сотқа жүгіну;

3) стационарлық объектілерді, телекоммуникация желілерін салуды ұйымдастыру, телкоммуникация құралдары мен шифрлау құралдарын орналастыру және пайдалану;

4) Қазақстан Республикасы ұлттық қауіпсіздік органдарының үкіметтік және қорғалған байланыс желілерін құру және қайта құру;

5) мемлекеттік органдар мен ұйымдарға өз құзыреті шеңберінде Қазақстан Республикасы қауіпсіздігінің қаупін іске асыруға ықпал ететін себептер мен жағдайларды жою туралы орындалуы міндетті ұсыныстар енгізу;

6) үкіметтік және республикалық желілерінің қорғалған байланысты ұйымдастыру, қамтамасыз ету, оның жұмыс істеуі мен қауіпсіздігі бөлігінде нұсқаулар және (немесе) ұсынымдар жолдау;

7) телекоммуникация құралдары мен шифрлау құралдары орналасқан, Қазақстан Республикасы ұлттық қауіпсіздік органдарының үкіметтік және қорғалған байланыс желілері өтетін ғимараттарға, объектілерге, үй-жайларға техникалық қызмет көрсету және жөндеу-қалпына келтіру жұмыстарын жүзеге асыру үшін кіруге рұқсат алу;

8) мемлекеттік органдар мен ұйымдарға телекоммуникация құралдарын орналастыру үшін үй-жайлар бөлу қажеттілігі туралы талаптар қою;

9) телекоммуникация арналарын, үй-жайларды жалға алу бойынша, баланста тұрған телекоммуникация желілеріне техникалық қызмет көрсету бойынша, Қазақстан Республикасы ұлттық қауіпсіздік органдарының үкіметтік және қорғалған байланыс желілерінің жұмыс істеуін қамтамасыз ету үшін телекоммуникация құралдары мен электрмен жабдықтау жабдықтарын жеткізуге шарттар жасасу;

10) үй-жайлар мен телекоммуникация желілерін беру мәселелері бойынша мемлекеттік органдармен және ұйымдармен өзара іс-қимыл жасау;

11) мемлекеттік органдардан, ұйымдардан, олардың лауазымды адамдарынан үкіметтік байланыс пен шифрлау жұмысы мәселелері бойынша қажетті ақпаратты, құжаттарды және өзге де материалдарды сұрату және алу;

12) шифрлау жұмысы бойынша анықталған бұзушылықтар мен кемшіліктерді жоюды талап ету, шифрлау жұмысы бойынша анықталған бұзушылықтарды жою бойынша ұсынымдар әзірлеу, сондай-ақ нұсқаулар мен ұсынымдардың орындалуына тиісті тексерулер ұйымдастыру;