«Газ және газбен жабдықтау туралы» Қазақстан Республикасының 2012 жылғы 9 қаңтардағы Заңының 5-бабының 13) тармақшасына сәйкес Қазақстан Республикасының Үкіметі ҚАУЛЫ ЕТЕДІ: 

1. Қоса беріліп отырған Тауарлық және сұйытылған мұнай газын бөлшек саудада өткізу және пайдалану қағидалары бекітілсін.

2. Осы қаулыға қосымшаға сәйкес Қазақстан Республикасы Үкіметінің кейбір шешімдерінің күші жойылды деп танылсын.

3. Осы қаулы алғашқы ресми жарияланғанынан кейін күнтізбелік он күн өткен соң қолданысқа енгізіледі.

Осы Тауарлық және сұйытылған мұнай газын бөлшек саудада өткізу және пайдалану қағидалары (бұдан әрі – Қағидалар) «Газ және газбен жабдықтау туралы» Қазақстан Республикасының 2012 жылғы 9 қаңтардағы Заңына (бұдан әрі – Заң) сәйкес әзірленген және тауарлық және сұйытылған мұнай газын бөлшек саудада өткізу және пайдалану тәртібін айқындайды.

1. Осы Қағидаларда мынадай негізгі ұғымдар пайдаланылады: 

1) газ – тауарлық газ және (немесе) сұйытылған мұнай газы;

2) газды артық жұмсау – газды жеткізудің (тұтынудың) тәуліктік  нормасынан асып кететін көлемде тұтынушының газды іріктеп алуы;

3) газ құбырындағы газдың технологиялық қоры – газды тасымалдаудың жұмыс режимін қамтамасыз ету үшін газ құбырындағы қажетті газдың ең аз көлемі;

4) газ қабылдау (жеткізу) пунктi – жеткізуші, газ тасымалдаушы, газ таратушы ұйымдар мен тұтынушы арасындағы шарттарда айқындалатын, әдетте, газды есепке алу аспаптарымен жабдықталған газ жеткізу (тасымалдау) пункті;

5) газ жеткізудің (тұтынудың) орташа тәулiктiк нормасы – шартпен белгіленген бір айдағы газ көлемін тиісті айдың күнтізбелік күндеріне бөлу жолымен айқындалатын газ көлемі;

6) газ тасымалдау жүйесі – газ тасымалдау, газ тарату ұйымының меншiгіндегі немесе өзге де заңды негіздердегі магистральдық газ құбырларын, газ тарату жүйесін қамтитын газ құбырларының жүйесі; 

7) газды жеткізудің (тұтынудың) тәулiктiк нормасы – тараптардың келісімі бойынша диспетчерлік кестемен белгіленген тәуліктік газ көлемі;

8) газ тұтыну броні – отынның резервтік түрлерін барынша пайдаланған жағдайда тұтынушыларға газ жеткізу Қазақстан Республикасының заңдарына және өзге де нормативтік құқықтық актілерге сәйкес газ жеткізудің тоқтатылуы немесе осы шектен азайтылуы мүмкін емес тұтынушыларды үздіксіз және авариясыз технологиялық жабдықтау жұмысы үшін қажетті ең аз газ тұтыну көлемі;

9) диспетчерлік кесте – жеткізушінің тасымалдаушыға берген өтініміне сәйкес газ жеткізудің сағаттық кестесі;