Документ на казахском языке

"Парниктік газдарды атмосфераға шығаруды және озон қабатын бұзатын заттарды тұтыну көздерін мемлекеттік есепке алу ережесін бекіту туралы" Қазақстан Республикасы Үкіметінің 2008 жылғы 8 ақпандағы № 124 қаулысына өзгерістер енгізу туралы Қазақстан Республикасы Үкіметінің 2012 жылғы 31 мамырдағы № 714 Қаулысы

Қазақстан Республикасының Үкіметі ҚАУЛЫ ЕТЕДІ:

1. «Парниктік газдарды атмосфераға шығаруды және озон қабатын бұзатын заттарды тұтыну көздерін мемлекеттік есепке алу ережесін бекіту туралы» Қазақстан Республикасы Үкіметінің 2008 жылғы 8 ақпандағы № 124 қаулысына (Қазақстан Республикасының ПҮАЖ-ы, 2008 ж., № 7, 71-құжат) мынадай өзгерістер енгізілсін:

тақырыбы мынадай редакцияда жазылсын:

«Озон қабатын бұзатын заттарды тұтынуды мемлекеттік есепке алу қағидаларын бекіту туралы»;

1-тармақ мынадай редакцияда жазылсын:

«1. Қоса беріліп отырған Озон қабатын бұзатын заттарды тұтынуды мемлекеттік есепке алу қағидалары бекітілсін.»;

көрсетілген қаулымен бекітілген Парниктік газдарды атмосфераға шығару және озон қабатын бұзатын заттарды тұтыну көздерін мемлекеттік есепке алу ережесі осы қаулыға қосымшаға сәйкес жаңа редакцияда жазылсын.

2. Осы қаулы алғашқы ресми жарияланған күнінен бастап қолданысқа енгізіледі.

Қазақстан Республикасының

Премьер-Министрі К.Мәсімов

Қазақстан Республикасы Үкіметінің 2012 жылғы 31 мамырдағы № 714 қаулысына қосымша

Қазақстан Республикасы Үкіметінің 2008 жылғы 8 ақпандағы № 124 қаулысымен бекітілген

Озон қабатын бұзатын заттарды тұтынуды мемлекеттік есепке алу қағидалары

1. Жалпы ережелер

1. Осы Озон қабатын бұзатын заттарды тұтынуды мемлекеттік есепке алу қағидалары (бұдан әрі - Қағидалар) Қазақстан Республикасы Экологиялық кодексінің 16-бабына сәйкес әзірленген.

2. Қағидалар озон қабатын бұзатын заттарды тұтынуды мемлекеттік есепке алудың тәртібін айқындайды.

3. Озон қабатын бұзатын заттарды тұтынуды мемлекеттік есепке алу жүйелі, мерзімді толықтырылатын және нақтыланатын мәліметтер жиынтығын білдіреді, ол озон қабатын бұзатын заттарды тұтынудың мемлекеттік кадастрында қалыптастырылады.

4. Қағидалар озон қабатын бұзатын заттарды тұтынумен байланысты қызметті жүзеге асыратын заңды және жеке тұлғаларға (бұдан әрі – табиғат пайдаланушылар) қолданылады.

5. Қағидалар құрамында озон қабатын заттар бар өнім Қазақстан Республикасының кедендік шекарасы арқылы жеке тұлғаның жеке мүлкі немесе тұрмыстық заттары бар контейнерлерде немесе ұқсас коммерциялық емес жағдайларда өткен жағдайларға қолданылмайды.

2. Озон қабатын бұзатын заттарды тұтынуды мемлекеттік есепке алу тәртібі

6. Озон қабатын бұзатын заттарды тұтынуды мемлекеттік есепке алуға мыналар жатады:

1) осы Қағидалардың 1-қосымшасында көрсетілген озон қабатын бұзатын заттардың тізбесіне сәйкес озон қабатын бұзатын заттарды өндіру;

2) озон қабатын бұзатын заттарды импорттау/экспорттау;

3) құрамында озон қабатын бұзатын заттар бар жабдықтар мен өнімді импорттау/экспорттау.

7. Озон қабатын бұзатын заттарды тұтынуды жүзеге асыратын табиғат пайдаланушылар жыл сайын, есепті жылдан кейінгі 30 маусымнан кешіктірмей қоршаған ортаны қорғау саласындағы уәкілетті органға осы Қағидалардың 2-қосымшасына сәйкес нысан бойынша озон қабатын бұзатын заттарды жылдық тұтыну туралы деректерді ұсынады.

8. Қоршаған ортаны қорғау саласындағы уәкілетті орган озон қабатын бұзатын заттарды тұтынудың мемлекеттік кадастрына озон қабатын бұзатын заттарды жылдық тұтыну туралы деректерді енгізеді.

Озон қабатын бұзатын заттарды тұтынуды мемлекеттік есепке алу қағидаларына 1-қосымша

Озон қабатын бұзатын заттар тізбесі

Ескертпе: 1 * Осы формула 1,1,2-трихлорэтанға жатпайды.

Озон қабатын бұзатын заттарды тұтынуды мемлекеттік есепке алу қағидаларына 2-қосымша

Озон қабатын бұзатын заттарды жылдық тұтыну есептілігінің нысаны