«Қазақстан Республикасындағы сәулет, қала құрылысы және құрылыс қызметі туралы» Қазақстан Республикасының 2001 жылғы 16 шілдедегі Заңының 74-бабының 4-тармағына сәйкес Қазақстан Республикасының Үкіметі ҚАУЛЫ ЕТЕДІ: 

1. Қоса беріліп отырған:

1) Меншік иесінің салынған объектіні пайдалануға өз бетінше қабылдау қағидалары (бұдан әрі – Қағидалары);

2) меншік иесінің салынған объектіні пайдалануға өз бетінше қабылдау актісінің нысаны бекітілсін.

2. «Қазақстан Республикасында құрылысы аяқталған жеке тұрғын үйлердi қора-қопсы құрылыстарымен пайдалануға қабылдау тәртiбi туралы ереженi бекiту туралы» Қазақстан Республикасы Министрлер Кабинетiнiң 1995 жылғы 25 шiлдедегі № 1018 қаулысының күшi жойылды деп танылсын. 

3. Осы қаулы 2012 жылғы 31 қаңтардан бастап қолданысқа енгізілетін осы қаулының 2-тармағын және Қағидалардың 3-тармағының 2) тармақшасын қоспағанда, алғашқы ресми жарияланған күнінен бастап күнтізбелік он күн өткен соң қолданысқа енгізіледі. 

Қағидалардың 3-тармағының 1) тармақшасы 2012 жылғы 31 қаңтарға дейін қолданылады.

Қазақстан Республикасының 

1. Осы Меншік иесінің салынған объектіні пайдалануға өз бетінше қабылдау қағидалары (бұдан әрі – Қағидалар) «Қазақстан Республикасындағы сәулет, қала құрылысы және құрылыс қызметі туралы» Қазақстан Республикасының 2001 жылғы 16 шілдедегі Заңына (бұдан әрі – Заң) сәйкес әзірленген және меншік иесінің салынған объектілерді пайдалануға өз бетінше қабылдау тәртібін белгілейді.

2. Осы қағидалардың қолданысы Заңның 74-бабының 1-тармағында көрсетілген объектілерге қатысты болады.

3. Меншік иесі салынған объектіні пайдалануға өз бетінше қабылдаған кезде мыналардың болуы талап етіледі:

1) құрылыс-монтаж жұмыстарын жүргізуге рұқсат;

2) сәулет және қала құрылысы саласындағы функцияларды жүзеге асыратын тиісті жергілікті атқарушы органдардың құрылымдық бөлімшелерінің тиісті шешімі;

3) тиісті жергілікті сәулет және қала құрылысы органдары берген сәулет-жоспарлау тапсырмасы және техникалық шарттары;

4) жобалау (жобалау-сметалық) құжаттама не нобай (жобаның нобайы).